ރަސްމާލެ މަޝްރޫއާ ދެކޮޅަށް "ރަތް ރޮނގު" ގެ ނަމުގައި ހުޅުމާލޭގައި އަންނަ ހުކުރު ދުވަހު އެއްވުމެއް، ބޮޑު އެއްވުން ޑިސެމްބަރު 4 ގައި!
15 ނޮވެމްބަރު 2026 | އާދީއްތަ 08:48ރަސްމާލެ މަޝްރޫއާ ދެކޮޅަށް "ދިވެހީންގެ ބިން ދިވެހީންނަށް" ގައުމީ ހަރަކާތުން ބޭއްވި އެއްވުމަށް ބޮޑު ތަރުހީބެއް ލިބިފައިވާ ކަމަށް އެ ހަރަކާތުން ބުނެފި. މި މަޝްރޫއުގެ ދަށުން ބިން ދޫކުރުމާއި ގައުމީ މަސްލަހަތަށް ބުރޫއަރާ ފަދަ އިސްލާހުތަކާ ދެކޮޅު ހެދުމަށް އެ ހަރަކާތުން ވަނީ ރައްޔިތުންގެ މަޖިލީހުގެ މެންބަރުންނަށް ގޮވާލާފައި
"ދިވެހީންގެ ބިން ދިވެހީންނަށް" ގައުމީ ހަރަކާތުން އާދިއްތަ ދުވަހު ބޭއްވި ނޫސްވެރިންގެ ބައްދަލުވުމުން | ރާއްޖެއެމްވީ
ރަސްމާލެ މަޝްރޫއުގެ އެއްބަސްވުމާ ދެކޮޅަށް ގައުމީ ހަރަކާތުން ބާއްވާ ބޮޑު އެއްވުން އަންނަ ޑިސެމްބަރު މަހުގެ 4 ވަނަ ދުވަހު ބޭއްވުމަށް ނިންމައި، މި ހަފުތާގެ ހުކުރު ދުވަހުގެ ރޭ ހުޅުމާލޭގެ ދެވަނަ ފިޔަވަހީ ގައި "ރަތް ރޮނގު" ގެ ނަމުގައި ޖަލްސާއެއް ބާއްވަން ނިންމައިފައިވާ ކަމަށް އެ ހަރަކާތުން ބުނެފި އެވެ.
"ދިވެހީންގެ ބިން ދިވެހީންނަށް" ގައުމީ ހަރަކާތުން އާދިއްތަ ދުވަހު ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން އެ ހަރަކާތުގައި އިސްކޮށް ހަރަކާތްތެރިވެވަޑައިގަންނަވާ ކުރީގެ ހޯމް މިނިސްޓަރު، އިމްރާން އަބްދުﷲ ވިދާޅުވީ މިދިޔަ ހުކުރު ދުވަހުގެ ރޭ ބޭއްވި އެއްވުމުގައި ވެސް ގިނަ އަދަދެއްގެ ރައްޔިތުންތަކެއް ބައިވެރިވެފައިވާ ކަމަށެވެ.
މޫސުން ގޯސްވެ، ވާރޭ ވެހެމުން ދިޔަ ނަމަވެސް އަދި ކަރަންޓު ނެތި، އެތަކެއް ދަތިތަކާއެކު ބޭއްވި އެ އެއްވުމަށް ގިނަ ބައެއްގެ ތަރުހީބު ލިބި، އެއްބާރުލުން ލިބުމުން އަންގައިދެނީ ރަސްމާލޭގެ ބިން ދިނުމާ ދިވެހީން ދެކޮޅު މިންވަރު ކަން ކަމަށް ވެސް އިމްރާން ވިދާޅުވި އެވެ. އަދި އެއީ ލިބިގެން ދިޔަ ވަރަށް ބޮޑު ކާމިޔާބީއެއް ކަމަށް ވެސް އިމްރާން ވިދާޅުވި އެވެ.
އަޅުގަނޑުމެން މިއޮތީ ﷲ ރަހުމަތްލެއްވިއްޔާ އަންނަ 4 ޑިސެމްބަރުގައި ދުވަހު ރާއްޖޭގެ ރަށްތަކުން މީހުން މާލެއަށް އަރައިގެން ބާއްވާ ބޮޑު އެއްވުމެއް އަނެއްކާވެސް ބާއްވަން ނިންމާފައި. އެހެންވީމާ ޑިސެމްބަރު 4 ގައި ބޮޑު އެއްވުމެއް އަނެއްކާ އަޅުގަނޑުމެން ބާއްވާނަން....އަޅުގަނޑުމެން ގައުމީ ހަރަކާތުން މިހާރު ކަނޑައަޅައިފައި މިއޮތީ މި އަންނަ ހުކުރު ދުވަހުގެރޭ އިރާދަކުރެއްވިއްޔާ ހުޅުމާލެ ފޭސް ދޭއްގައި އަޅުގަނޑުމެން ބާއްވާނަން 'ރަތް ރޮނގު' މި ނަމުގައި ޖަލްސާއެއް، އެހެންވީމާ ހާއްސަކޮށް ހުޅުމާލޭގައި ދިރިއުޅުއްވާ ބޭފުޅުންނާއި އަދި މާލޭގައި ވެސް ވަޑައިގެންނެވެން ތިއްބެވި ބޭފުޅުން ވަޑައިގެންދެއްވުމަކީ އަޅުގަނޑުމެންގެ ވަރަށް ބޮޑު އެދުމެއްއިމްރާން އަބްދުﷲ
އެ ނޫސްވެރިންގެ ބައްދަލުވުމުގައި އިމްރާން ވަނީ ރަސްމާލޭގެ ބިން ދިނުމަށް މި ސަރުކާރުން ހިންގާ ކަންކަމާ ދެކޮޅު ހަދައި، އެހެން ދީންތަކަށް ފުރުސަތުދެވޭ ގޮތަށް އަދި ގައުމުގެ މަސްލަހަތަށް ބުރޫއަރާ ގޮތަށް ގާނޫނުތަކަށް ސަރުކާރުން ގެންނަން ބޭނުންވާ ބަދަލުތަކާއި އެފަދަ ކަންކަންމަށް ދެކޮޅު ހެދުމަށް ވެސް ރައްޔިތުންގެ މަޖިލީހުގެ މެންބަރުންނަށް ގޮވާލައްވާފަ އެވެ.
