އާރުޑީސީ އިން ޝަރުތު ހަމަނުވާ އެތައް ބަޔަކަށް ގަވައިދާ ޚިލާފަށް ބޮޑެތި ޕްރޮމޯޝަންތައް ދީފައިވޭ: ރިޕޯޓް
10 ނޮވެމްބަރު 2026 | އަންގާރަ 08:12އާރުޑީސީގެ އިންޓާނަލް އޮޑިޓުން ހާމަވި ގޮތުގައި، އެ ކުންފުނީގެ 67 މުވައްޒަފަކަށް ޕްރޮމޯޝަން ދީފައިވަނީ ކަނޑައެޅިފައިވާ ތައުލީމީ ގާބިލުކަމާއި ޝަރުތުތަކަށް ބެލުމެއް ނެތި ގަވައިދާ ޚިލާފަށް. މީގެ އިތުރުން އެޗްއާރް އުސޫލުތަކާ ޚިލާފަށް ބައެއް މުވައްޒަފުންގެ ގްރޭޑާއި ސްޓެޕްތައް އާދަޔާ ޚިލާފަށް ބޮޑުކޮށްފައިވާއިރު، ގިނަ މުވައްޒަފުންގެ ލިޔެކިޔުންތައް ފެންނަން ނެތްކަން ވެސް މި ރިޕޯޓުން ވަނީ ފާހަގަވެފައި
ރޯޑް ޑިވެލޮޕްމަންޓް ކޯޕަރޭޝަންގެ ކުރީގެ މެނޭޖިންގ ޑިރެކްޓަރ އިބްރާހީމް ނަޡީމް (ކ) ސަލްޓަން ޕާކުގައި | އާރްޑީސީ
ސަރުކާރުގެ ސައްތައިން ސައްތަ ހިއްސާ އޮންނަ ރޯޑް ޑިވެލޮޕްމަންޓް ކޯޕަރޭޝަން (އާރުޑީސީ) ގައި ގަވައިދާ ޚިލާފަށް ގިނަ އަދަދެއްގެ ބަޔަކަށް ބޮޑެތި ޕްރޮމޯޝަން ދީފައިވާކަން ފަޅާ އަރައިފި އެވެ.
މިކަން ހާމަވީ ކުންފުނީގެ އޮގަނައިޒޭޝަނަލް ސްޓްރަކްޗަރ ގެ ދަށުން މުވައްޒަފުންނަށް ދީފައިވާ ޕްރޮމޯޝަންތަކަކީ، 8 ޑިސެމްބަރު 2025 ގައި އެންޑޯޒްކޮށްފައިވާ އެ ކުންފުނީގެ ޖޮބް ކްލެސިފިކޭޝަން ފްރޭމްވޯކް (ޖޭ.ސީ.އެފް) އާ އެއްގޮތަށްތޯ ބެލުމަށް ހެދި އިންޓާނަލް އޮޑިޓްއިންނެވެ. އާ އޮގަނައިޒޭޝަނަލް ސްޓްރަކްޗަރގެ ދަށުން ޖުމްލަ 67 މުވައްޒަފަކަށް ވަނީ ޕްރޮމޯޝަން ދީފަ އެވެ. މި ރިވިއުއިން ފާހަގަވި ގޮތުގައި، ބައެއް މުވައްޒަފުންނަށް ޕްރޮމޯޝަން ދީފައިވަނީ ޖޭ.ސީ.އެފް ގައި ބަޔާންކޮށްފައިވާ ތައުލީމީ ގާބިލުކަމާއި ޝަރުތުތައް ހަމަނުވާ މަގާމުތަކަށެވެ. މިގޮތަށް ފާހަގަކުރެވުނު މުވައްޒަފުންގެ ތަފްސީލު ތިރީގައި އެވަނީއެވެ.
މީގެ އިތުރުން، ބައެއް މުވައްޒަފުންގެ ކަމާގުޅޭ ލިޔެކިޔުންތައް ފެންނަން ނެތުމުގެ ސަބަބުން، އެ މުވައްޒަފުންނަށް އަލަށް ދީފައިވާ މަގާމުތަކަށް އެ ފަރާތްތަކުގެ ޝަރުތު ހަމަވޭތޯ ކަނޑައެޅުމަށް ވަނީ ހުރަސްތަކެއް ކުރިމަތިވެފައި ކަމަށް ވެސް ރިޕޯޓުގައިވެ އެވެ. އެ މުވައްޒަފުންގެ ތަފްސީލުވެސް ރިޕޯޓުގައިވަނީ ހިމަނާފަ އެވެ.
ކުންފުނީގެ އެޗް.އާރް ޕޮލިސީގެ ބަޔާންކޮށްފައިވާ ގޮތުން، މުވައްޒަފަކަށް ޕްރޮމޯޝަން ދޭއިރު އެންމެ ގިނަވެގެން ކުރިއަށް ޖެއްސޭނީ 5 ގްރޭޑް ނުވަތަ ސްޓެޕެވެ. ނަމަވެސް، ރިވިއު ކުރި މުއްދަތުގައި ޕްރޮމޯޝަން ދިންއިރު ސްޓެޕްތައް އިތުރުކޮށްފައިވާ ގޮތް ސެލަރީ ސްޓްރަކްޗަރއާ އަޅާކިޔައި ބެލިއިރު، ސާމްޕަލްގެ ގޮތުގައި ބެލި 22 މުވައްޒަފުންގެ ތެރެއިން 9 މުވައްޒަފަކަށް 5 ސްޓެޕަށްވުރެ ގިނައިން ޕްރޮމޯޝަންގައި ދީފައިވާކަން ވަނީ ފާހަގަކުރެވިފަ އެވެ. މިގޮތަށް ފާހަގަވި މުވައްޒަފުންނާއި، ޕްރޮމޯޝަންގައި އެ މުވައްޒަފުންނަށް އިތުރުކޮށްދީފައިވާ ސްޓެޕްތަކުގެ އަދަދުތައް ވެސް ރިޕޯޓުގައިވަނީ ހިމަނާފަ އެވެ.
ހަމައެއާއެކު، އޮގަނައިޒޭޝަނަލް ސްޓްރަކްޗަރަށް ގެނައި ބަދަލުތަކާ ގުޅިގެން ދީފައިވާ ޕްރޮމޯޝަންތައްވެސް ވަނީ ރިވިއުކޮށްފަ އެވެ. މި ރިވިއުއިން ފާހަގަވި ގޮތުގައި، ބައެއް މުވައްޒަފުންނަށް ޕްރޮމޯޝަން ދިންއިރު ގްރޭޑް ނުވަތަ ސްޓެޕްތަކަށް ވަނީ ބޮޑު ކުރިއެރުމެއް ދީފަ އެވެ.
ރައީސް މުއިއްޒުގެ ސަރުކާރުގެ ތެރޭގައި ކަރަޕްޝަނާއި ޚިޔާނާތް އިއްތިހާ އަށް އާންމުވެފައިވީ ނަމަވެސް އެކަންކަން ބަލައި ފިޔަވަޅު އެޅުމުގައި ކަމާބެހޭ މުއައްސަސާތައް ނުކުޅެދިފައިވާކަން ގިނަ ބަޔަކު އަންނަނީ ފާހަގަ ކުރަމުންނެވެ.
