ޗައިނާގައި ބާއްވާ އޭޕެކް ސަމިޓުގެ ހަވާސާގައި ޓްރަމްޕާއި ޝީ އަދި ޕުޓިން ބައްދަލުކުރައްވަނީ
14 ނޮވެމްބަރު 2026 | ހޮނިހިރު 04:23ޗައިނާގައި ބާއްވާ މި ބައްދަލުވުމުގައި އެމެރިކާގެ ރައީސް ޓްރަމްޕް އެންމެ ބޮޑު އިސްކަމެއް ދެއްވާނީ ދުނިޔޭގައި ނިއުކްލިއަރ ހަތިޔާރު މަދުކުރުމަށް. މި މަޝްވަރާތަކުގައި އީރާނުގެ މައްސަލަ ހިމެނުނު ނަމަވެސް، ޚާއްސަ އެއްބަސްވުމަކަށް އާދެވޭނެ ކަމަށް ނުބެލެވޭ ކަމަށް އެމެރިކާގެ އޮފިޝަލުން ވިދާޅުވޭ. މިއީ، މި ފަދަ މަޝްވަރާތަކުގެ ފެށުމެއް ކަމަށް ވައިޓް ހައުސްއިން ސިފަކުރޭ
އެމެރިކާގެ ރައީސް ޑޮނަލްޑް ޓްރަމްޕް، ރަޝިއާގެ ރައީސް ވްލަޑިމިއަރ ޕުޓިން އަދި ޗައިނާގެ ރައީސް ޝީ ޖިންޕިންގގެ ފޮޓޯފުޅުތައް | އަނަދޮލު އޭޖެންސީ
އެމެރިކާގެ ރައީސް ޑޮނަލްޑް ޓްރަމްޕާއި، ޗައިނާގެ ރައީސް ޝީ ޖިންޕިންގ އަދި ރަޝިއާގެ ރައީސް ވްލަޑިމިއަރ ޕުޓިން ކުރިއަށް އޮތް ހަފުތާގައި ޗައިނާގައި ތިން ޤައުމުގެ ބައްދަލުވުމެއް ބާއްވަވަން ނިންމަވައިފި އެވެ. އޭޝިއާ-ޕެސިފިކް އިކޮނޮމިކް ކޯޕަރޭޝަން (އޭޕެކް) ސަމިޓުގެ ހަވާސާގައި ކުރިއަށްދާ މި ތާރީޚީ ބައްދަލުވުން އޮންނާނީ ޗައިނާގެ ޝެންޜެންގަ އެވެ.
މި މުހިންމު ބައްދަލުވުމާ ގުޅޭގޮތުން ނޫސްވެރިންނަށް މަޢުލޫމާތު ދެއްވަމުން ވޮޝިންގޓަންގެ އެސިސްޓެންޓް ޕްރެސް ސެކްރެޓަރީ އޮލިވިއާ ވޭލްސް ވިދާޅުވީ، ދުނިޔޭގައި ނިއުކްލިއަރ ހަތިޔާރު މަދުކުރުމުގެ މައްޗަށް ޓްރަމްޕް ޚާއްސަ ސަމާލުކަމެއް ދެއްވާނެ ކަމަށެވެ. އަދި، މި ފަދަ ހަތިޔާރުތައް އިތުރުވުމަކީ ނުރައްކާތެރިކަމެއްގެ ގޮތުގައި އެމެރިކާގެ ރައީސް ދެކެވަޑައިގަންނަވާ ކަން އޭނާ ފާހަގަކުރެއްވި އެވެ.
ޗައިނާގެ ދަތުރުފުޅުގައި ޓްރަމްޕް، ޝީއާ ބައްދަލުކުރައްވައި ދެ ޤައުމުގެ ދެމެދުގެ ރަސްމީ މަޝްވަރާތަކާއި ޚާރިޖީ ގޮތުން ގުޅުން ބަދަހިކުރުމަށް ބާއްވާ ވަރކިންގ ލަންޗެއް ނުވަތަ މެންދުރުގެ ފަރިއްކޮޅެއްގައި ބައިވެރިވެވަޑައިގަންނަވާނެ އެވެ. އެއަށްފަހު، ތިން ޤައުމުގެ ވެރިން ބައިވެރިވެވަޑައިގަންނަވާ ބައްދަލުވުމާއެކު އެމެރިކާގެ ރައީސްގެ މި ދަތުރުފުޅު ނިންމަވާލައްވާނެ ކަމަށް ވައިޓް ހައުސްއިން ބުންޏެވެ.
ނަމަވެސް، މި ބައްދަލުވުމުން ޚާއްސަ އެއްބަސްވުމަކަށް އާދެވިދާނެ ކަމަށް އެމެރިކާގެ އިސް އޮފިޝަލަކު އުންމީދު ނުކުރައްވާ ކަމަށް ވިދާޅުވެފައިވެ އެވެ. "އަޅުގަނޑު ސިފަކުރާނީ މިއީ ފެށުމެއްގެ ގޮތުގައި، މިއީ މި ޤައުމުތަކުގެ ވެރިންގެ ފެންވަރުގައި ބޭއްވޭ ފުރަތަމަ މަޝްވަރާގެ ގޮތުގައި،" ނަން ހާމަނުކުރުމަށް ޝަރުތުކޮށް މީޑިއާއަށް މަޢުލޫމާތު ދެއްވި އެ އޮފިޝަލު ވިދާޅުވި އެވެ.
މިއާއެކު، ދުނިޔޭގައި އެންމެ ހަލުވިމިނެއްގައި ބޮޑުވަމުން ދަނީ ޗައިނާގެ ނިއުކްލިއަރ ހަތިޔާރު ވިއުގަ ކަމަށާއި، ބެއިޖިންގއިން މިހާރު "ބޮޑު މޭޒުދޮށަށް" އަރައިޒަމާން ޖެހިފައިވާ ކަމަށް އެމެރިކާގެ އިސް އޮފިޝަލު ތުހުމަތުކުރެއްވި އެވެ. މި ބައްދަލުވުމުގައި އީރާނާ ގުޅޭގޮތުން މަޝްވަރާކުރަން ރާވާފައިވީ ނަމަވެސް، ޔޫކްރެއިން މައްސަލަ މި ބައްދަލުވުމުގައި ނުނަގާނެ ކަމަށާއި، ސަބަބަކީ ޗައިނާއަކީ ރަޝިއާ-އެމެރިކާ މަޝްވަރާތަކުގެ ބައިވެރިއަކަށް ނުވުން ކަމަށް ވެސް އެ އޮފިޝަލު ވިދާޅުވި އެވެ.
މަސްދަރު: އަނަދޮލު އޭޖެންސީ
