ރާއްޖެ އިސްލާމްވިތާ 900 އަހަރު ފުރުން ކުލަގަދަކޮށް ފާހަގަކުރަމުންދާއިރު، ރާއްޖޭގައި ހުރި އިސްލާމީ އާސާރުތަށް އަޅާނުލެވި ދޫކޮށްލެވިފައި!
15 ސެޕްޓެމްބަރު 2026 | އަންގާރަ 13:03ރާއްޖެ އިސްލާމްވިތާ 900 އަހަރު ފުރުން ފާހަގަކުރުމަށް ހެރިޓޭޖް މިނިސްޓްރީން ގާތްގަނޑަކަށް 15 ހަރަކާތް ރާވާފައިވާއިރު، މާލޭ ހުކުރު މިސްކިތް ފަދަ ތާރީޚީ އާސާރުތައް ބެލެހެއްޓުމުގައި ބޮޑެތި އިހުމާލުތަކެއްވާތީ އާންމުންނާއި ތަޖުރިބާކާރުން ދަނީ ކަންބޮޑުވުން ފާޅުކުރަމުން. އައު ބިނާތަކާއި ފެސްޓިވަލްތައް ބޭއްވުމުގެ ބަދަލުގައި، ހުރި އާސާރުތައް ރައްކާތެރިކޮށް ދެމެހެއްޓުމަކީ މިފަދަ މުނާސަބަތެއްގެ ހަގީގީ މަގުސަދު ހާސިލުވާނެ ކަމެއްކަން ގިނަ ބަޔަކު ފާހަގަކުރޭ
މާލޭ ހުކުރު މިސްކިތުގެ މުންނާރު، ފެހި ނުކަހާ ހުރުމުގެ ސަބަބުން ވަނީ ވަރަށް ބޮޑަށް ހަޑިވެފައި | ރާއްޖެއެމްވީ
ދިވެހިރާއްޖެ އިސްލާމްވިތާ 900 އަހަރު ފުރުމުގެ ތާރީޚީ މުނާސަބަތަކީ ދިވެހި އުންމަތުގެ ހަޔާތުގައި ވަރަށް މުހިންމު އަދި ފަޚުރުވެރި މަރުޙަލާއެކެވެ. މި މުނާސަބާ ފާހަގަކުރުމަށްޓަކައި ސަރުކާރުންނާއި ކަމާބެހޭ މުއައްސަސާތަކުން ގިނަގުނަ ކުލަގަދަ ހަރަކާތްތަކެއް ރާވައި ހިންގަމުން ގެންދެ އެވެ. ނަމަވެސް، މިފަދަ ބޮޑު މުނާސަބަތެއް ފާހަގަކުރަމުންދާއިރު، ރާއްޖޭގެ ދިގު މާޒީއާއި އިސްލާމީ ސަގާފަތް ދައްކުވައިދޭ އަގުހުރި އާސާރުތައް ބެލެހެއްޓުމުގައި ފެންނަމުންދާ އިހުމާލުތަކަކީ ގިނަ ބައެއްގެ ކަންބޮޑުވުމެކެވެ.
ކަންމިހެން އޮތް ނަމަވެސް ރާއްޖެ އިސްލާމްވިތާ 900 އަހަރު ފުރުމާ ގުޅިގެން މުޅި އަހަރަށް ބަހާލައިގެން ތަފާތު 15 ހަރަކާތެއް ކުރިއަށް ގެންދިއުމަށް ހެރިޓޭޖް މިނިސްޓްރީން ވަނީ ނިންމާފަ އެވެ. މީގެ ތެރޭގައި މާލެ ސަރަހައްދުގައި 900 އަހަރު ރަމްޒުކޮށްދޭ މޮނިއުމަންޓެއް ބިނާކުރުމާއި، ބައިނަލްއަގުވާމީ އިސްލާމީ ޓްރޭޑް ފެއަރއެއް ބޭއްވުން ހިމެނެ އެވެ. އަދި ގައުމީ ގުރުއާން ފެސްޓިވަލާއި، އިލްމީ މުބާރާތްތަކާއި، ކުޅިވަރު ހަރަކާތްތަކާއި، ކެލިގްރަފީ ފެސްޓިވަލްގެ އިތުރުން ޒުވާނުންނަށް އަމާޒުކޮށްގެން އިސްލާމީ ތަރިކަ ކޭމްޕުތައް ހިންގުމަށް ވެސް ވަނީ ރޭވިފަ އެވެ. މި ހުރިހާ ހަރަކާތްތަކަކީ ވެސް އިސްލާމީ ހޭލުންތެރިކަން އިތުރުކުރުމަށް އެކަށައެޅިފައިވާ މުހިންމު ކަންކަމެވެ.
ރާއްޖެ އިސްލާމްވިތާ 900 އަހަރު ފުރުން ކުލަގަދަކޮށް ފާހަގަކުރަމުންދާއިރު، މާލޭ ހުކުރު މިސްކިތް ސާފުކޮށް އާބާތުރަ ފިލުވާފައިނުވޭ | ރާއްޖެއެމްވީ
ހަރަކާތްތައް ކިތަންމެ ކުލަގަދަކޮށް ރޭވި ނަމަވެސް، ރާއްޖޭގެ ތާރީޚީ މިސްކިތްތަކާއި އިސްލާމީ ބިނާތަކުގެ ހާލަތު ފެންނަނީ ނުހަނު ދެރަކޮށެވެ. ޚާއްސަކޮށް، ރާއްޖޭގެ އެންމެ މުހިންމު އެއް އާސާރީ ބިނާ ކަމުގައިވާ މާލޭ ހުކުރު މިސްކިތާއި އޭގެ މުންނާރުގެ ހާލަތު ވަނީ ވަރަށް ބޮޑަށް ދަށަށް ގޮސްފަ އެވެ. މިސްކިތުގެ ފުރާޅާއި، ގޯތިތެރެ އަދި މުންނާރުގައި ފެހި ޖަހައި، ގޯތިތެރޭގައި ކުނިބުނި ގިނަވެފައިވާ މަންޒަރު ފެނުމަކީ ބަލައިގަންނަން އުނދަގޫ ކަމެކެވެ. މީގެ އިތުރުން، މޫސުމީ ވިއްސާރައިގެ ސަބަބުން ލިބޭ ގެއްލުންތައް މަރާމާތު ކުރުމުގައި ވެސް އެކަށީގެންވާ އަވަސް ފިޔަވަޅުތަކެއް އަޅާފައިނުވެ އެވެ.
އާސާރީ ތަންތަން ބެލެހެއްޓުމުގައި ދިމާވެފައިވާ މި އިހުމާލާ ގުޅިގެން ކުރީގެ އިސް ވެރިންނާއި އާންމު ރައްޔިތުން ވެސް ދަނީ ކަންބޮޑުވުން ފާޅުކުރަމުންނެވެ.
މާލޭ ހުކުރު މިސްކިތް. މިހާރު ކުރަމުންދާ ވިއްސާރައިގައި ބައެއް ގެއްލުން ވަނީ ލިބިފައި | ރާއްޖެއެމްވީ
އެގޮތުން ކުރީގެ ހެރިޓޭޖް މިނިސްޓްރީގެ ސްޓޭޓް މިނިސްޓަރު މުހައްމަދު ތޯރިގް ވެސް ވަނީ 900 އަހަރު ފުރުން ކުލަގަދަކޮށް ފާހަގަކުރަމުންދާއިރު ހަގީގީ އާސާރުތައް އަޅާނުލެވި ދޫކޮށްލެވިފައި އޮތުމަކީ ބޮޑު އިހުމާލެއް ކަމަށް ވިދާޅުވެފަ އެވެ. މިފަދަ ތާރީޚީ އަގުހުރި ތަންތަން ސާފުކޮށް ރައްކާތެރިކުރުމަކީ ހަމައެކަނި މުނާސަބަތުތަކާ ގުޅުވައިގެން ކުރަންޖެހޭ ކަމެއް ނޫން ކަމާއި، އެއީ ދެމެހެއްޓެނިވި ގޮތެއްގައި ކުރަންޖެހޭ ގައުމީ ޒިންމާއެއްކަން ފާހަގަކޮށްފައިވެ އެވެ.
ނަމަވެސް މިމައްސަލައާ ގުޅިގެން ހެރިޓޭޖް މިނިސްޓްރީގެ ބަހެއް ހޯދުމަށް ކުރި މަސައްކަތް ވަނީ ކާމިޔާބުވާ ގޮތް ނުވެފަ އެވެ.
ރާއްޖެ އިސްލާމްވިތާ 900 އަހަރު ފުރުން ކުލަގަދަކޮށް ފާހަގަކުރުމުގެ ހަގީގީ ބޭނުން ހާސިލުވާނީ، އަޅުގަނޑުމެންގެ ކާބަފައިން ދޫކޮށްފައިވާ އިސްލާމީ އާސާރުތައް އެންމެ ފުރިހަމަ ގޮތުގައި ރައްކާތެރިކޮށް ދަމަހައްޓައިގެންނެވެ. ހަމައެކަނި އައު ބިނާތަކާއި ފެސްޓިވަލްތައް ބޭއްވުމުގެ ބަދަލުގައި، އަގުހުރި އާސާރީ މިސްކިތްތަކާއި ބިނާތައް ހަލާކުވިޔަނުދީ ރައްކާތެރިކޮށް، ކުރިއަށް އޮތް ޖީލުތަކަށް ފޯރުކޮށްދިނުމަކީ ކަމާބެހޭ އެންމެހައި ފަރާތްތަކުން އެންމެ އިސްކަންދޭންޖެހޭ މުހިންމު ވާޖިބެވެ.
