އަންނަ އަހަރު ރަޝިއާގައި ބާއްވާ ފީފާ ވޯލްޑް ކަޕުން ފުރުޞަތު ގެއްލުމާއެކު، ނެދަލެންޑްސްގެ ކެޕްޓަން އާޔެން ރޮބެން ބައިނަލްއަޤްވާމީ ފުޓްބޯޅައިން ރިޓަޔަރކޮށްފި އެވެ.

ފީފާ ވޯލްޑް ކަޕްގެ ޔުރޯ ޒޯންގެ ކޮލިފައިންގ ގްރޫޕް އޭގައި އަންގާރަ ދުވަހުގެރޭ ސްވިޑްން އަތުން މޮޅުވި މެޗުގައި، ނެދަލެންޑްސްގެ ދެލަނޑުވެސް ޖަހައިދިނީ ރޮބެން އެވެ. ރޮބެންގެ ދެލަނޑުން ސްވިޑްން އަތުން މޮޅުވި ނަމަވެސް، ސްވިޑްން އާއި ޕޮއިންޓްގެ ގޮތުން އެއްވަރުވެ، ފައިދާ ލަނޑުގެ ތަފާތުން ކުރި ހޯދައިގެން ޕްލޭއޯފްގެ ޖާގަ ލިބުނީ ސްވިޑްން އަށެވެ.

މެޗަށް ފަހު ވާހަކަ ދައްކަމުން ޖަރުމަނުގެ ބަޔާން މިއުނިކަށް ކުޅޭ 33 އަހަރުގެ ފޯވާޑް ބުނީ، ޤައުމީ ޓީމަށް ކުޅުން ހުއްޓާލުމަށް ނިންމި ނިންމުމަކީ އުނދަގޫ ނިންމުމެއް ކަމަށާއި، މިއީ އޭނާގެ ކްލަބަށް ހުސްވާންވީ ވަގުތު ކަމަށެވެ.

ޤައުމީ ޓީމަށް ކުޅުން ހުއްޓާލިއިރު ރޮބެން ވަނީ އާސެނަލްގެ ކުރީގެ ފޯވާޑް ޑެނިސް ބާކެމްޕް އާއެކު ނެދަލެންޑްސްގެ ޤައުމީ ޓީމަށް އެންމެ ގިނަ ލަނޑު ޖަހައިދިން ކުޅުންތެރިންގެ ލިސްޓުގެ ހަތަރުވަނާގައެވެ.

އޭނާ ވަނީ ނެދަލެންޑްސްގެ ޤައުމީ ޓީމަށް 96 މެޗު ކުޅެ، 37 ލަނޑު ޖަހައިދީފައެވެ.

ރޮބެން އެންމެ ފުރަތަމަ ޤައުމީ ޓީމަށް ކުޅެފައި ވަނީ 2003 ވަނަ އަހަރު އެވެ. އޭގެ ފަހުން ރޮބެން ވެފައި ވަނީ ނެދަލެންޑްސްގެ ޓީމުގެ އެންމެ މުހިންމު އެއް ކުޅުންތެރިޔަކަށެވެ. ފީފާ ވޯލްޑް ކަޕްގެ ތިން މުބާރާތެއްގައި ނެދަލެންޑްސް އަށް ރޮބެން ލަނޑު ޖަހައިދީފައިވެއެވެ.

ނެދަލެންޑްސް އިން 2010 ވަނަ އަހަރުގެ ފީފާ ވޯލްޑް ކަޕްގެ ރިހި މެޑަލް ހޯދައިދިނުމުގައި އަދި 2014 ވަނަ އަހަރުގެ ފީފާ ވޯލްޑް ކަޕްގެ ތިންވަނަ ހޯދައިދިނުމުގައި ރޮބެން ވަނީ މުހިންމު ދައުރެއް އަދާކޮށްފައެވެ.

ފީފާ ވޯލްޑް ކަޕް 2018ގެ ފުރުޞަތު ގެއްލުމާއެކު، މިއީ ވިދިވިދިގެން ނެދަލެންޑްސް އަށް ގެއްލޭ ބޮޑު ދެވަނަ މުބާރާތެވެ. މިދިޔަ އަހަރު ފްރާންސްގައި ބޭއްވި ޔޫރޯ ފުޓްބޯޅަ މުބާރާތަށްވެސް ނެދަލެންޑްސް ކޮލިފައިވެފައެއްނުވެ އެވެ.