މި ސަރުކާރުން ބަޖެޓު ހުށަހަޅަނީ އޮޅުވާލުންތަކުގެ ތެރެއިން މަޖިލީހުން ހަމައެކަނި ރަބަރު ސްޓޭމްޕް ޖަހަން: މެންބަރު މީކާއިލް
12 ނޮވެމްބަރު 2026 | ބުރާސްފަތި 08:00ސަރުކާރުން މަޖިލީހަށް ހުށަހެޅި ބަޖެޓަކީ މަޝްރޫއުތަކުގެ ތަފުސީލު ނުހިމަނައި، ޖަވާބުދާރީ ނުކުރެވޭ ގޮތަށް އެކުލަވާލާފައިވާ އޮޅުވާލުން ބޮޑު ބަޖެޓެއް ކަމަށް މެންބަރު މީކާއީލް ވިދާޅުވި. މީގެ އިތުރުން ކުރީގެ ބަޖެޓުތަކުން ބޯހިޔާވަހިކަމަށް ކަނޑައެޅި ފައިސާ ބޭނުންނުކޮށް، ދަރަނީގެ ހަގީގީ އަދަދުތައް ސަރުކާރުން ސިއްރުކުރަމުންދާ ކަމަށް އޭނާ ފާހަގަކުރެއްވި
ރާއްޖެޓީވީގެ ފަލަސުރުހީ ޕްރޮގްރާމްގައި ރައްޔިތުންގެ މަޖިލީހުގެ ގަލޮޅު ދެކުނު ދާއިރާގެ މެންބަރު މީކާއިލް އަހުމަދު ނަސީމް ވާހަކަ ދައްކަވަނީ | ރާއްޖެއެމްވީ
މި ސަރުކާރުން ދައުލަތުގެ ބަޖެޓު ހުށަހަޅަނީ ރައްޔިތުންގެ މަޖިލީހުން ހަމައެކަނި ރަބަރު ސްޓޭމްޕް ޖަހައިދޭ ގޮތަށް ކަމަށާއި، ބަޖެޓު ތައްޔާރުކޮށްފައިވަނީ ބޮޑެތި އޮޅުވާލުންތަކެއްގެ ތެރެއިން ކަމަށް ރައްޔިތުންގެ މަޖިލީހުގެ ގަލޮޅު ދެކުނު ދާއިރާގެ މެންބަރު މީކާއިލް އަހުމަދު ނަސީމް ވިދާޅުވެއްޖެ އެވެ.
ރާއްޖެޓީވީގެ "ފަލަސުރުޚީ" ޕްރޮގްރާމުގައި ވާހަކަދައްކަވަމުން މެންބަރު މީކާއިލް ވިދާޅުވީ، މީގެ ކުރިން މަޖިލީހަށް ހުށަހަޅަމުން އައީ މަޝްރޫއުތަކުގެ ވާނުވާ ސާފުކޮށް ޓްރެކްކުރެވޭ ގޮތަށާއި ސަރުކާރު ޖަވާބުދާރީ ކުރުވަން ފަސޭހަވާ ގޮތަށް އެކުލަވާލާފައިވާ ޕްރޮގްރާމް ބަޖެޓެއް ކަމަށެވެ.
ނަމަވެސް މި ސަރުކާރު އައުމާ އެކު އެ އިސްލާހީ ފިޔަވަޅު ފަހަތަށް ޖައްސާލާފައިވާ ކަމަށް އޭނާ ވިދާޅުވި އެވެ.
މިހާރު މި ހުށަހަޅާ ބަޖެޓުގައި ޙަޤީޤަތުގައި މި ބުނާ ވާހަކައަކީ ތިމަންނާމެން ބޭނުންވަނީ މިވެނި އަދަދެކޭ، ކުރާނެ ކަމެއްވެސް ނުބުނާނަމޭ. މިހިރީ ވެދާނެ ކަންކަމޭ، ތިމަންނާމެންނަށް މި ފާސްކޮށްދޭށޭ. އެންމެ ސިމްޕަލްކޮށް ބުނާ ނަމަ ސަރުކާރުން އެ ބުނަނީ ތިމަންނާމެން ބުނާހާ ގޮތަކަށް މި ބަޖެޓުގައި ރަބަރ ސްޓޭމްޕް ކޮށްދޭށޭމީކާއިލް އަހުމަދު ނަސީމް
މެންބަރު މީކާއިލް ވިދާޅުވީ މި ސަރުކާރުގެ ތިންވަނަ ބަޖެޓު ފާސްކުރަން ހުށަހަޅާއިރު، މީގެ ކުރިން ފާސްކުރި ދެ ބަޖެޓަށް ވީ ގޮތް ރައްޔިތުންނަށް ސާފުކޮށްދޭން ޖެހޭ ކަމަށެވެ.
އެގޮތުން ސަރުކާރުގެ ފުރަތަމަ ބަޖެޓަކީ ބޯހިޔާވަހިކަމުގެ ބަޖެޓެއް ކަމަށް ބުނެ 1.8 ބިލިއަން ރުފިޔާ ކަނޑައެޅި ނަމަވެސް، އަހަރު ނިމި ތިންވަނަ އަހަރުގެ ނޮވެމްބަރު 1 އާ ހަމައަށް ދިޔައިރު ވެސް އެ ބަޖެޓުގެ 53 އިންސައްތައިގައި އަތްވެސް ލާފައިނުވާ ކަމަށް އޭނާ ވިދާޅުވި އެވެ.
މީގެ އިތުރުން، ޕީއެސްއައިޕީ މަޝްރޫއުތަކާ ގުޅޭގޮތުން މެންބަރު މީކާއިލް ވިދާޅުވީ ރައްޔިތުންނަށް ފައިދާހުރި ކަންކަން ހިންގުމަށް އިދިކޮޅުން އަބަދުވެސް އެއްބާރުލުން ދޭނެ ކަމަށެވެ. ނަމަވެސް ކުރިން ފާސްކުރި ބަޖެޓުތަކުން މަޝްރޫއުތައް ނުހިންގާ އޮވެ، ކުރިއަށް އޮތް އަހަރު ޕީއެސްއައިޕީގެ 70 އިންސައްތަ މަޝްރޫއު ނިމޭނެ ކަމަށް ބުނުމަކީ ހަގީގަތެއް ނޫން ކަމަށް އޭނާ ވިދާޅުވި އެވެ.
މި އަހަރުގެ ބަޖެޓު ހުށަހެޅުއްވިއިރު އަދި އަންދާޒާ އެބަކުރޭ ދަރަނީގެ ޕަސެންޓޭޖް ކުޑަވާނޭ ކަމަށް. އެވެސް ހަމަ ކަނޑައެޅިގެން ދޮގެއް، އެއީ އެތެރޭގެ ދަރަނި ނުހިމަނާ މި ބޭފުޅުން ޖުމްލަ އަދަދު ޖަހައިގެން މި ބަހުސްގައި ޓޯކިންގ ޕޮއިންޓަކަށް ބޭނުން ކުރައްވަނީމީކާއިލް އަހުމަދު ނަސީމް
މެންބަރު މީކާއިލް ވިދާޅުވީ، ސަރުކާރުގެ އެހެނިހެން ކަންކަން ވެސް ހިނގަމުންދާ އުސޫލުން މި ބަޖެޓަކީ ވެސް ވަރަށް ބޮޑެތި އޮޅުވާލުންތަކާއި މަކަރުގެ ތެރެއިން ހުށަހަޅާފައިވާ ބަޖެޓެއް ކަމަށެވެ.
