މަހިބަދޫ ފެނަކަ ބްރާންޗުގައި މަސައްކަތް ކުރަމުންދިޔަ 11 މުވައްޒަފަކު އެއްވެސް އިންޒާރެއް ދިނުމަކާ ނުލައި ވަޒީފާއިން ވަކިކޮށްފި
9 ނޮވެމްބަރު 2026 | ހޯމަ 08:19އދ. މަހިބަދޫ ފެނަކަ ބްރާންޗުގެ މުވައްޒަފުންތަކެއް ވަޒީފާއިން ވަކިކުރުމާ ގުޅިގެން، އެ ރަށު ކައުންސިލާއި ކުރީގެ ނައިބު ރައީސް ފައިސަލް ނަސީމް ވަނީ ކަންބޮޑުވުން ފާޅުކުރައްވާފައި. އަދި ކައުންސިލުން ވަނީ ގާނޫނާ އެއްގޮތަށް އަމަލުކޮށް އެ މުވައްޒަފުންގެ ވަޒީފާ އިއާދަކޮށްދިނުމަށް ގޮވާލާފައި، މީގެ އިތުރުން ސިޔާސީ ފިކުރަށް ބަލައި މުވައްޒަފުން ނިކަމެތި ނުކުރުމަށާއި މަސައްކަތްތެރިންގެ ހައްގުތަކަށް އިހުތިރާމް ކުރުމަށް ފައިސަލް އިލްތިމާސްކުރެއްވި
އދ. މަހިބަދޫ | ޓްވިޓަރ
އދ. މަހިބަދޫ ފެނަކަ ބްރާންޗުގައި މަސައްކަތް ކުރަމުންދިޔަ 11 މުވައްޒަފަކު އެއްވެސް އިންޒާރެއް ދިނުމަކާ ނުލައި ވަޒީފާއިން ވަކިކޮށްފި އެވެ.
މި ނިންމުމާ ގުޅިގެން މަހިބަދޫ ކައުންސިލުންނާއި ކުރީގެ ނައިބު ރައީސް ފައިސަލް ނަސީމް ވަނީ ކަންބޮޑުވުން ފާޅުކުރައްވާފަ އެވެ.
މަހިބަދޫ ކައުންސިލުން ނެރުނު ބަޔާނެއްގައި ބުނީ، އެއްވެސް އިންޒާރެއް ދިނުމަކާ ނުލައި އެ މުވައްޒަފުން ވަޒީފާއިން ވަކިކުރަން ނިންމި ނިންމުމަކީ ކައުންސިލުން އިންތިހާއަށް ކަންބޮޑުވާ އަދި ހިތާމަކުރާ ކަމެއް ކަމަށެވެ. އަދި ކުއްލި ގޮތަކަށް ރައްޔިތުންތަކެއްގެ ވަޒީފާ ގެއްލިގެން ދިޔުމަކީ އެ މުވައްޒަފުންނާއި އެ މީހުންގެ އާއިލާތަކުގެ ދިރިއުޅުމަށް ނުހަނު ބޮޑެތި ދަތިތަކާއި ހީނަރުކަން ކުރިމަތިވާނޭ ކަމެއް ކަމަށް ވެސް ކައުންސިލުން ފާހަގަކުރި އެވެ.
މިފަދަ ފިޔަވަޅުތައް އެޅުމުގައި ރާއްޖޭގައި އަމަލުކުރަމުންދާ ވަޒީފާއާ ބެހޭ ގާނޫނާއި މުވައްޒަފުންނާ ބެހޭ ގަވާއިދުތަކުގައިވާ ގޮތުގެ މަތިން އިންސާފުވެރިކަމާއެކު އަމަލުކުރުމަށް ކައުންސިލުން ވަނީ ގޮވާލާފަ އެވެ. މީގެ އިތުރުން، ވަޒީފާއިން ވަކިކުރި މުވައްޒަފުންގެ ވަޒީފާ އަލުން އަނބުރާ އިއާދަކޮށްދިނުމަށް ވެސް ކަމާބެހޭ އެންމެހައި ފަރާތްތަކަށް ކައުންސިލުން ވަނީ އިލްތިމާސްކޮށްފަ އެވެ.
މި މައްސަލައާ ގުޅިގެން ކުރީގެ ނައިބު ރައީސް ފައިސަލް ނަސީމް އެކްސްގައި ކުރެއްވި ޕޯސްޓެއްގައި ވިދާޅުވީ، ވަޒީފާއާ ބެހޭ ގާނޫނުގައި މަސައްކަތްތެރިންގެ ހައްގުތައް ބަޔާންކޮށް، އެ ހައްގުތައް ހިމާޔަތް ކުރާނެ ގޮތްތައް ވަރަށް ރަނގަޅަށް ބަޔާންކޮށްފައިވާ ކަމަށެވެ. އަދި ސަރުކާރު ހިއްސާވާ ކުންފުނިތަކުގެ ހިންގުމަށް ބަދަލުތަކެއް ގެނައި ނަމަވެސް، މުވައްޒަފަކު ވަޒީފާއިން ވަކިކުރާ ނަމަ އެކަން ކުރަންވާނީ ގަވާއިދުތަކާ އެއްގޮތަށް، އެ މުވައްޒަފަކަށް ލިބިދޭންޖެހޭ އެންމެހައި ހައްގުތައް ކަށަވަރުވާ ގޮތަށް ކަމަށް އެމަނިކުފާނު ވިދާޅުވި އެވެ.
މީގެ އިތުރުން ފައިސަލް ވިދާޅުވީ، ވަކިން ޚާއްސަކޮށް ސިޔާސީ ގޮތުން ވަކި ފިކުރަކަށް ނިސްބަތްވީތީ މުވައްޒަފެއްގެ ހައްގުތައް ގެއްލުވާލައި، ނިކަމެތިކަން ލިބޭ ގޮތަށް އެއްވެސް ކަމެއް ކޮށްގެން ނުވާނެ ކަމަށެވެ. އަދި ވަޒީފާ އަދާކުރާ ފަރާތްތަކަށް ގާނޫނުން ލިބިދީފައި އޮންނަ ރައްކާތެރިކަން ގަބޫލުކޮށް، އެކަމަށް އިހުތިރާމް ކުރަން ޖެހޭނެ ކަމަށް ވެސް ފައިސަލް ވިދާޅުވި އެވެ.
