ރަޝިއާއަށް ޖާސޫސުކޮށްދިން ކަމުގެ ތުހުމަތުގައި އެމެރިކާ ސިފައިންގެ މީހަކު ހައްޔަރުކޮށްފި

ރަޝިއާއަށް ޖާސޫސުކޮށްދިން ކަމުގެ ތުހުމަތުގައި އެމެރިކާގެ އަސްކަރިއްޔާގެ ސިފައިންގެ މީހަކު އިނގިރޭސިވިލާތުން ހައްޔަރުކޮށްފި އެވެ. ނަމަވެސް، ހައްޔަރު ކޮށްފައިވާ މީހާގެ ވަނަވަރު ހާމަކޮށްފައެއް ނުވެ އެވެ.

އުމުރުން 41 އަހަރުގެ މި މީހާ އަންގާރަ ދުވަހު ހައްޔަރުކޮށްފައި ވަނީ އިނގިރޭސިވިލާތުގެ ހުޅަނގު ދެކުނުގައި އޮންނަ ގްލޮސްޓަރ ކައިރިން ކަމަށް، ލަންޑަންގެ މެޓްރޮޕޮލިޓަން ފުލުހުން ނެރުނު ބަޔާނެއްގައި ބުންޏެވެ. މި މީހާ ހައްޔަރުކޮށްފައި ވަނީ އިނގިރޭސިވިލާތުގެ 2023 ވަނަ އަހަރުގެ ނޭޝަނަލް ސެކިއުރިޓީ އެކްޓްގެ ދެ މާއްދާއަކާ ޚިލާފުވި ކަމުގެ ތުހުމަތުގަ އެވެ. މި ގޮތުން އޭނާގެ މައްޗަށް ކުރެވެނީ ބޭރުގެ ޖާސޫސީ އިދާރާއަކަށް އެހީތެރިވުމާއި، ހިމާޔަތްކޮށްފައިވާ ނުވަތަ ސިއްރު މަޢުލޫމާތު ހޯދުން ނުވަތަ ހާމަކުރުމުގެ ތުހުމަތު ކަމަށް ވެސް ފުލުހުން ބުންޏެވެ.

Advertisement

މި އޮޕަރޭޝަނުގައި ފުލުހުންގެ ކައުންޓަރ ޓެރަރިޒަމް ފައުޖުތަކުން މަސައްކަތްކޮށްފައި ވަނީ އެމެރިކާގެ މައި ސަރުކާރުގެ ތަހުގީގީ އިދާރާ (އެފްބީއައި) އަދި އެމެރިކާގެ އަސްކަރިއްޔާއާ ވަރަށް ގާތުން ގުޅިގެން ކަމަށް ފުލުހުން ބުންޏެވެ.

މިއީ "ވަރަށް މުހިންމު ހައްޔަރުކުރުމެއް އަދި ތަހުގީގެއް" ކަމަށާއި، މި މައްސަލައިގައި ކުރެވިފައިވާ ތުހުމަތުތަކަކީ "ވަރަށް ސީރިއަސް ތުހުމަތުތަކެއް ކަމަށާއި، ތަހުގީގު އަދިވެސް ވަރަށް ބާރަށް ކުރިއަށްދާ" ކަމަށް، އިނގިރޭސިވިލާތުގެ ޓެރަރިޒަމާ ދެކޮޅަށް މަސައްކަތްކުރާ ފުލުހުންގެ ސީނިއަރ ނޭޝަނަލް ކޯޑިނޭޓަރު އަދި ޑެޕިއުޓީ އެސިސްޓެންޓް ކޮމިޝަނަރު ވިކީ އެވަންސް ވިދާޅުވި އެވެ.

މިއީ، އެމެރިކާއާއި އެ ޤައުމުގެ ބައިވެރިންގެ "އެންމެ ބޮޑު ކަންބޮޑުވުން" އޮތް ޖާސޫސީ ތުހުމަތުތަކަކާ ގުޅިގެން ކުރިއަށްގެންދިޔަ "މުހިންމު އޮޕަރޭޝަނެއް" ކަމަށް، އެމެރިކާގެ އެފްބީއައިގެ ޑިރެކްޓަރު ކޭޝް ޕަޓޭލް ވިދާޅުވި އެވެ. ހަމަމިއާއެކު، "އެމެރިކާއަށް ވެފައިވާ ހުވާ އުވާލައި، އަޅުގަނޑުމެންގެ ޤައުމީ ސަލާމަތާއި ބައިވެރިންގެ ރައްކާތެރިކަމަށް ނުރައްކާވާ ފަދަ އަމަލުތައް ހިންގާ އެއްވެސް މީހަކަށް މި އެފްބީއައިއިން އެއްވެސް ދުލެއް ނުދޭނެ" ކަމަށް ވެސް ޕަޓޭލް ވިދާޅުވި އެވެ.

"މި މައްސަލައިން ދައްކުވައި ދެނީ އަޅުގަނޑުމެންގެ ބައިވެރިވުމުގެ ވަރުގަދަކަމާއި ޖާސޫސީ މަޢުލޫމާތު ހޯދުމާ ދެކޮޅަށް މަސައްކަތްކުރާ މުޖުތަމަޢުގެ ވަރުގަދަ އަޒުމު" ކަމަށް، އެމެރިކާގެ އަސްކަރިއްޔާގެ ކައުންޓަރ އިންޓެލިޖެންސް ކޮމާންޑުގެ ކޮމާންޑިންގ ޖެނެރަލް ޝޯން ސްޓިންޗަން ވިދާޅުވި އެވެ.

މި ތަހުގީގާ ގުޅިގެން ފުލުހުންގެ އޮފިސަރުން ދަނީ ގްލޮސްޓަޝަރގެ ދެ ސަރަހައްދެއް ބަލައި ފާސްކުރަމުން ކަމަށާއި، ހައްޔަރުކުރި މީހާ މިހާރު ހުރީ ލަންޑަންގެ ފުލުހުންގެ މަރުކަޒެއްގެ ބަންދުގައި ކަމަށް ފުލުހުން ބުންޏެވެ.

އެމެރިިކާ ސިފައިންގެ މީހަކު ހައްޔަރު ކުރުމަކީ ނިރުބަވެރިކަމާ ދެކޮޅަށް ހިންގާ އެހެން ތަހުގީގުތަކާ ގުޅުމެއް ހުރި ކަމެއް ނޫން ކަމަށް ފުލުހުން ބުންޏެވެ. މިއާއެކު ފުލުހުން އިޝާރާތްކުރީ، ގްލޮސްޓަރ ކައިރީގައި އޮންނަ އިނގިރޭސިވިލާތުގެ ރޯޔަލް އެއާ ފޯސް ބޭސް، އާރްއޭއެފް ފެއާފަރްޑަށް އަމާޒުކޮށް އީރާނާ ގުޅުން އޮތް ކަމަށް ތުހުމަތު ކުރެވޭ ބަޔަކު ސެޕްޓެންބަރު މަހު ރޭވި ކަމަށް ތުހުމަތުކުރެވޭ ރޭވުމަކާ މި މައްސަލައާ އެއްވެސް ގުޅުމެއް ނެތް ކަމަށެވެ. އެމެރިކާގެ ވައިގެ ސިފައިން ވެސް ހަރަކާތްތެރިވާ އެ މަރުކަޒަށް ކުރިމަތިވި އެ ނުރައްކަލަށްފަހު، މެދުއިރުމަތީގެ ހަނގުރާމައިގައި އީރާނަށް ހަމަލާދިނުމަށް ބޭނުންކުރި ބޮންއަޅާ އަސްކަރީ މަތިންދާބޯޓުތައް އެމެރިކާގެ ވައިގެ ސިފައިން ވަނީ އާރްއޭއެފް ފެއާފަރޑުން ގެންގޮސްފަ އެވެ.