ބްރެޒިލްގެ މަރިންގާއަށް ބާރުގަދަ ތޫފާނެއް އަރައި ބޮޑެތި ގެއްލުންތަކެއް ލިބިއްޖެ

ބްރެޒިލްގެ ދެކުނުގައި އޮންނަ މަރިންގާއަށް ހޯމަ ދުވަހުގެ ފަތިހުގެ ވަގުތެއްގައި އެރި ބާރުގަދަ ތޫފާނެއްގައި ގަސްތަކާއި ކަރަންޓު ދަނޑިތައް ވެއްޓި، މަގުތަކުގެ ދަތުރުފަތުރަށް ބޮޑެތި ހުރަސްތަކެއް އެޅި، އެތައް ހާސް ތަނަކުން ކަރަންޓުގެ ޚިދުމަތް ކެނޑިއްޖެ އެވެ.

ޕަރަނާ ސްޓޭޓުގެ އެންވަޔަރަންމަންޓަލް ޓެކްނޮލޮޖީ އެންޑް މޮނިޓަރިންގ ސިސްޓަމްއިން (ސިމެޕާރ) ހާމަކުރި ތަފާސްހިސާބުތަކަށް ބަލާއިރު، ބްރެޒިލް ގަޑިން ދަންވަރު 12:00 އިން ހެނދުނު 6:15 އާ ދެމެދު އެ ސަރަހައްދަށް ވަނީ 39.8 މިލިމީޓަރުގެ ވާރޭ ވެހިފަ އެވެ. އަދި، ވިލާގަނޑުގައި ވައިގެ ބާރުމިން ގަޑިއަކު 81 ކިލޯމީޓަރަށް އެރި ކަމަށް ވެސް އެ އިދާރާއިން ބުންޏެވެ.

Advertisement

ޕަރަނާގެ ހަކަތައާ ބެހޭ ކުންފުނި ކަމަށްވާ ކޮޕެލްއިން ބުނީ، ހޯމަ ދުވަހުގެ ހެނދުނު އެކަނި ވެސް ކަރަންޓު ބޭނުންކުރާ 82،200 އަށްވުރެ ގިނަ ގޭބީސީން ކަރަންޓުގެ ޚިދުމަތް މެދުކެނޑިފައިވާ ކަމަށެވެ. މިއީ، މަރިންގާގެ ޚިދުމަތް ލިބޭ ތަންތަނުގެ ގާތްގަނޑަކަށް %34 އެވެ.

މި ތޫފާނުގައި ޖެހެމުންދިޔަ ބާރު ވަޔާއެކު ބިންދައިގެން ދިޔަ ގަސްތައް ވެއްޓި މަގުތައް ބަންދުވެ، ޕާކުކޮށްފައި ހުރި އެތައް އުޅަނދަކަށް ބޮޑެތި ގެއްލުންތަކެއް ލިބުނު އިރު، ފައްޅިއެއްގެ ފާރުގައި ވެސް ގަހެއް ޖެހި ބޮޑެތި ގެއްލުންތަކެއް ލިބުނެވެ. މީގެ އިތުރުން، އިމާރާތްތަކަށާއި ފުރާޅުތަކުގެ އިތުރުން ޓްރެފިކް ބައްތިތަކަށާއި ޕެޓްރޯލް ޝެޑަކަށް ވެސް ބޮޑެތި ގެއްލުންތަކެއް ލިބިފައިވާ އިރު، މި ކާރިސާގައި އެ ސިޓީގެ ފަޔަރ ޑިޕާޓްމަންޓުގެ މައި އިދާރާގެ އިމާރާތަށް ވެސް ވަނީ އެކިވަރުގެ ގެއްލުންތައް ވެފަ އެވެ.

މި ހާދިސާއާ ގުޅިގެން ކުއްލި އެހީތެރިކަން ފޯރުކޮށްދިނުން އަވަސްކުރުމަށާއި، ގެއްލުން ލިބުނު ފަރާތްތަކަށް އަވަސް ފިޔަވަޅުތަކެއް އެޅުމަށް ޓަކައި، މަރިންގާގެ މޭޔަރު ސިލްވިއޯ ބާރޮސް ވަނީ އާންމު ކާރިސާގެ ހާލަތު އިޢުލާނުކުރައްވާފަ އެވެ.

ވެއްޓިފައިވާ ގަސްތައް ނަގައި މަގުތައް އަލުން ހުޅުވުމަށާއި ލިބިފައިވާ ގެއްލުންތައް ދެނެގަތުމަށް ޓަކައި މުނިސިޕަލް އިންފްރާސްޓްރަކްޗަރ އަދި އަރބަން މެއިންޓެނަންސް ޓީމުތަކާއި ސިވިލް ޑިފެންސްގެ ފައުޖުތައް މިހާރު ދަނީ ހަރަކާތްތެރިވަމުންނެވެ. ހަމަމިއާއެކު، ކަރަންޓު ޝޮކެއް ޖެހިދާނެ ކަމުގެ ނުރައްކާ އޮތުމުން، ވެއްޓިފައިވާ ގަސްތަކާއި ހަލާކުވެފައިވާ ކަރަންޓު ނަރުތަކާ ކައިރިނުވުމަށް ކަމާބެހޭ އިދާރާތަކުން ވަނީ ރައްޔިތުންނަށް އިލްތިމާސްކޮށްފަ އެވެ.

މި ތޫފާނުގެ އަސަރު ޕަރަނާ ސްޓޭޓުގެ އެހެން މުނިސިޕަލްޓީތަކަށް ވެސް ފޯރައި، ގިނަ އަދަދެއްގެ ގެދޮރަށް ގެއްލުންވެ ކަރަންޓުގެ ޚިދުމަތް ވަނީ މެދުކެނޑިފަ އެވެ. ސަރަހައްދީ އިދާރާތަކުން މިހާރު ވެސް ދަނީ ގެއްލުންތަކުގެ ތަފުސީލުތައް އެއްކޮށް، ހާލަތު އާންމުކުރުމުގެ މަސައްކަތްތައް ވިލަރެސްކުރަމުންނެވެ.