މެންބަރު މުހައްމަދު އިސްމާއިލް ދިން އިންޒާރު ފުލުހުން ބަލަންޖެހޭނެ: ގުޅިފައިވާ ސިޔާސީ ޕާޓީތައް
ޕާޓީއެއް ނައްތާލުމަށް ގޮވާލި ގޮވާލުމަކީ ވަރަށް ބިރުވެރި ވާހަކައެއް
މަޑުއްވަރީ ދާއިރާގެ މެންބަރު މުހައްމަދު އަމީތު
އެމްޑީޕީގެ މެންބަރުން ނައްތާލާނެ ކަމަށް ވިދާޅުވެ ހޯރަފުށީ ދާއިރާގެ މެންބަރު މުހައްމަދު އިސްމާއިލް ދެއްވި އިންޒާރު ފުލުހުން ބަލަންޖެހޭނެ ކަމަށް ގުޅިފައިވާ ސިޔާސީ ޕާޓީތަކުން ބުނެފިއެވެ.
ކުނޫޒްގައި އަންގާރަ ދުވަހު ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން މަޑުއްވަރީ ދާއިރާގެ މެންބަރު މުހައްމަދު އަމީތު ވިދާޅުވީ، ޕިޕީއެމް ކޯލިޝަން ޕާޓުނަރު އެމްޑީއޭގެ މަޖިލިސް މެންބަރު މުހައްމަދު އިސްމާއިލް ޕާޓީއެއް ނައްތާލުމަށް ގޮވާލި ގޮވާލުމަކީ ވަރަށް ބިރުވެރި ވާހަކައެއް ކަމަށާއި، އޭނާގެ އެ ވާހަކައަކީ ޓެރެރިޒަމަށް ހިތްވަރު ލިބެ ފަދަ ވާހަކައެއް ކަމަށެވެ.
އަމީތު ވިދާޅުވީ، ރައްޔިތުންގެ މަޖިލީހުގެ ފްލޯގައި ދިވެހި ރައްޔިތުންތަކެއް ނައްތާލާ ނިޒާމުން ގެއްލުވާލާ ވާހަކަ މެންބަރަކު ގޮވާލުމުން ވެސް ދައުލަތުގެ އެއްވެސް މުއައްސަސާތަކަށް ކަމެއް ހިނގިކަން ވެސް ނޭނގޭ ކަމަށް ހަދައިގެން ތިބުމުން ވަރަށް ކަންބޮޑުވެވަޑައިގަންނަވާ ކަމަށެވެ. އަދި އެކަން އެންމެ ހަރުކަށިކޮށް ކުށްވެރިކޮށް އެ މައްސަލަ ވީ އެންމެ އަވަހަށް ދައުލަތުގެ މުއައްސަސާތަކުން ބެލުމަށް އޭނާ ވަނީ ގޮވާލައްވާފައެވެ.
"ރައްޔިތުންގެ މަޖިލީހުގެ ފްލޯގައި ވެސް ގާނޫނި އިމުން ބޭރުން އެފަދަ ވާހަކައެއް ނުދެއްކޭނެ، މި މައްސަލަ ބެލޭނެ. ބެލެން ޖެހޭނެ" އަމީތު ވިދާޅުވިއެވެ.
ރާއްޖޭގެ އެންމެބޮޑު ކޮރަޕްޝަނާއި ގުޅުން އޮތް، އަދި ފައިސާގޯނި ބަހަން ހިފައިގެންދިޔަކަމަށް އެއްބަސްވެވަޑައިގެން ހުންނަވާ އެފަދަ ވާހައެއް ދެއްކުމުން ވެސް އެނާއާ މެދު ފިޔަވަޅު ނާޅައި، އެހެންބޭފުޅުންނާ މެދު ކޮރަޕްޝަންގެ ތުހުމަތުކޮށް ތަހުގީގު ހިންގާއިރު، އަމިއްލައަށް އެއްބަސްވެވަޑައިގެން ހުންނެވި ބޭފުޅާ ހައްޔަރުނުކުރެވެންވީ ކީއްވެތޯ އަމީތު ވަނީ ސުވާލު އުފައްދަވާފައެވެ.
ގައުމީ ސަލާމަތަށް ނުރައްކާވާޒާތުގެ ވާހަކައެއް ބްރޯޑްކާސްޓްކުރި ކަމަށް ބުނެ، ރާއްޖެޓީވި ފަސްލައްކަ ރުފިޔާއިން ޖޫރިމަނާ ކުރިކުރުން ކުށްވެރިކޮށް، މީޑިއާތަކުގެ ބެލެނިވެރި ފަރާތުގެ ގޮތުގައި އޮވެ، އެ ކޮމިޝަނުން ރާއްޖެޓީވީއާ މެދު އަމަލުކުރަނީ ވަރަށް ބޭ އިންސާފުންކަމަށް އަމީތު ވިދާޅުވިއެވެ.
ރާއްޖެޓީވީ ތިންވަނަ ފަހަރަށް ޖޫރިމަނާކުރިއިރު، މިފަހަރު ޖޫރިމަނާ ކުރީ ގައުމީ ސަލާމަަތަށް ނުރައްކާވާ ކޮންޓެއްޓެއް ކަމަށް ބުނެ ކަމަށްވާއިރު، އެއީ ގައުމީ ސަލާމަތާއި ގުޅުން ހުރިކަމަކަށްވާ ނަމަ ގައުމީ ސަލާމަތީ ބާރުތަކުން އެކަންކަން ތަހުގީގު ނުކޮށް ބްރޯޑްކޮމްއިން އެކަން ބަލާ ފިޔަވަޅުއަޅަންޖެހުނީ ކީއްވެތޯ އަމީތު ވަނީ ސުވާލުއުފައްދަވާފައެވެ.
"ގައުމީ ސަލާމަތަށް ނުރައްކާވާ ކަމަށް މި ނިންމަނީ ބްރޯޑްކާސްޓިންގ ކޮމިޝަނުގައި ތިބި ސިޔާސީ ބަޔަކު. ގައުމީ ސަލާމަތަށް ނުރައްކާވާކަން ހަމައެކަނި މި އެނގިވަޑައިގަންނަވަނީ އެބޭފުޅުންނަށް،" އަމީތު ވިދާޅުވިއެެވެ.
ކުނޫޒްގައި ވާހަކަ ދައްކަވަމުން އަމީތުވަނީ މޭޑޭ މުޒާހަރާގައި ޖަލަށް ހުކުމްކޮށްފައި ހުއްޓާ ބަލިވެގެން އައިޖީއެމްއެޗްގައި ފަރުވާ ދެމުން ދަނިކޮށް ނިޔާވި، އަބްދުލްރަޝީދު މަރުވުމުގައި ތުހުމަތުކުރެވޭ ކަންތައްތަކެއް ހުރިކަމަށް އާއިލާއަށް ގަބޫލްކުރެވޭތީ އެކަން ބަލައިދިނުމަށް ޑީޕީއާރުއެސް އާއި، ހިއުމަންރައިޓްސް އަދި ފުލުހުންނަށް ވެސް ގޮވާލާފައެވެ.
އަމީތު ވިދާޅުވީ މިއީ ދައުލަތެއް ނަމަވެސް ދައުލަތެއްގެ ސިފަ މިއަދު ނުފެންނަ ކަމަށެވެ. އެހްނނަމަވެސް މި މައްސަލަތައް ބެލޭނެ ދުވަހެއް އަންނާނެ ކަމަށާއި، އެދުވަހަކުން ބޭއިންސާފުން ކަންކަންކުރި ހުރިހާ ފަރާތްތައް ވެސް ޖެހޭނީ އިންސާފުގެ ކުރިމައްޗަށް އަންނަން ކަމަށް އަމީތު ވިދާޅުވިއެވެ.
