ޑޮލަރުގެ ތާށިކަން އޮތްއިރު އެމްޕީއެލްއަށް ޑޮލަރުން ފައިސާ ދައްކަން ޖެހެމުން ޝިޕިންގ ވިޔަފާރިވެރިންގެ ކަންބޮޑުވުން!
28 ސެޕްޓެމްބަރު 2026 | ހޯމަ 13:24ބޭންކްތަކުން ޑޮލަރު ލިބުން ދަތިވެފައިވާ ދަނޑިވަޅެއްގައި އެމްޕީއެލްގެ ޚިދުމަތްތަކަށް ޑޮލަރުން ފައިސާ ދައްކަން ޖެހުމުން ރާއްޖޭގެ އަމިއްލަ ޝިޕިންގ ކުންފުނިތަކަށް ޑޮލަރު ހޯދުމުގައި ބޮޑެތި ގޮންޖެހުންތަކެއް ކުރިމަތިވެ ކަންބޮޑުވުން ފާޅުކޮށްފި. ގާނޫނުގައި ދިވެހިރާއްޖޭގައި ދޭ ޚިދުމަތްތަކަށް ދިވެހި ރައްޔިތުން އަތުން ފައިސާ ނަގަންވާނީ ހަމައެކަނި ރުފިޔާއިން ކަމަށް އޮންނައިރު، ޝިޕިންގ ފްރެއިޓް ފަދަ ޚިދުމަތްތަކަށް ހަމައެކަނި ޑޮލަރުން ފައިސާ ހޯދުމަށް އެމްޕީއެލްއިން ކަނޑައަޅުމުން އެކަމުގެ ކަންބޮޑުވުން އަންނަނީ ވިޔަފާރިވެރިން ފާޅުކުރަމުން
ރާއްޖެ އަށް އެތެެރެކޮށްފައިވާ މުދާ ކޮންޓޭނަރެއް ބޭލުމުގެ މަސައްކަތް އެމްޕީއެލްގައި ކުރިއަށްދަނީ | އެމްޕީއެލް
ރާއްޖޭގެ އަމިއްލަ ޝިޕިންގ ވިޔަފާރިތަކުން ކޮންޓެއިނަރު ގެންގުޅުމަށާއި، ބަނދަރުގެ ހިދުމަތްތަކަށް މޯލްޑިވްސް ޕޯޓްސް ލިމިޓެޑް (އެމްޕީއެލް) އިން ޑޮލަރުން ފައިސާ ނަގަން ފެށުމުން ގިނަ ގޮންޖެހުންތަކަކާއި ކުރިމަތިލާން ޖެހި އެކަމުގެ ކަންބޮޑުވުން އެ ފަރާތްތަކުން ފާޅުކޮށްފި އެވެ.
އެމްޕީއެލްއިން 2024 ވަނަ އަހަރުގެ އޭޕްރީލް މަހުގެ ތެރޭގައި ބަނދަރުގެ ފީތަށް ވަނީ އަލުން ޑޮލަރުން ދައްކަން ޖެހޭ ގޮތަށް ބަދަލުކޮށްފައި އެވެ. އެއީ 20 ފޫޓުގެ ކޮންޓޭނަރަކަށް 195 އެމެރިކާ ޑޮލަރު އަދި 40 ފޫޓުގެ ކޮންޓޭނަރަކަށް ނަގާ ފީ 211 އެމެރިކާ ޑޮލަރެވެ. ނަމަވެސް ނިމިދިޔަ އޮގަސްޓް 26 ގައި ބޭރު ފައިސާއާ ބެހޭ ގާނޫނަށް ގެނައި އިސްލާހާ ގުޅިގެން ޑޮލަރު ލިބުން ދަތިވެފައިވާ ކަމަށް ވިޔަފާރިވެރިން އަންނަނީ ބުނަމުންނެވެ.
އެގޮތުން، ޒަރޫރީ ބޭނުންތަކަށް ނޫން ގޮތަކަށް ބޭންކްތަކުން ޑޮލަރު ދޫނުކުރާ ކަމަށް ވެސް ވިޔަފާރިވެރިން އަންނަނީ ބުނަމުންނެވެ. މިކަމުގެ ސަބަބުން ގިނަ ގޮންޖެހުންތަކެއް ވިޔަފާރިވެރިންނާ ވަނީ ކުރިމަތިލާން ޖެހިފަ އެވެ. އެއީ މޯލްޑިވްސް ސްޓޭޓް ޝިޕިންގ (އެމްއެސްއެސް) އާއި ލިލީ ޝިޕިންގ ފަދަ ރާއްޖޭގެ އަމިއްލަ ކުންފުނިތަކަށް ފައިސާ ލިބެނީ ދިވެހި ރުފިޔާއިން ކަމަށް ވެފައި، އަދި ބޭރުގެ ފަރާތްތަކުން ފައިސާ ފޮނުވަން 30 ދުވަހާއި 90 ދުވަހާ ދެމެދުގެ މުއްދަތެއް ނަގާތީ އެވެ. ކަން މިހެން އޮތް ނަމަވެސް މުދާ ބަރުކޮށްފައިވާ ބޯޓު ބަނދަރާ ކައިރިކުރުމާއެކު ވަގުތުން ޑޮލަރުން ފައިސާ ދެއްކުމަށް އެމްޕީއެލްއިން ދަނީ އަންގަމުންނެވެ.
އެމްޕީއެލްއިން ބަނދަރުގެ ފީތައް އަލުން ޑޮލަރަށް ބަދަލުކުރީ އެ ކުންފުންޏަށް ދިމާވެފައިވާ މާލީ ދަތިތަކަށް ހައްލެއް ހޯދުމުގެ ގޮތުން ކަމަށާއި އެމްޕީއެލްގެ އުޅަނދުތަކާއި ތަރައްގީގެ މަޝްރޫއުތަކުގެ ދަރަނި އަދާކުރުމަށް ޑޮލަރުގެ ސްޓްރީމެއް ބޭނުން ވެގެން ކަމަށް އެމްޕީއެލްއިން މައުލޫމާތު ދީފައިވެ އެވެ.
ޝިޕިންގ ވިޔަފާރިވެރިންގެ މި ކަންބޮޑުވުންތަކަށް ހައްލެއް ހޯދައިދިނުމަށް އެމްޕީއެލްއިން މަސައްކަތް ކުރަމުންދޭތޯ ރާއްޖެއެމްވީން އެމްޕީއެލްގެ މީޑިއާ އޮފިސަރާއި ސުވާލު ދެންނެވުމުން ވަނީ ރަސްމީކޮށް ކުންފުންޏާ އެފަދަ ކަންބޮޑުވުމެއް ހުށަހަޅާފައިވޭތޯ ޖެހޭނީ ބަލާލަން ކަމަށް ވިދާޅުވެފަ އެވެ.
ރައީސް ޑރ. މުހައްމަދު މުއިއްޒުގެ ސަރުކާރުން ދަނީ ޑޮލަރުގެ މައްސަލަ ހައްލު ކުރުމަށް ކަމަށް ބުނެ ގިނަ ގާނޫނުތަކަށް އިސްލާހު ގެންނަމުންނެވެ. އެގޮތުން ރިސޯޓުތަކަށް ލިބޭ ޑޮލަރުގެ އާމްދަނީން 40 އިންސައްތަ ރާއްޖޭގެ ބޭންކުތަކަށް މާރުކުރަން މަޖުބޫރުވާ ގޮތަށް ގާނޫނަށް އިސްލާހު ގެނެސް އަދި ޑޮލަރުގެ ރަސްމީ ރޭޓަށްވުރެ ބޮޑުކޮށް ޑޮލަރު ވިއްކާ، އަދި އެ ވާހަކަ ދެއްކުން މަނާ ކުރާ ގޮތަށް ގާނޫނަށް ބަދަލު ގެނެސްފައިވެ އެވެ.
އަދި ބޭންކް އޮފް މޯލްޑިވްސް (ބީއެމްއެލް) އިން ވެސް ވަނީ ޑޮލަރުގެ މައްސަލަ ހައްލު ކުރުމަށް ފިޔަވަޅުތަކެއް އަޅާފަ އެވެ. އެގޮތުން، ބޭންކަށް ޑޮލަރު ލިބޭ މިންވަރާއި ހޭދަވާ މިންވަރު އެއްހަމައެއްގައި ހިފެހެއްޓުމަށް އީ-ކޮމާސް މުއާމަލާތްތައް ލިމިޓްކޮށް، ޒަރޫރީ އަދި ކޮންމެހެން ބޭނުންތެރި މުއާމަލާތްތަކަށް ވަނީ އިސްކަންދޭން ފަށާފަ އެވެ.
ނަމަވެސް މިއިން އެއްވެސް ކަމަކުން ޑޮލަރުގެ ދަތިކަމަށް ހައްލެއް ނާންނަ ކަމަށް އާންމު ރައްޔިތުން އަދި ވިޔަފާރިވެރިން ވެސް އަންނަނީ ބުނަމުންނެވެ.
ޝިޕިންގ ވިޔަފާރި ކުރާ ފަރާތްތަކުން ފާހަގަކުރާގޮތުގައި، ރާއްޖޭގެ ޓޫރިޒަމް ސިނާއަތުގެ ޑޮލަރު ވިޔަފާރީގެ ޖޫރިމަނާތަކާއި ޤަވާއިދުތައް ހަރުކަށިކުރަމުންދާ ފަދައިން، ޝިޕިންގ ދާއިރާގެ ކުދި އަދި މެދުފަންތީގެ ކުންފުނިތަކަށް ވެސް މި ޕްރެޝަރުތައް ދަނީ އިންތިހާއަށް ބޮޑުވަމުންނެވެ.
މީގެ އިތުރުން، ގާނޫނުގައި ދިވެހިރާއްޖޭގައި ދޭ ޚިދުމަތްތަކަށް ދިވެހި ރައްޔިތުން އަތުން ފައިސާ ނަގަންވާނީ ހަމައެކަނި ރުފިޔާއިން ކަމަށް އޮންނައިރު، ޝިޕިންގ ފްރެއިޓް ފަދަ ޚިދުމަތްތަކަށް ހަމައެކަނި ޑޮލަރުން ފައިސާ ހޯދުމަށް އެމްޕީއެލްއިން ކަނޑައަޅުމުން އެކަމުގެ ކަންބޮޑުވުން އަންނަނީ ވިޔަފާރިވެރިން ފާޅުކުރަމުންނެވެ.
