އުވާލަން ނިންމާފައިވާ ފެނަކައިގެ އެމްޑީގެ މަގާމުން އަފީފު ވަކިކޮށްފި
15 އޮކްޓޯބަރު 2026 | ބުރާސްފަތި 10:06ފެނަކައިގެ އެމްޑީގެ މަގާމުން އަފީފް ވަކިކުރި ސަބަބު ޕީސީބީން ހާމަނުކުރި ނަމަވެސް، މިއީ މި ސަރުކާރުގައި އެ މަގާމަށް އައްޔަންކުރި ތިންވަނަ ބޭފުޅާ. މި ބަދަލު ގެނެސްފައިވަނީ ފެނަކަ އާއި އާރްޑީސީ އުވާލައި، އެ ކުންފުނިތަކުގެ ޚިދުމަތްތައް އެހެން ކުންފުނިތަކުގެ ދަށަށް ބަދަލުކުރުމަށް ސަރުކާރުން ނިންމާފައިވާ ދަނޑިވަޅެއްގައި
ފެނަކަ ކޯޕަރޭޝަންގެ މެނޭޖިންގ ޑިރެކްޓަރުގެ މަގާމުން ވަކިކުރި މުހައްމަދު އަފީފް ހުސައިން | ފެނަކަ
އުވާލަން ނިންމާފައިވާ ފެނަކަ ކޯޕަރޭޝަން ލިމިޓެޑްގެ މެނޭޖިންގ ޑިރެކްޓަރުގެ މަގާމުން މުހައްމަދު އަފީފް ހުސެއިން ވަކިކޮށްފި އެވެ.
ބުދަ ދުވަހު ޕްރައިވަޓައިޒޭޝަން އެންޑް ކޯޕަރަޓައިޒޭޝަން ބޯޑު (ޕީސީބީ) ބުނީ، ފެނަކައިގެ މެނޭޖިންގ ޑިރެކްޓަރުގެ މަގާމުންނާއި އެ ކުންފުނީގެ ޑިރެކްޓަރުންގެ ބޯޑުގެ މެންބަރުކަމުން، މއ. ވޭސައިޑް 304 ފްލެޓް، މުހައްމަދު އަފީފް ހުސެއިން ވަކިކޮށްފައިވާ ކަމަށެވެ. ނަމަވެސް، އޭނާ މަގާމުން ވަކިކުރި ވަކި ސަބަބެއް ޕީސީބީން ހާމަކޮށްފައެއްނުވެ އެވެ.
ފެނަކައިގެ އެމްޑީގެ މަގާމަށް އޭނާ އައްޔަނުކުރެވުނީ 27 އެޕްރީލް 2026 ގަ އެވެ. އޭނާއަކީ މި ސަރުކާރުގައި ފެނަކަ ހިންގުމާ ހަވާލުވެވަޑައިގެންނެވި 3 ވަނަ އެމްޑީ އެވެ. މީގެ ކުރިން މުއާޒު މުހައްމަދު ރަޝީދު އަދި މުހައްމަދު ނަޖާހު އެ މަގާމު ފުރުއްވި އެވެ.
ފެނަކައިގެ އެމްޑީ މަގާމުން އަފީފް ވަކިކޮށްފައިވާއިރު، އެ ކޯޕްރޭޝަންގެ އެގްޒެކެޓިވް ޑިރެކްޓަރު އަދި އެކްޓިންގ މެނޭޖިންގ ޑިރެކްޓަރުގެ މަޤާމަށް، ސ.ފޭދު، ނެސްޕްރޯވިލާ، ޑރ. އަލީ އަޒުވަރު އަދި ޑިރެކްޓަރުންގެ ބޯޑަށް، ހ.ހުދުރިޔާ، އިބްރާހީމް ނިޒާމް ވަނީ 15 އޮކްޓޯބަރު 2026 ވަނަ ދުވަހުން ފެށިގެން އައްޔަނުކޮށްފައިވާ ކަމަށް ޕީސީބީން ބުނެފައިވެ އެވެ.
ފެނަކައަށް މިފަދަ ބަދަލުތައް ގެންނަމުންދާ މިދަނޑިވަޅުގައި، ސަރުކާރުން ދަނީ ފެނަކައިގެ އެންމެހައި މަސައްކަތްތަކާއި ޚިދުމަތްތައް ސްޓެލްކޯގެ ދަށަށް ބަދަލުކުރުމުގެ މަސައްކަތް ކުރަމުންނެވެ.
ފެނަކައިގެ އިތުރުން ރޯޑް ޑިވެލޮޕްމެންޓް ކޯޕަރޭޝަން (އާރްޑީސީ) އުވާލަން ނިންމާފައިވާކަން ރައީސް ޑރ. މުހައްމަދު މުއިއްޒު އިއުލާނުކުރެއްވީ 7 ސެޕްޓެމްބަރު 2026 ގައި ރައީސް އޮފީހުގައި ބޭއްވި ނޫސްވެރިންގެ ބައްދަލުވުމުގަ އެވެ.
