އުތުރު ކޮރެޔާގެ އަސްކަރީ ގާބިލުކަން ދައްކާލަން ސަބްމެރީނަކުން އާ މިސައިލް ޓެސްޓުތަކެއް ފަށައިފި
15 އޮކްޓޯބަރު 2026 | ބުރާސްފަތި 09:10ދެކުނު ކޮރެޔާގެ ސިފައިންނަށް އަމާޒުކޮށް ދިން މައިން ހަމަލާއަކާ ގުޅިގެން ދެ ގައުމުގެ ގުޅުން ގޯސްވެފައިވާ ދަނޑިވަޅެއްގައި، އުތުރު ކޮރެޔާއިން ސަބްމެރީނެއް ބޭނުންކޮށްގެން ކްރޫޒް މިސައިލްތަކެއް ޓެސްޓުކޮށްފި. ކަނޑުއަޑީގެ އަސްކަރީ ގާބިލުކަން އިތުރުކުރުމަށް ކުރިއަށްގެންދިޔަ މި ޓެސްޓުތަކަކީ ދިފާޢީ ނިޒާމުތަކަށް ދެނެގަންނަން އުނދަގޫ އާ ފަންނީ އުކުޅުތަކެއް ހިމެނޭ ތަމްރީނުތަކެއް. މި ހާދިސާއާއެކު ދެ ކޮރެޔާއިން ވެސް ދަނީ އެއްބަޔަކު އަނެއް ބަޔަކަށް ރައްދުދިނުމުގެ ގޮތުން ޒަމާނީ ހަތިޔާރުތައް ޓެސްޓުކުރަމުން
އުތުރު ކޮރެޔާގެ ސަބްމެރިންއަކުން ކްރޫޒް މިސައިލެއް އުދުއްސައިލާ މަންޒަރު | ރޮއިޓަރސް
ދެކުނު ކޮރެޔާއާއި އުތުރު ކޮރެޔާ ގުޅޭ ސަރަހައްދީ ރޮނގުގައި އެއްގަމު މައިނެއް ގޮވުމާ ގުޅިގެން ދެ ޤައުމުގެ ދެމެދުގައި ނުތަނަވަސްކަން އުފެދިފައިވާތާ ހަފުތާތަކެއް ފަހުން، ސަބްމެރީނަކުން ދެ ބާވަތެއްގެ ކްރޫޒް މިސައިލް އުތުރު ކޮރެޔާއިން ޓެސްޓުކޮށްފައިވާ ކަމަށް އެ ޤައުމުގެ ދައުލަތުގެ ނޫސް އޭޖެންސީން ބުރާސްފަތި ދުވަހު ހާމަކޮށްފި އެވެ. ބުދަ ދުވަހު މި މިސައިލްތައް ފޮނުވާލާފައި ވަނީ ޖަޕާނު ކަނޑުގެ ނަމުން ވެސް މަޝްހޫރުވެފައިވާ އިރުމަތީ ކަނޑަށް ކަމަށާއި، މިކަމުގެ ސަބަބުން "އަވަށްޓެރި ޤައުމުތަކުގެ ސަލާމަތަށް އެއްވެސް ނޭދެވޭ އަސަރެއް ކޮށްފައިނުވާ" ކަމަށް ކޮރެޔާ ސެންޓްރަލް ނިއުސް އޭޖެންސީން (ކޭސީއެންއޭ) ބުންޏެވެ.
ހަތިޔާރު ގެންގުޅުން މަނާ ޑީމިލިޓަރައިޒްޑް ޒޯންގައި (ޑީއެމްޒެޑް) ދެކުނު ކޮރެޔާއިން ކޮންޓްރޯލްކުރާ ސަރަހައްދުގައި މިދިޔަ މަހު ގޮވި އެއްގަމު މައިނުގެ ހާދިސާގައި ދެކުނު ކޮރެޔާގެ ތިން ސިފައިންނަށް އަނިޔާވުމާ ގުޅިގެން ދެ ޤައުމުގެ ގުޅުން ވަނީ އިތުރަށް ގޯސްވެފަ އެވެ. މި ހާދިސާއަށްފަހު ދެ ޤައުމުން ވެސް ވަނީ މިސައިލް ޓެކްނޮލޮޖީގެ އާ ފަރުމާތައް ޓެސްޓުކޮށްފަ އެވެ. އެންމެ ފަހުން ކުރިއަށްގެންދިޔަ މި ޓެސްޓަކީ "ކަނޑުއަޑީގެ އަސްކަރީ ނިޒާމުތައް މިހާރު ތައްޔާރީ ހާލަތުގައި އޮތް މިންވަރު ދެނެގަތުމަށް އަމާޒުކޮށްގެން" ކަނޑުގެ ސިފައިންގެ ތަމްރީނެއްގެ ގޮތުގައި ކުރިއަށްގެންދިޔަ ޓެސްޓެއް ކަމަށް ކޭސީއެންއޭއިން ބުންޏެވެ. މި ޓެސްޓުތަކުން "ޑީޕީއާރުކޭގެ [އުތުރު ކޮރެޔާގެ] ހަނގުރާމައިގެ ދިފާޢީ ނިޒާމުތަކުގެ މަތީ އިތުބާރާއި، ޔަގީންކަމާއި އަދި ގާބިލުކަން" ހާމަވެގެންދިޔަ ކަމަށް، ކޭސީއެންއޭން ރިޕޯޓުކޮށްފައިވެ އެވެ.
ފަހުގެ އަހަރުތަކުގައި އުތުރު ކޮރެޔާއިން ސަބްމެރީންތަކުން ގިނަ މިސައިލް ޓެސްޓުތަކެއް ކޮށްފައިވީ ނަމަވެސް، ކަނޑުގެ ސަރަހައްދުން ހަމަލާދިނުމުގެ ގާބިލުކަން އެ ޤައުމުގައި ހުރި މިންވަރު އަދިވެސް ސާފެއް ނުވެ އެވެ. ކްރޫޒް މިސައިލްތަކަކީ އާންމުގޮތެއްގައި ޖެޓް އިންޖީނުގެ އެހީގައި ދަތުރުކުރާ އެއްޗަކަށްވުމާއެކު، ޒަމާނީ ބެލިސްޓިކް މިސައިލްތަކަށް ވުރެ ތިރިން ދަތުރުކުރާތީ، މިއީ ދެނެގަނެ ވައްޓާލަން އުނދަގޫ މިސައިލްތަކެކެވެ.
ސަބްމެރީނުން ފޮނުވާލެވޭ ބެލިސްޓިކް މިސައިލްގެ ގާބިލުކަން ކަށަވަރުވުމަކީ އުތުރު ކޮރެޔާގެ ހަތިޔާރުގެ ގާބިލުކަން މުޅިން އާ ހަރުފަތަކަށް ގެންގޮސްދޭނެ ކަމެކެވެ. އަދި، މީގެ ސަބަބުން ކޮރެޔާ ބައްރުން ބޭރަށް ހަތިޔާރު ފޯރުކުރުމުގެ ފުރުސަތު ލިބި، ހަމަލާއެއް އަތުވެއްޖެ ހާލަތެއްގައި ރައްދުގައި ހަމަލާދިނުމުގެ ގާބިލުކަން ވެސް އެ ޤައުމަށް ލިބިގެންދާނެ އެވެ.
އާ މިސައިލް ޓެސްޓުގެ ފަންނީ މުހިންމުކަން
ކޭސީއެންއޭއިން އާންމުކުރި ފޮޓޯތަކުން ފެންނަ ގޮތުގައި، އެއް މިސައިލް ކަނޑުގެ ތެރެއިން ސީދާ މައްޗަށް އަރައިގެންދާއިރު، އޭގެ ފަހަތުން ބޯ ދުމުގެ އަސަރު ފެންނަން ހުއްޓެވެ. އަދި، އަނެއް ފޮޓޯއިން ފެންނަނީ 45-ޑިގްރީގެ އޭންގަލަކަށް ކަނޑުގެ ތެރެއިން އެއްޗެއް މައްޗަށް އަރައިގެންދާ މަންޒަރެވެ. އެހެން ފޮޓޯތަކުން ކަނޑުގެ މަތިން ހުރަހަށް ދަތުރުކުރާ މިސައިލެއްގެ އިތުރުން، ސަބްމެރީނެއް ވެސް ފެނެ އެވެ.
ސަބްމެރީންތަކުން ތަފާތު ދެ އޭންގަލަކަށް މިސައިލް ފޮނުވާލުމުގެ ގާބިލުކަން އުތުރު ކޮރެޔާއަށް ލިބިފައިވުމަކީ "ފަންނީ މުހިންމުކަން" އެކުލެވިގެންވާ ކަމެއް ކަމަށާއި، މި ދެ ގޮތަށް މިސައިލް ފޮނުވާލުމުން ތަފާތު ދެ ބޭނުމެއް ފުދިގެންދާ ކަމަށް ކޮރެޔާ އިންސްޓިޓިއުޓް ފޯ ނޭޝަނަލް ޔުނިފިކޭޝަންގެ ހޮންގް މިން ވިދާޅުވި އެވެ.
"ސީދާ މައްޗަށް މިސައިލް ފޮނުވާލުމުން، އަމާޒަށް ތިރިކުރުމުގެ ކުރިން ވަރަށް މައްޗަށް އެރުމުގެ ފުރުސަތު ލިބިގެންދާނެ ކަމަށާއި، މީގެ ސަބަބުން މިސައިލްގެ ރާސްތާ އިތުރުވުމަކީ އެކަށީގެންވާ ކަމެއް،" އޭނާ ވިދާޅުވި އެވެ. "އަނެއްކޮޅުން، ވަކި އޭންގަލަކަށް ފޮނުވާލުމުން، ފެށޭއިރު ވެސް ތިރިން ދަތުރުކުރުމުގެ ފުރުސަތު މިސައިލަށް ލިބިގެންދާނެ. މީގެ ސަބަބުން މިސައިލް ދިފާޢުކުރާ ނިޒާމުތަކަށް އެ ދެނެގަނެ ވައްޓާލަން އުނދަގޫވާނެ."
އޮކްޓޫބަރު މަހުގެ ތެރޭގައި އުތުރު ކޮރެޔާއިން ވަނީ ބެލިސްޓިކް މިސައިލްގެ ގިނަ ޓެސްޓުތަކެއް ކޮށްފަ އެވެ. މީގެ ތެރެއިން އެންމެ ފަހުގެ ޓެސްޓެއް ކޮށްފައި ވަނީ ހޯމަ ދުވަހު އެވެ. މި މަހުގެ ތެރޭގައި ދެ ކޮރެޔާއިން ވެސް އެއް ބަޔަކު އަނެއް ބަޔަކަށް ރައްދުދިނުމުގެ ގޮތުން ސިލްސިލާ މިސައިލް ޓެސްޓުތަކެއް ކުރިއަށްގެންގޮސްފައިވާއިރު، ދެ ފަރާތުން ވެސް ވަނީ ހައިޕަސޮނިކް ހަތިޔާރު ވެސް ޓެސްޓުކޮށްފަ އެވެ.
އާޓިފިޝަލް އިންޓެލިޖެންސްގެ (އޭއައި) އެހީގައި މަސައްކަތްކުރާ މެދު-ރާސްތާގެ ހައިޕަސޮނިކް މިސައިލެއް ޓެސްޓުކޮށްފައިވާ ކަމަށް އުތުރު ކޮރެޔާއިން ބުނިތާ މަދު ދުވަސްކޮޅެއް ފަހުން، ދެކުނު ކޮރެޔާއިން ވަނީ އެ ޤައުމުގައި އަމިއްލައަށް އުފެއްދި ފުރަތަމަ ހައިޕަސޮނިކް ގްލައިޑް ވެހިކަލް މިދިޔަ ހަފުތާގައި ޓެސްޓުކޮށްފަ އެވެ. 1953 ވަނަ އަހަރު ކޮރެޔާ ހަނގުރާމަ ނިމުމަކަށް އައީ ސުލްހައިގެ އެއްބަސްވުމަކުން ކަމަށް ނުވުމާއެކު، އުތުރު ކޮރެޔާ އަދި ދެކުނު ކޮރެޔާ އޮތީ އަދިވެސް ރަސްމީގޮތުން ހަނގުރާމައިގެ ހާލަތެއްގަ އެވެ.
މަސްދަރު: ސީއެންއޭ
