ކޮމާޝަލް ބޭންކް އޮފް މޯލްޑިވްސްއަށް 10 އަހަރު!
28 ސެޕްޓެމްބަރު 2026 | ހޯމަ 07:50ކޮމާޝަލް ބޭންކް އޮފް މޯލްޑިވްސް (ސީބީއެމް) އާއި ވިސާ ގުޅިގެން ރާއްޖޭގެ ވިޔަފާރިތަކަށް ޚާއްސަ "ވިސާ ބިޒްނަސް ޑެބިޓް" އަދި "ވިސާ ކޯޕަރޭޓް ކްރެޑިޓް" ކާޑު ތައާރަފުކޮށްފި. މި ކާޑުތަކުގެ ސަބަބުން ވިޔަފާރިތަކުގެ ދުވަހުން ދުވަހަށް ކުރާ ޚަރަދުތައް ބެލެހެއްޓުމަށާއި ޑިޖިޓަލްކޮށް ފައިސާގެ މުއާމަލާތްތައް ހިންގުމަށް ބޮޑެތި ފަސޭހަތަކެއް ލިބިގެންދާނެ
ކޮމާޝަލް ބޭންކް އޮފް މޯލްޑިވްސް (ސީބީއެމް) އަށް 10 އަހަރު ފުރުން ކުލަގަދަކޮށް ފާހަގަކުރުން | ރާއްޖެ އެމްވީ
ކޮމާޝަލް ބޭންކް އޮފް މޯލްޑިވްސް (ސީބީއެމް) އަށް 10 އަހަރު ފުރުން ކުލަގަދަކޮށް ފާހަގަކޮށްފި އެވެ.
ސީބީއެމްގެ ދިހަ އަހަރުގެ ހަފްލާ ކުލަގަދަކޮށް ބާއްވާފައިވާއިރު، މި ހަފްލާގައި އެ ބޭންކުގެ އިސް ބޭފުޅުންނާއި މުވައްޒަފުން ވަނީ ބައިވެރިވެފަ އެވެ.
މި ޚާއްސަ ހަފްލާގައި ޑިޖިޓަލް ދައުރުގެ ދުނިޔޭގެ އިސްކޮށް ހިނގާ ވިސާ ކުންފުނި ގުޅިގެން، ރާއްޖޭގެ ވިޔަފާރިތަކަށް ހާއްސަ އާ ދެ ކާޑެއް ވެސް ވަނީ ނެރެފަ އެވެ. މި ދެ ކާޑަކީ ވިސާ ބިޒްނަސް ޑެބިޓް ކާޑާއި ވިސާ ކޯޕަރޭޓް ކްރެޑިޓް ކާޑެވެ.
މި ދެ ކާޑު ރަސްމީކޮށް ނެރެފައިވަނީ، ބޭންކުން ކަސްޓަމަރުންނަށް ފޯރުކޮށްދޭ ފައިސާގެ ހައްލުތަކުގެ ތެރެއިން އިތުރު މުހިންމު ހިދުމަތެއްގެ ގޮތުގަ އެވެ. ވިޔަފާރިތަކުގެ ދުވަހުން ދުވަހަށް ކުރާ ހަރަދުތައް ބެލެހެއްޓުމަށް މި ދެ ކާޑުން ވަރަށް ބޮޑަށް ފަސޭހަކަމާއި ކޮންޓްރޯލް ލިބިގެންދާނެ އެވެ.
ސީބީއެމްއިން މައުލޫމާތުދޭ ގޮތުގައި މި ކާޑުތަކުގެ ސަބަބުން ވިޔަފާރިތަކަށް ސަލާމަތާއި ހަރުދަނާ ގޮތެއްގައި ފައިސާ ދެއްކޭނެ އެވެ. އަދި ވިޔަފާރީގެ ހަރަދުތައް ރަނގަޅަށް ބެލެހެއްޓުމާއި ކޭޝް ބޭނުންކުރުން މަދުކުރެވޭނެ އެވެ.
މި ހިދުމަތާ ގުޅިގެން ސީބީއެމްގެ މެނޭޖިން ޑިރެކްޓަރު އެލްމޯ ސޫރިޔާރައްޗީ ވިދާޅުވީ، މި ދެ ކާޑު ނެރުމަކީ ޒަމާނީ، ސަލާމަތާއި ފަސޭހަ ބޭންކިން ހައްލުތައް ފޯރުކޮށްދިނުމުގެ މަގުގައި އަޅާ މުހިންމު ފިޔަވަޅެއް ކަމަށެވެ.
އޭނާ ވިދާޅުވީ މިއަދުގެ ވިޔަފާރިތަކަށް ފައިސާގެ މުއާމަލާތްތައް ބެލެހެއްޓުމަށް ފަސޭހަކަމާއި ހަރުދަނާކަން ބޭނުންވާ ކަމަށާއި، ވިސާ ކުންފުނީގެ ބައިވެރިވުމާއެކު ކަސްޓަމަރުންގެ ބޭނުންތަކަށް އެކަށީގެންވާ ހައްލުތައް ފޯރުކޮށްދެވޭނެ ކަމަށެވެ. ރާއްޖޭގައި ޑިޖިޓަލް ދައުރުގެ ވިޔަފާރި މާހައުލެއް ބިނާކުރުމަށް މަސައްކަތް ކުރައްވާނެކަމަށް ވެސް އޭނާ ވިދާޅުވި އެވެ.
ވިސާގެ ސްރީލަންކާއާއި ދިވެހިރާއްޖޭގެ ކަންޓްރީ މެނޭޖަރު އަވަންތީ ކޮލޮމްބާޖް ވިދާޅުވީ، ރާއްޖޭގެ ވިޔަފާރިތައް ކުރިއަރަމުންދާއިރު، ވިޔަފާރިތަކުން ފައިސާ ދެއްކުމާއި ހަރަދުތައް ބެލެހެއްޓުމަށް ރަނގަޅު، ސަލާމަތާއި ހަރުދަނާ ގޮތްތައް ބޭނުންވާ ކަމަށެވެ. ވިސާ އިން ދުނިޔޭގެ ތަޖުރިބާ ގެނެސްގެން ސަލާމަތާއި ހަރުދަނާ ޑިޖިޓަލް ދައުރުގެ ހައްލުތައް ފޯރުކޮށްދެވޭނެ ކަމަށް އޭނާ ވިދާޅުވި އެވެ.
ސީބީއެމް ވިސާ ބިޒްނަސް ޑެބިޓް ކާޑަކީ ވިޔަފާރިތަކަށް އެމީހުންގެ ވިޔަފާރި އެކައުންޓުން ސީދާ ފައިސާ ބޭނުންކޮށްގެން ވިޔަފާރީގެ ހަރަދުތައް ކުރެވޭނެ ކާޑެކެވެ. ސީބީއެމް ވިސާ ކޯޕަރޭޓް ކްރެޑިޓް ކާޑަކީ ކޯޕަރޭޓް ކަސްޓަމަރުންނަށް ހާއްސަ ކްރެޑިޓް ފެސިލިޓީއަކުން ވިޔަފާރީގެ ހަރަދުތައް ބެލެހެއްޓޭނެ ކާޑެކެވެ.
މި ދެ ކާޑުން ވިސާގެ ދުނިޔޭގެ ނެޓްވޯކުން ރާއްޖޭގައާއި ބޭރުގައި ފައިސާ ދެއްކުމުގެ ފުރުސަތު ލިބިގެންދާނެ އެވެ. މި ކާޑުތައް ނެރުމަކީ ސީބީއެމުން ކޯޕަރޭޓް އަދި ކުދި އަދި މެދުފަންތީގެ ވިޔަފާރިތަކަށް ދޭ ހިދުމަތްތައް ވަރުގަދަކުރުމުގެ މަސައްކަތުގެ ބައެކެވެ.
މި ރަސްމިއްޔާތުގައި ސީބީއެމް އިން ވަނީ "މައިސީބީއެމް" ގެ ނަމުގައި ރީޓެއިލް ކަސްޓަމަރުންނަށް ހާއްސަ ޑިޖިޓަލް އެޕްލިކޭޝަނެއްވެސް ތައާރަފްކޮށްފަ އެވެ. މި އެޕްލިކޭޝަނަކީ ކުރިން ހިންގަމުން އައި އެޕްލިކޭޝަންގައި ހިމެނޭ ހުރިހާ ފީޗާތަކާއެކު އިތުރު ފީޗާތަކެއް އިތުރުކޮށް، ބޭނުންކުރަން ވަރަށް ފަސޭހަ އަދި ފައިދާހުރި ގޮތަކަށް ތައްޔާރުކޮށްފައިވާ އެޕްލިކޭޝަނެކެވެ.
މައި ސީބީއެމް އެޕްލިކޭޝަނަކީ ކަސްޓަމަރުންނަށް އެންމެ ފަސޭހަ އަދި އަވަސް ގޮތެއްގައި ބޭންކިން ހިދުމަތްތައް ލިބިގެންދާނެ ގޮތަށް ޑިޒައިންކޮށްފައިވާ އެޕްލިކޭޝަނެއް ކަމަށް އެ ބޭންކުން ބުނެ އެވެ.
މި އެޕްލިކޭޝަންގައި ކުރިން ހިންގަމުން އައި އެޕްލިކޭޝަންގައި ހިމެނޭ ހުރިހާ ހިދުމަތްތަކެއް ހިމެނޭއިރު، އިތުރު ހިދުމަތްތަކާއި ފީޗާތައް އިތުރުކޮށްފައިވާތީ، ކަސްޓަމަރުންނަށް އިތުރު ފަސޭހަތަކެއް ލިބިގެންދާނެ އެވެ.
ޑިޖިޓަލް ބޭންކިން ހިދުމަތްތައް ތަރައްގީކުރުމަށް ސީބީއެމުން ކުރަމުން އަންނަ މަސައްކަތްތަކުގެ ތެރެއިން މި އެޕްލިކޭޝަން ތައާރަފްކުރުމަކީ މުހިންމު ފިޔަވަޅެއް ކަމަށް އެ ބޭންކުން ބުނެ އެވެ.
