ރާއްޖޭގެ ޖުޑީޝަރީގެ އިތުބާރު ގެއްލިފައިވާކަމަށް ބަންގްލަދޭޝްއިން ރާއްޖެއަށް ކުރިން ކަނޑައަޅާފައި ހުންނެވި ސަފީރު ޕްރޮފެސަރ ސެލީނާ މުހުސިން ވިދާޅުވެއްޖެއެވެ.
ރާއްޖޭގައި ދިރިއުޅޭ ބަންގްލަދޭޝް މަސައްކަތު މީހުންނާއިމެދު ދިވެހިން އަމަލުކުރާ ގޮތާއި އަދި އެމީހުންގެ ޙާލަތާއި ބެހޭ ގޮތުން ބަންގްލަދޭޝްގެ 'ދަ ޑެއިލީ ސްޓަރ' ނޫހުގައި ޝާއިއުކުރެއްވި ލިޔުމެއްގައި ސެލީނާ ވިދާޅުވީ ރާއްޖޭގައި ކޮރަޕްޝަން ޢާއްމުވެފައިވާކަމަށާއި، އަދުލު އިންސާފުގެ ނިޒާމްގެ އިތުބާރު ގެއްލިފައިވާކަމަށެވެ. އަދި ޤާނޫނު އަސާސީއަށް އިހްތިރާމްކުރުމެއް ރާއްޖޭގައި ނެތްކަމަށް އޭނާ ސިފަކުރެއްވިއެވެ. މީގެ އިތުރުން މާރާމާރީ އާއި ހަމަނުޖެހުން އާއްމުވެފައިވާއިރު، ސިޔާސީ ޕާޓީތަކުގެ މެދުގައި އޮންނަ ހަމަނުޖެހުންތައް އިތުރުވެ، ފެއިލްވެފައިވާ ދައުލަތަކަށްވުމަށް ދިވެހިރާއްޖެ މިސްރާބު ޖަހާފައިވާކަމަށް އޭނާ ސިފަކުރެއްވިއެވެ.
މި ލިޔުމުގައި މައިގަނޑު ގޮތެއްގައި ރާއްޖޭގައި ދިރިއުޅޭ ބަންގްލަދޭޝްގެ މަސައްކަތު މީހުންގެ ހާލަތާއި އެމީހުންނާއި ދޭތެރޭ ދިވެހިން އަމަލުކުރާ ގޮތަށް އަލިއަޅުވާލާފައިވާއިރު، ރަސްރަނި ބަގީޗާއަށް ވަނުމަށް ބިދޭސީން އަތުން ފީއެއް ނަގާތީ، އެކަމާއި ކަންބޮޑުވުން ފާޅުކުރައްވާފައިވެއެވެ. ސެލީނާ ވިދާޅުވީ އެތަނަކީ ތޮއްޖެހި، ކާރޫބާރޫ ބޮޑުވެފައިވާ މާލޭގައި ބަންދު ދުވަސްދުވަހު ހިތްހަމަޖައްސާލަން ބިދޭސީންނަށް ދެވެން އޮންނަ މަދު ތަންތަނުގެ ތެރެއިން އެއް ތަންކަމަށެވެ. އަދި ހަމައެއާއިއެކު، ބިދޭސީން ބޭރަށް ފޮނުވާ ފައިސާއިން ރެމިޓެންސް ޓެކްސް ނަގަން ފެށުމުން ވެސް ސެލީނާ ފާޑުވިދާޅުވިއެވެ.
ރާއްޖޭގައި ތިބި ބިދޭސީންގެ ހާލަތުގެ ވާހަކަ ބަޔާންކުރުމަށް ފަހު ސެލީނާ ވަނީ ރާއްޖޭގައި ތިބި ބަންގްލަދޭޝްގެ މަސައްކަތު މީހުންގެ ހާލަތު ރަނގަޅުކުރުމަށް ފިޔަވަޅު އެޅުމަށް ބަންގްލަދޭޝް ސަރުކާރަށާއި ބައިނަލްއަޤްވާމީ މުޖްތަމައަށް ގޮވާލައްވާފައެވެ.
ޕްރޮފެސަރ ސެލީނާ މުހުސިންއަކީ 2008ވަނަ އަހަރުން ފެށިގެން 2010ވަނަ އަހަރަށް ރާއްޖޭގައި ހުންނެވި ބަންގްލަދޭޝްގެ ސަފީރެވެ. އެކަމަނާވަނީ އޭގެ ކުރިން ކެނޭޑިއަން އިންޓަރނޭޝަނަލް ޑިވެލޮޕްމަންޓް އޭޖެންސީގެ މުޝީރުކަން ކުރައްވާފައެވެ.
