އިތިއޯޕިޔާގައި އަލުން ފެށި ހަމަނުޖެހުންތަކާ މެދު އދ.ގެ ގުތެރޭޝް ކަންބޮޑުވުން ފާޅުކުރައްވައިފި
10 އޮކްޓޯބަރު 2026 | ހޮނިހިރު 07:00އިތިއޯޕިޔާގައި އެރިޓްރެޔާގެ ސިފައިން ހަރަކާތްތެރިވާ ކަމުގެ ރިޕޯޓުތަކާ ގުޅިގެން އދ.ގެ ސެކްރެޓަރީ ޖެނެރަލް ކަންބޮޑުވުން ފާޅުކުރައްވައި، އެއްވެސް ގައުމެއްގެ މިނިވަންކަމަށް އަރައިނުގަތުމަށް ވަނީ ގޮވާލައްވާފައި. ދެ ގައުމުގެ ގުޅުން ގޯސްވެފައިވަނީ ރަތް ކަނޑުގެ ބަނދަރަކަށް ވަދެވޭނެ މަގެއް ހޯދުމަށް އިތިއޯޕިޔާއިން ކުރާ މަސައްކަތްތަކާ ގުޅިގެން އުފެދުނު ނުތަނަވަސްކަމާ އެކުގައި
އދ.ގެ ސެކްރެޓަރީ ޖެނެރަލް އެންޓޯނިޔޯ ގުތެރޭޝް ނޫސްވެރިންގެ ބައްދަލުވުމެއްގައި ވާހަކަފުޅު ދައްކަވަނީ | އަނަދޮލު އޭޖެންސީ
އިތިއޯޕިޔާގެ ޓިގްރޭ، އާފާރް، އަދި އަމްހާރާ ސަރަހައްދުގައި "އަލުން ފެށި ހަމަނުޖެހުންތަކާ މެދު ވަރަށް ބޮޑަށް ކަންބޮޑުވެވަޑައިގަންނަވާ" ކަމަށް، އދ.ގެ ސެކްރެޓަރީ ޖެނެރަލް އެންޓޯނިޔޯ ގުތެރޭޝް ހުކުރު ވިދާޅުވެއްޖެ އެވެ. ގުތެރޭޝްގެ ތަރުޖަމާނު ސްޓިފަން ދުޖަރީކް މެދުވެރިކުރައްވައި ނެރުއްވި ބަޔާނެއްގައި ގުތެރޭޝް ވިދާޅުވީ، "ހަމަނުޖެހުންތައް ވަގުތުން ހުއްޓާލުމަށާއި، ޕްރިޓޯރިޔާ އެއްބަސްވުމުގެ އޮނިގަނޑުގެ ދަށުން އަލުން މަޝްވަރާތަކަށް ރުޖޫއަވުމަށް" ހުރިހާ ފަރާތްތަކަކަށް ގޮވާލައްވާ ކަމަށެވެ.
ސަރަހައްދުގެ ހަމަޖެހުން އިތުރަށް ގެއްލިދާނެ ފަދަ "ކަންކަން ގޯސްވުމުގެ ނުރައްކާތަކާ" މެދު އދ.ގެ ވެރިޔާ ވަނީ އިންޒާރު ދެއްވާފަ އެވެ. "އިތިއޯޕިޔާގައި އެރިޓްރެޔާގެ ސިފައިން ހަރަކާތްތެރިވަމުންދާ ކަމުގެ ރިޕޯޓުތަކާ މެދު އިތުރަށް ކަންބޮޑުވޭ" ގުތެރޭޝްގެ ބަޔާނުގައި ވިދާޅުވި އެވެ.
އދ.ގެ ޗާޓަރުގެ ދަށުން ސަރަހައްދުގެ ހުރިހާ ޤައުމުތަކެއްގެ މައްޗަށް ލާޒިމުކުރާ ގޮތަށް، "އެއްވެސް ޤައުމެއްގެ ސަރަހައްދީ ނަޒާހަތްތެރިކަމާ ނުވަތަ ސިޔާސީ މިނިވަންކަމާ ދެކޮޅަށް ބާރުގެ ބޭނުން ނުކުރުމަށާއި އެފަދަ އިންޒާރެއް ނުދިނުމަށް" ގުތެރޭޝް ވަނީ ހަނދާންކޮށްދެއްވާފަ އެވެ. މީގެ އިތުރުން، ދާޚިލީ ކަންކަމާ ނުބެހުމުގެ އުސޫލަށް ތަބާވުމަށް ވެސް އޭނާ ވަނީ އިލްތިމާސްކުރައްވާފަ އެވެ.
އަދި، މައްސަލައިގައި ޝާމިލުވާ ފަރާތްތަކަށް ނުފޫޒު ފޯރުވޭ ޤައުމުތަކުން "ހަމަނުޖެހުން ކުޑަކުރުމަށް އެ ނުފޫޒުގެ ބޭނުން ކުރުމަށާއި، މައްސަލަ އިތުރަށް ގޯސްވެދާނެ އެއްވެސް އަމަލަކުން ދުރުހެލިވުމަށް" އޭނާ ގޮވާލެއްވި އެވެ. "އެމަނިކުފާނުގެ އެހީތެރިކަން ފޯރުކޮށްދެއްވުމަށް ތައްޔާރަށް ހުންނެވި ކަމަށް" ވެސް އެ ބަޔާނުގައި ބުނެފައިވެ އެވެ.
2020 އިން 2022 އަށް ހިނގި ޓިގްރޭ ހަނގުރާމައިގައި އިތިއޯޕިޔާއާއި އެރިޓްރެޔާއިން މަސައްކަތްކުރީ އެކީގަ އެވެ. ނަމަވެސް، އޭގެ ފަހުން ދެ ޤައުމުގެ ގުޅުން ވަރަށް ބޮޑަށް ހީނަރުވެ، ސަރަހައްދީ ހަމަޖެހުމަށް ނުރައްކާކުރާ ކަމަށް ބުނެ ދެ ސަރުކާރުން ވެސް ދަނީ އެއް ބަޔަކު އަނެއް ބަޔަކަށް ތުހުމަތުތައް ކުރަމުންނެވެ. ރަތް ކަނޑަށް، ޚާއްސަކޮށް އެރިޓްރެޔާގެ އައްސަބް ބަނދަރަށް ވަދެވޭނެ މަގެއް ހޯދުމަށް އިތިއޯޕިޔާއިން ކުރަމުންދާ މަސައްކަތްތަކާ ގުޅިގެން ވެސް ނުތަނަވަސްކަން ވަނީ އިތުރުވެފަ އެވެ. އެއީ އެ ޤައުމުގެ ސިޔާދަތީ ސަރަހައްދުގެ ބައެއް ކަމަށް އެރިޓްރެޔާގެ ވެރިރަށް އަސްމާރާއިން ދަނީ ބުނަމުންނެވެ.
މަސްދަރު: އަނަދޮލު އޭޖެންސީ
