އެއްދުވަހުން އަނެއް ދުވަހަށް ނިކަމެތިވަމުންދާއިރު، ހައްގު މިންވަރު ކަށަވަރުކުރުމަށް ހުރިހާ ރައްޔިތުން ތެދުވަން ޖެހޭ: މޭޔަރު ސައުދު
1 އޮކްޓޯބަރު 2026 | ބުރާސްފަތި 07:05ރާއްޖޭގެ އެކި ސަރަހައްދުތަކުގައި ހުރި ވަސީލަތްތަކުގެ ބޭނުން ހިފައި، އާބަން ސެންޓަރުތައް ގާއިމުކޮށްގެން ނޫނީ ހަގީގީ ތަރައްގީ ނާންނާނެ ކަމަށް ތިނަދޫ ސިޓީގެ މޭޔަރު ސައުދު ވިދާޅުވި. ވަކި ސަރަހައްދަކަށް އިސްކަންދިނުމުގެ ބަދަލުގައި ހަމަހަމަކަމާއެކު ވެރިކަންކުރާ ނިޒާމެއް ގާއިމުކުރުމަށް ރައްޔިތުން ތެދުވަންޖެހޭ ކަމަށް އޭނާ ފާހަގަކުރެއްވި
ރާއްޖެޓީވީގެ ފަލަސުރުހީ ޕްރޮގްރާމްގައި ތިނަދޫ ސިޓީގެ މޭޔަރު ސައުދު އަލީ ވާހަކަ ދައްކަވަނީ | ރާއްޖެއެމްވީ
ރާއްޖޭގެ އެކި ސަރަހައްދުތަކުގެ ރައްޔިތުން ދަނީ އެއްދުވަހުން އަނެއް ދުވަހަށް ނިކަމެތިވަމުން ކަމަށާއި، ރައްޔިތުންނަށް ލިބެންޖެހޭ ހައްގު މިންވަރު ކަށަވަރުކުރުމަށް ހުރިހާ ރައްޔިތުން ތެދުވަން ޖެހޭ ކަމަށް ތިނަދޫ ސިޓީގެ މޭޔަރު ސައުދު އަލީ ވިދާޅުވެއްޖެ އެވެ.
ބުދަ ދުވަހުގެ ރޭގެ ފަލަސުރުހީ ޕްރޮގްރާމްގައި ވާހަކަ ދައްކަވަމުން ސައުދު ވިދާޅުވީ، ތިނަދޫ، ހުވަދޫ އަތޮޅު، އައްޑޫ، ފުވައްމުލައް އަދި ބޮޑުތިލަދުންމަތީގެ ރައްޔިތުން ވެސް ތިބީ ދަތި ހާލުގައި ކަމަށާއި، ހަމައެކަނި ފިނިކޮޓަރީގައި ތިބެގެން ނިންމާ ނިންމުންތަކުން ރައްޔިތުންނަށް ހެޔޮވެރިކަމެއް ކޮށްނުދެވޭނެ ކަމަށެވެ. އަދި ސަރުކާރުންގެ އިސްވެރިންނާއި، ވަޒީރު ބޭފުޅުން އެ ސަރަހައްދުތަކަށް ގޮސް ހާލަތު ބަލަންޖެހޭ ކަމަށް އޭނާ ވިދާޅުވި އެވެ.
މި ސަރުކާރުން ސަރަހައްދީ ތަރައްގީ އާއި ވަސީލަތްތަކުގެ ބޭނުން ހިފަމުންދާ ގޮތަށް ކަންބޮޑުވުން ފާޅުކުރައްވައި ސައުދު ވިދާޅުވީ، ހުވަދު އަތޮޅުގައި އެކަނި ވެސް ރިސޯޓު ތަރައްގީ ކުރެވޭނެ 150 ރަށް އެބައޮތް ކަމަށާއި، ހަމައެކަނި ވަކި ސަރަހައްދެއްގެ ފަޅުތައް ހިއްކައިގެން ރިސޯޓު ހެދުމުން މުޅި ރާއްޖެއަށް ނަފާއެއް ނުލިބޭނެ ކަމަށެވެ.
އައްޑޫ، ކުޅުދުއްފުށި އަދި ފުވައްމުލައް ފަދަ ސަރަހައްދުތަކުގައި ގުދުރަތީ ވަސީލަތްތައް އެބަހުރި ކަމަށާއި، އެ ތަންތަނުގައި އާބަން ސެންޓަރުތައް ގާއިމުކޮށް ވަޒީފާގެ ފުރުސަތުތައް އުފައްދަންޖެހޭ ކަމަށް ސައުދު ވިދާޅުވި އެވެ.
މީގެއިތުރުން، އިންވެސްޓަރުންނަށް އިންވެސްޓްކުރުމުގެ ފުރުސަތުތައް ހަނިކުރާތީ އިންވެސްޓަރުންގެ މެދުގައި ބިރުވެރިކަމެއް އޮތް ކަމަށް ވެސް ސައުދު ފާހަގަކުރެއްވި އެވެ.
މިއަދު ރާއްޖޭގެ ހާލަތު ވަރަށް ގޯސްކަން ފާހަގަކުރައްވައި ސައުދު ވިދާޅުވީ، ވަކި ބަޔަކު ޖީބު ބޮޑުކުރަން މަސައްކަތްކުރާ މަންޒަރާއި ބިންތައް ދިރުވާލާ މަންޒަރު ފެންނަމުންދާތީ ރައްޔިތުން މިހާރު ވިސްނަން ޖެހޭ ކަމަށެވެ. އަދި އިންތިޚާބުތަކުގައި ކުޑަ ފައިސާކޮޅަކަށް ވޯޓު ދިނުމުގެ ސަގާފަތް ދޫކޮށްލަންޖެހޭ ކަމަށް ވެސް ވިދާޅުވި އެވެ.
ހަމައެކަނި ދޭ 500 ރުފިޔާ، 2000 ރުފިޔާ، 1500 ރުފިޔާއަށް ވޯޓުދޭ ކަމަށް ވަންޏާ ދުވަހަކު ވެސް މި ރާއްޖެ ސަލާމަތެއް ނުވާނެ. އަޅުގަނޑުމެން އެބަޖެހޭ ރާއްޖޭގެ ރައްޔިތުން ތެދުވަންސައުދު އަލީ
ސައުދު ވިދާޅުވީ، ގައުމާއި ރައްޔިތުންނަށް ހެޔޮ އެދޭ ކަމަށްވާނަމަ، ސިޔާސީ މަގާމުތަކުގައި ތިބޭ މީހުން ވެސް ހަމައެކަނި ސަނާ ކިޔުމުގެ ބަދަލުގައި، ރަށާއި ސަރަހައްދު ތަރައްގީ ކުރުމަށް މަސައްކަތްކުރަންޖެހޭ ކަމަށެވެ. އަދި އެފަދަ އަޅުވެތިކަމުން މިންޖުވެ ހަމަހަމަކަމާއެކު ވެރިކަން ކުރާނެ ނިޒާމެއް ގާއިމުކުރުމަށް ހުރިހާ ރައްޔިތުން ތެދުވުމަށް އޭނާ ގޮވާލެއްވި އެވެ.
