ވޯލްޑްކަޕް ކޮލިފައިން: ފްރާންސް އަދި ޕޯޗުގަލް ކޮލިފައިވުމުގެ އުންމީދު އާކޮށްފި

ވޯލްޑްކަޕް ކޮލިފައިންގައި ފްރާންސް އަދި ޕޯޗުގަލް ކުޅުނު މެޗުތައް ކާމިޔާބުކޮށް، ކޮލިފައިވުމުގެ އުންމީދު އާކޮށްފިއެވެ.

ހޮނިހިރު ދުވަހުގެ ރޭ ކުޅުނު މެޗު ފްރާންސް ކާމިޔާބު ކުރީ ބަލްގޭރިއާއާ ވާދަކޮށް 0-1 ގެ ނަތީޖާއަކުންނެވެ.

ބަލްގޭރިއާ ދަނޑުގައި ކުޅުނު މި މެޗު ފެށިގެން ބޯޅަ ކޮންޓްރޯލްކޮށްގެން ރަނގަޅަށް ކުޅުނީ ފްރާންސްއެވެ. އެގޮތުން އެޓީމުން ވަނީ ފުރަތަމަ ހާފް ފެށިގެން ތިންވަނަ މިނެޓު ތެރޭގައި މެޗުގެ ލީޑު ނަގާފައެވެ. މި ލަނޑު އެޓީމަށް ކާމިޔާބު ކޮށްދިނީ ބްލައިސް މަޓުއިޑީއެވެ.

މި ލަނޑަށްފަހު ވެސް ފްރާންސް އިން ދިޔައީ ބަލްގޭރިއާގެ ހާފަށް ބާރުބޮޑުކޮށް ހަމަލާ އުފައްދަމުންނެވެ. އެގޮތުން ލަކަޒެޓް އަދި އެންޓޯނިއޯ ގްރިޒްމަންއަށް ވަނީ ލަނޑު ޖެހުމަށް ރަނގަޅު ފުރުސަތުތައް ލިބި ބޭކާރުވެފައެވެ.

ފުރަތަމަ ހާފް ނިމުނީ 0-1 ގެ ނަތީޖާއިން ބަލްގޭރިއާގެ މައްޗަށް ފްރާންސް ކުރީގައި އޮވެގެންނެވެ.

ދެވަނަ ހާފް ފެށިގެން ވެސް ބޯޅަ ކޮންޓްރޯލްކޮށްގެން ރަނގަޅަށް ކުޅުނީ ފްރާންސްއެވެ. އެގޮތުން އެޓީމުން ވަނީ ބަލްގޭރިއާގެ ގޯލަށް ނުރައްކާކޮށް ދެވަނަ ހާފްގައިވެސް ހަމަލާތަކެއް ފޮނުވާލާފައެވެ.

ފުރަތަމަ ހާފާ ހިލާފަށް ދެޓީމުން ވެސް ދެވަނަ ހާފްގައި ކުޅުނީ ވަރަށް ޑިފެންސިވްކޮށެވެ. ދެވަނަ ހާފްގައި ބަލްގޭރިއާއަށް ވެސް ވަނީ ނަތީޖާ ހަމަހަމަކުރުމަށް ފުރުސަތުތަކެއް ލިބި ބޭކާރުވެފައެވެ.

މި ނަތީޖާއާއެކު ފްރާންސް ވަނީ ކުޅުނު ނުވަ މެޗުން 20 ޕޮއިންޓް ހަމަކޮށް، ޕޮއިންޓް ތާވަލުގެ އެއްވަނައިގައި ހަމަޖެހިލާފައެވެ. ދެވަނައިގައި އޮތީ ފްރާންސްއަށް ވުރެ އެއް ޕޮއިންޓް މަދުން ލިބިގެން ސްވިޑެންއެވެ. ތިންވަނައިގައި ނެދަލޭންޑްސް އޮތީ 16 ޕޮއިންޓާއެކުގައެވެ. ގްރޫޕްގެ އެއްވަނަ ވޯލްޑްކަޕްގެ ސީދާ ޖާގައެއް ލިބޭއިރު، ދެވަނައަށްދާ ޓީމު ކުޅެންޖެހޭނީ ޕްލޭއޮފްއެވެ.

ގްރޫޕްގައި ދެން ބާކީ އެއް މެޗު އޮތްއިރު، ސްވިޑެން ނިކުންނާނީ ނެދަލޭންޑްސްއާ ދެކޮޅަށެވެ. އަދި ފްރާންސް ނިކުންނާނީ ބެލަރުސްއާ ދެކޮޅަށެވެ.

ހޮނިހިރު ދުވަހުގެ ރޭ ކުޅުނު މެޗުން ޕޯޗުގަލް މޮޅުވީ އެންޑޯރާއާ ވާދަކޮށް 0-2 ގެ ނަތީޖާއަކުންނެވެ.

އެންޑޯރާ ދަނޑުގައި ކުޅުނު މި މެޗު ފެށިގެން ރަނގަޅަށް ކުޅުނީ ޕޯޗުގަލްއެވެ. އެގޮތުން އެޓީމުން ވަނީ އެންޑޯރާގެ ހާފަށް ބާރުބޮޑުކޮށް ގިނަ ހަމަލާތަކެއް ފޮނުވާލާފައެވެ.

ފުރަތަމަ ހާފް ނިމުނީ 0-0 ގެ ނަތީޖާއިން ދެޓީމު އެއްވަރުވެގެންނެވެ.

އެހެންނަމަވެސް ދެވަނަ ހާފަށް ޕޯޗުގަލް ނިކުތީ ބަދަލުތަކާއެކުގައެވެ. އެގޮތުން ދެވަނަ ހާފަށް އެޓީމުން ވަނީ ކެޕްޓަން ކްރިސްޓިއާނޯ ރޮނާލްޑޯވެސް ބަދަލު ކުޅުންތެރިޔެއްގެ ގޮތުގައި ބޭނުން ކޮށްފައެވެ.

ޕޯޗުގަލް އިން މެޗުގެ ލީޑު ނެގީ 65 ވަނަ މިނެޓުގައެވެ. މި ލަނޑު އެޓީމަށް ކާމިޔާބު ކޮށްދިނީ ބަދަލު ކުޅުންތެރިޔާ ރޮނާލްޑޯއެވެ. މި ލަނޑަށް ފަހު ޕޯޗުގަލް އިން ވަނީ އެޓީމުގެ އެޓޭކްތައް އިތުރައް ވަރުގަދަކޮށްފައެވެ.

އެގޮތުން މެޗުގެ ނިމުމުގެ ކުރިން ޕޯޗުގަލްއިން ވަނީ ލީޑު ފުޅާކޮށްފައެވެ. މި ލަނޑު 86 ވަނަ މިނެޓުގައި އެޓީމަށް ކާމިޔާބު ކޮށްދިނީ އެންޑްރޭ ސިލްވާއެވެ.

މި ނަތީޖާއާއެކު ޕޯޗުގަލް ވަނީ ނުވަ މެޗުން 24 ޕޮއިންޓް ހަމަކޮށް، ގްރޫޕްގެ ދެވަނައިގައި ހަމަޖެހިލާފައެވެ. އެއްވަނައިގައި 27 ޕޮއިންޓާއެކު އޮތީ ސްވިޒަލޭންޑެވެ. ގްރޫޕްގެ އެއްވަނައަށް ސީދާ ވޯލްޑްކަޕުން ޖާގަ ލިބޭއިރު، ދެވަނަ އަށް ޖެހޭނީ ޕްލޭއޮފް ކުޅޭށެވެ.

ގްރޫޕްގައި ބާކީ އެއް މެޗު އޮތްއިރު، ޕޯޗުގަލް ނިކުންނާނީ ސްވިޒަލޭންޑާ ދެކޮޅަށެވެ. އެ މެޗުން ޕޯޗުގަލް މޮޅުވެއްޖެނަމަ އެޓީމު ކޮލިފައިވާނެއެވެ. ލަނޑުގެ ތަފާތުން އެޑްވާންޓޭޖް އޮތީވެސް ޕޯޗުގަލްއަށެވެ.