ރައީސް މުއިއްޒު ވައުދުވާ ކަންކަން ކޮށްދޭން ނޭނގޭތީ ސަރުކާރުން ދަނީ ގާނޫނުގެ ބާރު ދައްކައި ރައްޔިތުންނަށް ބިރުދައްކަމުން: ނިޝާން
26 އޮކްޓޯބަރު 2026 | ހޯމަ 05:28ސަރުކާރުގެ އިގްތިސާދީ ސިޔާސަތުތައް ބައްޓަންކުރަން ނޭނގުމުގެ ސަބަބުން ޑޮލަރުގެ އަގު އިންތިހާއަށް އުފުލި، ވައުދުވީ ގޮތަށް ޑޮލަރުގެ ލިމިޓު އިތުރުނުކުރެވި ރައްޔިތުންނަށް ބޮޑެތި ދަތިތަކާ ކުރިމަތިވަމުންދާ ކަމަށް ގާނޫނީ ވަކީލު ނިޝާން އިބްރާހީމް ވިދާޅުވެއްޖެ. މީގެ އިތުރުން މައްސަލަތައް ހައްލުކުރުމުގެ ބަދަލުގައި، ގާނޫނާއި ގަވާއިދުތަކުގެ ބާރު ބޭނުންކޮށްގެން ރައްޔިތުންނަށް ބިރުދައްކައި ކޮންޓްރޯލްކުރަން ސަރުކާރުން މަސައްކަތްކުރާކަން އޭނާ ފާހަގަކުރެއްވި
ގާނޫނީ ވަކީލު މުހައްމަދު ނިޝާން އިބްރާހީމް | ރާއްޖެއެމްވީ
ކޮންމެ ކަމެއް ވެސް ހައްލުކޮށްދެއްވާނެ ކަމަށް ރައީސް ޑރ. މުހައްމަދު މުއިއްޒު ވައުދުވެވަޑައިގަންނަވާ ކަމަށާއި، އެ ވައުދުތައް ފުއްދަވަން އެނގިވަޑައިނުގަތުމުން ކުރައްވާ ކަމަކީ ގާނޫނުގެ ބާރު ދައްކަވައިގެން ރައްޔިތުންނަށް ބިރު ދެއްކެވުން ކަމަށް ގާނޫނީ ވަކީލު މުހައްމަދު ނިޝާން އިބްރާހީމް ވިދާޅުވެއްޖެ އެވެ.
ރާއްޖެޓީވީގެ ފަލަސުރުޚީ ޕްރޮގްރާމްގައި ވާހަކަދައްކަވަމުން ނިޝާން ވިދާޅުވީ ކޮންމެ މައްސަލައަކަށް ބެލި ކަމުގައިވީ ނަމަވެސް ފެންނަނީ މި ސަރުކާރަށް އެކަންކަން ހައްލުކުރަން ނޭނގިގެން އުޅޭ މަންޒަރު ކަމަށެވެ.
އެގޮތުން ރައީސް މުއިއްޒު ވެރިކަމަށް ވަޑައިގަތުމަށްފަހު ޑޮަލަރުގެ އަގު އަތުފަތު ނުޖެހޭ ހިސާބަށް މައްޗަށް ދިޔަ ކަމަށާއި އެކަން އެގޮތަށް ވީ ސަރުކާރުގެ އިގްތިސާދީ ސިޔާސަތެއް ނޭނގި، އަދި ސަރުކާރު ހިންގަން އެމަނިކުފާނަށް ނޭނގުމުން ކަމަށް ނިޝާން ވިދާޅުވި އެވެ.
މި ސަރުކާރުން ހައްޖަށްދާ މީހުންނާއި، ރާއްޖެއިން ބޭރުގައި ކިޔަވާ ދަރިވަރުން އަދި ބޭރަށްދާ ކޮންމެ ރައްޔިތަކަށް ޑޮަލަރު ދޭ ލިމިޓު އިތުރުކުރަން ވައުދުވި ކަމަށާއި އެހެން ނަމަވެސް އެ ލިމިޓު މަތިކުރި ފަހުން އެއްވެސް މީހަކަށް ޑޮލަރު ނުލިބޭ ކަމަށް ނިޝާން ވިދާޅުވި އެވެ.
އެންމެ ފަހުން ކުރިން ލިބެމުން އައި 500 ޑޮލަރު ހޯދަން ވެސް ޒުވާބު ކުރާ ހިސާބަށް ކަންކަން ގޮސްފައިވާކަން ފާހަގަކުރައްވާ ނިޝާން ވިދާޅުވީ އެކަން ވެސް ހައްލު ކޮށްދެއްވާނެ ކަމަށް ރައްޔިތުންނަށް އެމަނިކުފާނު ވައުދުވެވަޑައިގެންނެވި ނަމަވެސް އެކަން ހައްލު ނުވުމުން، ޑޮލަރުގެ މައްސަލަ ހައްލު ކުރާނީ ގާނޫނުތައް ގެނަސްގެން ކަމަށް އެމަނިކުފާނު ނިންމެވި ކަމަށެވެ.
އެހެން ކަމުން ޑޮލަރު މައްސަލައިގައި ވެސް ގާނޫނުގެ ބާރު ދައްކައިގެން ރައްޔިތުންނަށް ބިރު ދައްކަން މި ސަރުކާރުން ނިންމިކަން ނިޝާން ފާހަގަކުރެއްވި އެވެ.
ރައީސް މުއިއްޒު ފުރަތަމަ ޑޮލަރުގެ ކަންކަން ހައްލުކުރުމަށްޓަކައި އެކި ކަހަލަ ގަވާއިދުތައް އުސޫލުތައް ހައްދަވަމުން ދިޔަ. ރާއްޖެ އަށް ޑޮލަރު ވެއްދުމަށް. ފުރަތަމަ ހެދި ގަވާއިދަކީ ފަތުރުވެރިންގެ އަތުން ބޮލަކަށް 500 ޑޮލަރު މާރުކުރުމުގެ އުސޫލު. މަހެއްގެ 16 ވަނަ ދުވަހު މި ގަވާއިދަށް އަމަލު ކުރަން ފެށީ. 30 ދުވަހުގެ މަހެއް. އެހެންވީމާ ބާކީ މިއޮތީ 14 ދުވަސް. އެ 14 ދުވަސްތެރޭގައި 33 މިލިއަން ޑޮލަރު ވަތް ކަމަށް ފެންނަން އެބައޮތް. ކޮބާހޭ މި ޑޮޮލަރު. މި ރުފިޔާ. ކޮންތާކަށް ހޭ މި ވަނީ. މިއަށް ސަރުކާރުން ޖަވާބުދާރީވާން ޖެހޭނެތާ ސަރުކާރުން. މި 14 ދުވަސްތެރޭގައި 33 މިލިއަން ޑޮަލަރު ހަމައެކަނި މި މާރުގެ ތެރެއިން ވަނީމާ. އެހެންވީމާ މަހެއްގެ މައްޗަށް ކިތަށް ޑޮލަރު ވަންނާނެ ހެއްޔޭނިޝާން އިބްރާހީމް
ގާނޫނުތައް ހަދައިގެން ރައްޔިތުންނަށް ބިރު ދައްކަނީ ހަމައެކަނި ޑޮލަރުގެ މައްސަލައިގައި ނޫން ކަމަށާއި ސިނގިރޭޓު މައްސަލައިގައި ވެސް އަދި އެހެން ކަންކަމުގައި ވެސް ރައްޔިތުންގެ މައްޗަށް ޖިނާއީ ދައުވާ ކޮށްގެން ރައްޔިތުން ބިރު ދައްކާ ކޮންޓްރޯލް ކުރުމަށް މި ސަރުކާރުން ކެނޑިނޭޅި މަސައްކަތް ކުރަމުންދާ ކަމަށް ނިޝާން ވިދާޅުވި އެވެ. އަދި ވިދާޅުވީ އެންމެ އަސާސީ ކަންކަމަށް ވެސް ރައްޔިތުން މިއަދު ސަލާން ޖަހަމުން ދާއިރު ސަރުކާރުން ދަނީ ކޮންމެ ކަމެއްގައި ވެސް ރައްޔިތުންނަށް އޮޅުވާލައި، ރައްޔިތުން ނިކަމެތި ކުރުމަށް މަސައްކަތް ކުރަމުން ކަމަށެވެ.
