ޗައިނާއިން "އެޗް-1": ފަހަރެއްގައިވެސް ވައިރަހެއް ނޫން!

ޝަޢުޤުވެރިކަމެއް އޮވެގެން ދިރިއުޅުމުގެ މައިދާނުގައި ކުރިއަށްދާ ކޮންމެ މީހަކަށްވެސް ކާމިޔާބު ލިބުން އޮތީ މާ ދުރުގައި ނޫން ކަން ސާބިތު ކޮށްދެމުންދާ އެކަކީ ޗައިނާގެ ޒުވާން ޑިޒައިނަރ ވޯންގް ޝިންގްޝިންގްއެވެ. ޢުމުރުން ވަރަށް ޅަ އިރު އަމިއްލަ ޓެކް-ކުންފުންޏެއް އުފައްދައިގެން އެ މަސައްކަތުގައި ހީވަގި ކަމާއެކު ދުވަސްތައް ހޭދަ ކުރަމުން ދާ ވޯންގް މިހާރު ވަނީ، އިންސާނެއްގެ ޝަޚްސު އަސްލަކަށް ބަލައިގެން އޭނާ އުފެއްދި (ހިއުމަނޮއިޑް) ރޮބޮޓް ފައްކާކޮށް ނިންމާލުމާ އިންތިހާ ގާތަށް ޖެހިލާފައެވެ.

ވޯންގް އުފެއްދި ރޮބޮޓް މިހާރު ވަނީ، އިންސާނުންކޮށް އުޅޭ ބައެއް ކަންކަން، ކާމިޔާބު ކަމާއެކު ނަކަލު ކުރަންވެސް ފަށާފައެވެ.

ވޯންގްއަކީ ޗައިނާގެ އިރުމަތީ ޝީޖިއާންގް ޕްރޮވިންސްގައި ހިންގާ ޓެކް-ކުންފުންޏެއްގެ ސީއީއޯއެވެ. ވޯންގްގެ ރޮބޮޓަށް އޭނާ ދީފައި ވާ ނަމަކީ "އެޗް-1" އެވެ. އިސްކޮޅުގައި 1.8 މީޓަރު އަދި ބަރުދަނުގައި 47 ކިލޯ ހުންނަ އެޗް-1 އަކީ ތަސައްރަފު ފުދިފައި ހުރި އިންސާނަކު ހިނގާބިނގާވެ އުޅޭ ދުވެލީގައި އެކަން ކުރަން ދަސްކޮށްފައި ވާ ރޮބޮޓެކެވެ.

އެޗް-1ގެ ހުނަރުތައް ފައްކާ ކުރަނީ އަރޓިފިޝަލް އިންޓެލިޖެންސް (އޭއައި) ނުވަތަ މަސްނޫޢީ ތޫނުފިލިކަމުގެ ޓެކްނޮލޮޖީ ބޭނުން ކޮށްގެންނެވެ. މިހާރުވެސް އެޗް-1 ދަނީ އައު ހުނަރުތައް ދަސް ކުރަމުންނެވެ. އަދި އެޗް-1އަކީ ފިސާރި އަވަހަށް ކަންކަން ދަސްކުރާ ރޮބޮޓެއްކަންވެސް އެޗް-1 ދަނީ ސާބިތު ކޮށްދެމުންނެވެ.

މިހާ ހިސާބަށް އެޗް-1 ގެނައުމަށް ވޯންގްއާއި އޭނާގެ ޓީމުން މާ ގިނަ ދުވަހެއްވެސް ހޭދަ ކޮށްފައެއް ނުވެއެވެ. އެ މަސައްކަތުގައި ވޯންގްއާއި އޭނާ ޓީމުން ހޭދަ ކުރީ އެންމެ ހައެއްކަ މަސް ދުވަހެވެ. ވޯންގް އަދިވެސް ޢަމާޒު ހިފާފައި ހުރީ އެޗް-1ގެ ހުނަރުތައް 'އަޕްގްރޭޑް' ކުރުމަށެވެ. އެޗް-1އަށް ލިބިފައި ވާ ހުނަރުތަކާއި ޤާބިލުކަން އިތުރުކޮށް، ހުރި ހުނަރުތައް އިތުރަށް ފައްކާ ކޮށް، މީހުންގެ ދިރިއުޅުމުގައި މުހިންމު ބޭނުންތަކެއް ހިފިދާނެ ރޮބޮޓަކަށް އެޗް-1 ހެދުމަކީ ވޯންގްގެ އުންމީދެކެވެ.

ރޮބޮޓް ފަރުމާކޮށް އުފެއްދުމަކީ ވޯންގްއަށް އައު މަސައްކަތެއް ނޫނެވެ. ވޯންގް އެންމެ ފުރަތަމަ ރޮބޮޓެއް އުފައްދަން މަސައްކަތް ފެށީ 2013 ވަނަ އަހަރުއެވެ. އޭރު އޭނާގެ ޔުނިވަރސިޓީ ތަޢުލީމުވެސް ނުނިމެއެވެ. ވޯންގް އެންމެ ފުރަތަމަ މަސައްކަތް ފެށީ 4 ފައި-ލީ ރޮބޮޓެއް އުފައްދާށެވެ. އެ ރޮބޮޓަށް އޭނާ ދިން ނަމަކީ "އެކްސްޑޯގް"އެވެ. ރޮބޮޓްގެ ޓެސްޓު ވީޑީއޯތައް ހިއްސާ ކުރަމުން ދިޔަ ވަރަކަށް، ޢާންމުންގެ ފަރާތުން ވޯންގްއަށް ދެމުން ދިޔަ ތަރުޙީބުވެސް ދިޔައީ އިތުރު ވަމުންނެވެ. އެކި ދިމާލުން އޭނާއަށް މާލީ އެހީތައް ލިބެން ފެށިއެވެ. އެ އެހީގެ ބޭނުން ހިފައިގެން ވޯންގް، އޭނާގެ އަމިއްލަ ޓެކް-ކުންފުންޏެއް އުފެއްދީ 2016 ވަނަ އަހަރުއެވެ.

އޭނާއަށް ލިބިފައިވާ ޢިލްމާއި ތަޖުރިބާތަކުގެ ބޭނުން ހިފައިގެން ވޯންގް ދިޔައީ އައު ނިޒާމުތައް އީޖާދުކޮށް، އުފެއްދުމުގެ މަސައްކަތް ކުރަމުންނެވެ. އަދި އޭނާގެ ފުރަތަމަ ޕްރޮޑަކްޓްގެ ގޮތުގައި 4 ފައި-ލީ ރޮބޮޓް ތަޢާރަފު ކުރީ 2017 ވަނަ އަހަރުގެ ތެރޭގައެވެ.

އޭގެ ފަހުންވެސް ވޯންގްގެ ކުންފުނިން ދަނީ އެއް އުފެއްދުމަށް ވުރެ ފުރިހަމަ އިތުރު އެހެން އުފެއްދުމެއް ސިލްސިލާ ގޮތެއްގައި ތަޢާރަފު ކުރަމުންނެވެ. ރޮބޮޓް ކުއްތާއަކުން ފެށި މަސައްކަތް، އިންސާނީ ޝަޚްސު ރަމްޒުކޮށްދޭ ހިއުމަނޮއިޑް ރޮބޮޓަކާ ހިސާބަށް ގެންގޮސް ކާމިޔާބު ކުރިއެވެ. އެތައް ޒުވާނުންނަކަށް މިސާލު ދައްކައިދެމުންނެވެ.

ވޯންގްއަކީ ގަދަ ހިތްވަރާއި ޢަޒުމާއެކު މަސައްކަތެއްގައި ސާބިތުކަމާއި، ޝަޢުޤާ އެކީ ދެމިހުރެއްޖެނަމަ ކާމިޔާބު ލިބޭނެ ކަމުގެ ލާމަސީލު މިސާލެކެވެ. ޓެކްނޮލޮޖީގެ ދުނިޔެއަކީ އިންތިހާ ހަލުވި ދުވެލީގައި ބަދަލުވެ ކުރިއަރަމުން އަންނަ ދުނިޔެއަކަށް ވާ އިރު، އެ މައިދާނުގައި ސާބިތު ކަމާއެކު ކުރިއަށް ދިއުމަށްޓަކައި ޚުދު އަމިއްލަ މީހާވެސް މަސައްކަތްތަކެއް ކުރަން ޖެހޭނެ ކަން ވޯންގް ދަނީ ޢަމަލުންވެސް ދައްކައިދެމުންނެވެ.