މާބައިދޫގައި ފުލުހުން ތިބެންޖެހޭ، އާދޭސް ކުރާތާ 12 އަހަރު: ކައުންސިލް
9 އޮކްޓޯބަރު 2017 | ހޯމަ 07:30ހާދިސާއެއް ދިމާވުމުން ކަންކުރަންވީ ގޮތް ރޭވިފައި ހުންނަންޖެހޭ
މާބައިދޫގައި ހިނގި އަލިފާންގަނޑު ނިންވަން ރައްޔިތުން މަސައްކަތް ކުރަނީ
ލ. އަތޮޅު މާބައިދޫގައި ފުލުހުންގެ ސްޓޭޝަނެއް ގާއިމް ކޮށްދިނުމަށް ފުލުހުންގެ މުއައްސަސާގެ އިސްވެރިންގެ ކިބައިން އާދޭސް ދަންނަވާތާ 12 އަހަރުވީއިރު ވެސް ހައްލެއް ލިބިފައިނުވާ ކަމަށް މާއިބައިދޫ ކައުންސިލްގެ ނައިބް ރައީސް އިބްރާހިމް ޝަރީފް ވިދާޅުވެއްޖެއެވެ.
އާބާދީގައި 1170 މީހުން ދިރިއުޅޭ މާބައިދޫ ތެޔޮ ގުދަނާއި ، ފިހާރައިގައި އާދީއްތަ ދުވަހު އަލިފާން ރޯވި ހާދިސާއާއި ގުޅިގެން ރާއްޖެއެމްވީއަށް މައުލޫމާތު ދެއްވަމުން ކައުންސިލްގެ ނައިބް ރައީސް ޝަރީފް ވިދާޅުވީ ނުރައްކާތެރި ހިތާމަވެރި ހާދިސާއެއް ދިމާވާ ކޮންމެ ފަހަރަކު މާބައިދޫގައި ފުލުހުން ނުތިބޭތީ އެކަމުގެ ގެއްލުން ރައްޔިތުންނަން ކުރާ ކަމަށެވެ. އަދި ފުލުހުންގެ ކުޑަ ނަމަވެސް ސްޓޭޝަނެން ގާއިމްކޮށްދިނުމަށް އެދި ފުލުހުންގެ މުއައްސަސާގެ އިސްވެރިންގެ ކިބައިން އާދޭސް ދެންނެވުމުން ދެނީ ބީރުކަންފަތެއް ކަމަށް ޝަރީފް ވިދާޅުވިއެވެ.
މާބައިދޫގައި ތެޔޮ ގުދަނަކާއި ފިހާރަގައި އަލިފާން ރޯވެފައި
" އަދޭސް މިކުރަނީ ފުލުހުން ރަށުގައި ބައިތިއްބައިދިނުމަށް އެދި، ނިމިދިޔަ ހަފްތާގައި ވެސް އޭސީޕީ ނަވާޒް އާއި ވެސް ބައްދަލުކުރިން، މި ގޮތަށް އާދޭސް ކުރާތާ 12 އަހަރު " ޝަރީފް ވިދާޅުވިއެވެ.
އަލިފާނުގެ ހާދިސާއެއް ހިނގާއިރު، އަލިފާންގަނޑު ނިންވާލެވޭނެ އިންތިޒާމް ރަށުގައި ގާއިމްކޮށްދިނުމަކީ ފުލުހުންގެ ޒިންމާއެއް ކަމަށް ފާހަގަކުރަމުން ޝަރީފް ވިދާޅުވީ މާދަމާ އަލިފާނުގެ ހާދިސާއެއް ރަށުގައި ހިނގި ނަމަވެސް އަލިފާން ނިންވަން ބޭނުން ކުރާ ތަކެތި ވެސް ރަށުގައި ނެތް ކަމަށެވެ. އެހެންކަމުން ގުދަނުގައި އަލިފާން ރޯވުމުން ރަށުގެ ރައްޔިތުން އަބަދުވެސް ޖެހޭނީ ބާލިދީ ތަކަށް ފެންއަޅައިގެން ގޮސް އަލިފާންގަނޑަށް ފެންޖަހަން ކަމަށް ޝަރީފް ވިދާޅުވިއެވެ.
އަލިފާންގަނޑު ނިންވާލުމަށް ބާލިދީ ތަކަށް ފެން އަޅައިގެން ގެންދަނީ
ލ. އަތޮޅުގޭގައި ފުލުހުންނާއި ސިފައިންގެ މައި ސްޓޭޝަން ހުންނަނީ ލ. ގަމުގައެވެ. މައިބައިދޫގައި އަލިފާން ރޯވުމުން ކައްދޫގައި ތިބި ސިފައިން އަލިފާން ނިންވުމަށް އެރަށަށް ދިޔައިރު އަލިފާންގަނޑު ވަނީ ވަރަށް ބޮޑަށް އެރަށުގެ ރައްޔިތުން ކޮންޓްރޯލް ކޮށްފައެވެ.
"ސިފައިން ރަށަށް ދިޔައިރު އަލިފާން ގަނޑު ވަނީ ކޮންޓްރޯލްވެފައި، މިފަދަ ކަންކަމުގައި ރަށުގެ ރައްޔިތުންގެ ފަރާތުން ފެނިގެންދާ އެއްބައިވަންތަ ކަމަށް ޝުކުރު ދަންނަވަން" ޝަރީފް ވިދާޅުވިއެވެ.
ލޮނުގެނެސް ވެއްޔަށް އެޅުމަށް ފަހު، ތެމިފައި ހުރި ވެލި އަލިފާންގަޑަށް އަޅަން ތައްުޔާރުކުރަނީ
ޝަރީފް ވިދާޅުވީ މީގެ ދެ މަސް ދުވަސް ކުރިން އެރަށަށް އުދަ އަރައި ރަށަށް ބޮޑެތި ގެއްލުންތަކެއް ލިބުނުއިރު، އެރަށުގައި ފުލުހުން ތިބި ނަމަ ރައްޔިތުންނަން ނުހަނު ފަސޭހަ ވާނެ ކަމަށެވެ. ނުވަތަ ޑިޒާސްޓަރ މެނޭޖްމެންޓުގެ ފަރާތުން މިފަދަ ކުއްލި ހާލަތެއް ދިމާވެއްޖެނަމަ ފެންޖެހުމަށާއި، ފެން ހިއްކުމަށް ބޭނުން ކުރާ ޕަންޕު ފަދަ ތަކެތި ކައުންސިލަށް ފޯރުކޮށްދިނުމަށް އެދިލައްވާ ކަމަށެވެ. އަދި ފުލުހުންނަން ނުވާނަމަ ރަށުން ބަޔަކު ތަމްރީން ކުރުވަން ޖެހޭ ކަމަށް ވެސް ޝަރީފް ވިދާޅުވިއެވެ.
