މުދާ އުފުލާ ރޮބޮޓަކަށް ހުރަސްއެޅި އެމެރިކާގެ ކޮލެޖް ޕްރޮފެސަރަކު ހައްޔަރުކޮށްފި
2 ނޮވެމްބަރު 2026 | ހޯމަ 09:48އޫބަރ އީޓްސްގެ މުދާ އުފުލާ ރޮބޮޓްތަކުގެ ސަބަބުން އަމިއްލަ މިނިވަންކަމަށް އުނިކަން އަންނަކަމަށް ބުނެ، އެ ތަކެތީގެ މަގަށް ހުރަސްއެޅި ރިޓަޔަރޑް ޕްރޮފެސަރަކު އެމެރިކާގެ ފުލުހުން ހައްޔަރުކޮށްފި. ޕެންސިލްވޭނިއާގެ ގާނޫނު ބުނާގޮތުން މިފަދަ ރޮބޮޓްތަކަކީ މަގު ހިނގާ މީހުންގެ ދަރަޖަ ލިބިގެންވާ ތަކެތި ކަމުން، އޭނާގެ މައްޗަށް ވަނީ އާންމު މަސްލަހަތު ގެއްލުވާލިކަމުގެ ދައުވާ އުފުލާފައި
އެމެރިކާގެ ފިލަޑެލްފިއާގެ ދުވާރެއްގެ މަތިން ދަތުރުކުރި އޫބަރ އީޓްސްގެ މުދާ އުފުލާ ރޮބޮޓެއްގެ ކުރިމަތީގައި، ޔުނިވަރސިޓީ އޮފް ޕެންސިލްވޭނިއާގެ ރިޓަޔަރޑް ޕްރޮފެސަރެއް ކަމަށްވާ ކެރޮލިން މާވިން ހުރަސްއަޅައި ހުއްޓުވަނީ | ސީއެންއެން
އެމެރިކާގެ ފިލަޑެލްފިއާގައި އަމިއްލައަށް ދަތުރުކުރާ މުދާ އުފުލާ ރޮބޮޓަކަށް ގަސްދުގައި ހުރަސްއަޅައި މަގު ބަންދުކުރި ކަމުގެ ތުހުމަތުގައި، އުމުރުން 78 އަހަރުގެ ރިޓަޔަރޑް ކޮލެޖް ޕްރޮފެސަރަކު ފުލުހުން ހައްޔަރުކޮށްފި އެވެ.
ސީއެންއެން އިން ރިޕޯޓްކޮށްފައިވާ ގޮތުގައި، މި ހާދިސާގައި ހައްޔަރުކޮށްފައިވަނީ ޔުނިވަރސިޓީ އޮފް ޕެންސިލްވޭނިއާގެ ކޮމިއުނިކޭޝަންސް ޕްރޮފެސަރެއް ކަމަށްވާ ކެރޮލިން މާވިން އެވެ. އޭނާ ހައްޔަރުކޮށްފައިވަނީ މަގުމަތިން ދަތުރުކުރި "އޫބަރ އީޓްސް" ގެ މުދާ އުފުލާ ރޮބޮޓެއްގެ ކުރިމަތީގައި ހުރަސްއަޅައި ހުއްޓި ހުރުމުގެ ސަބަބުން، އާންމު މަސްލަހަތު ގެއްލުވާލި ކަމުގެ ތުހުމަތުގަ އެވެ. މި ހާދިސާއާ ގުޅިގެން ފުލުހުން އެ ސަރަހައްދަށް ގޮސް އޭނާ ދުރުވުމަށް އެންގުމުން ވެސް އެކަމަށް އަމަލުކޮށްފައެއް ނުވެ އެވެ.
މިކަމާ ގުޅޭގޮތުން މާވިން މީޑިއާއަށް ބުނެފައިވަނީ، އާންމު ހަމަޖެހުމާއި، ވަޒީފާގެ ބާޒާރަށް ކުރާނެ ނޭދެވޭ އަސަރުތަކާއި، އަދި ރޮބޮޓްތަކުގައި ހުންނަ ކެމެރާތަކުގެ ސަބަބުން އަމިއްލަ މިނިވަންކަމަށް އޮތް ނުރައްކަލާ މެދު ކަންބޮޑުވުން ފާޅުކުރުމުގެ ގޮތުން އޭނާ މަސްތަކެއް ވަންދެން ގަސްދުގައި މި ރޮބޮޓްތައް ހުއްޓުވަމުންދާ ކަމަށެވެ. އަދި އިންސާނުންގެ ހައްގުތައް މެޝިންތަކަށްވުރެ ބޮޑުވާންޖެހޭނެ ކަމަށް ގަބޫލުކުރާ ކަމަށްވެސް އޭނާ ބުންޏެވެ.
ނަމަވެސް، ޕެންސިލްވޭނިއާގެ 2020 ވަނަ އަހަރުގެ ގާނޫނެއްގެ ދަށުން، އަމިއްލައަށް ދަތުރުކުރާ މިފަދަ މެޝިންތަކަކީ "މަގު ހިނގާ މީހުން" (ޕެޑެސްޓްރިއަނުން) ގެ ގޮތުގައި ވަނީ ކަނޑައަޅާފަ އެވެ. އެހެންކަމުން، ގާނޫނީ ގޮތުން މަގު ހިނގާ މީހުންނަށް ލިބިދޭ ގިނަ ހައްގުތަކާއި މަސްއޫލިއްޔަތުތައް މި ރޮބޮޓްތަކަށް ވެސް ލިބިގެންވެ އެވެ.
ފުލުހުންގެ ބެލުމުގެ ދަށަށް ގެންދިއުމަށްފަހު، ކޯޓަށް ހާޒިރުވުމުގެ އަމުރެއް ނެރެ މާވިން މިހާރު ދޫކޮށްލާފައިވީ ނަމަވެސް، މިފަދަ ރޮބޮޓްތަކާ ދެކޮޅަށް ކުރަމުންދާ އިހުތިޖާޖު ހުއްޓާނުލާނެ ކަމަށް އޭނާ ވަނީ ހާމަކޮށްފަ އެވެ.
