ސައުދީ ޢަރަބިއްޔާއިން އިސްވެ ޔަމަނުގައި ކުރިއަށް ގެންދާ ޤަތުލު އާންމާ ގުޅިގެން ސައުދީ ޢަރަބިއްޔާއިން އެކުލަވާލާފައިވާ އަސްކަރީ ކޯލީޝަން، ކުޑަކުދިންނާއި ދެކޮޅަށް ޖަރީމާތައް ހިންގާ ބައެއްގެ ގޮތުގައި އދ. އިން ބްލެކް ލިސްޓު ކުރުމާއެކު ދިވެހިރާއްޖެ ސައުދީ އަރަބިއްޔާގެ އަސްކަރީ ކޯލީޝަނުން މިހާރުން މިހާރަށް ވަކިވުމަށް ދިވެހިރައްޔިތުންގެ ޑިމޮކްރަޓިކް ޕާޓީ (އެމްޑީޕީ) އިން ގޮވާލައިފިއެވެ.

އެ ޕާޓީން ހޮނިހިރު ދުވަހު ނެރުނު ބަޔާނެއްގައި ބުނެފައިވަނީ، ސައުދީ ޢަރަބިއްޔާއިން އެކުލަވާލާފައިވާ ކޯލީޝަނުން ކުރިއަށް ގެންދާ ޤަތުލު ޢާންމުގައި މައުސޫމް ކުޑަކުދީންނާއި، އަންހެނުން އަދި އެތައްހާސް އާންމު ރައްޔިތުން މެރުމާއި، ރައްޔިތުން ދިރިއުޅޭ ހިސާބުތަކަށް ބޮން އެޅުމާއި މިފަދަ ލާއިންސާނީ ކަންކަން ކުރިއަށްގެންދާތީ، ފައިތުވީ ހަފްތާގައި އދ. ގެ ސެކެޓަރީ ޖެނެރެލް މި އަސްކަރީ ކޯލީޝަން ”ލަދުގެ ލިސްޓު“ ގައި ހިމަނުއްވާފައިވާ ކަމަށެވެ.

24 އޯގަސްޓުގައި އދ. އިން އާންމު ކުރި ރިޕޯޓުގައި ބުނެފައި ވަނީ، ސައުދީގެ ކޯލީޝަނުން ޔަމަނަށް ދެމުންދާ ރަޙުމެއްނެތް އަނިޔާވެރި ޙަމަލާތަކުގެ ސަބަބުން ގާތްގަނޑަކަށް 700 ކުޑަކުދިން މަރުވެ، 40 ސްކޫލާއި ހޮސްޕިޓާ ބިމާ ހަމަވެފައިވާ ކަމަށެވެ.

އެމްޑީޕީން ބުނީ، އދގެ "ލަދުގެ ލިސްޓު" ގައި ސައުދީގެ ކޯލީޝަން ހިމެނިގެންދިއުމާއެކު ދިވެހިރާއްޖެ ފެނިގެންދަނީ މުސްލިމް މައުސޫމް ތުއްތުކުދިންނާއި އަންހެނުންނަން އަނިޔާވެރި ހަމަލާދީ މަރަމުން ގެންދިއުމުގެ ލަދުވެތި ލާއިންސާނީ ޖަރީމާތަކުގައި ބައިވެރިވާ ބައެއްގެ ގޮތުގައި ކަމަށެވެ. އަދި މިފަދަ ލާއިންސާނީ ޢަމަލުތައް ހިންގާ ބައެއްގެ ކޯލީޝަނަކާ ދިވެހިރާއްޖެއިން ގުޅިފައިވާކަމީ ނުހަނު ކަންބޮޑުވާ ކަމެއްކަން ފާހަގަކޮށް، އެމްޑީޕީން ބުނީ، ދިވެހިރާއްޖެއަކީ ޞުލްޙައަށް ލޯބިކުރާ ޤައުމަކަށް ވީހިނދު، މިފަދަ އަނިޔާވެރިކަމެއް ކުރާ ބައެއްގެ މަސައްކަތްތަކަށް ހިތްވަރުދީ ޢަމަލީ ގޮތުން ސައުދީ އިން ހިންގާ މިފަދަ ކަންކަމުގައި ބައިވެރިވުމަކީ ދިވެހި ދައުލަތުންނާއި ދިވެހި އަސްކަރިއްޔާ އިން ކޮށްގެންވާނެ ކަމެއް ނޫން ކަމަށެވެ.

އެމްޑީޕީގެ ބަޔާނުގައި  އިތުރަށް ބުނެފައި ވަނީ، މިކަމުގެ ސަބަބުން ދިވެހިރާއްޖޭގެ ނަން ބޭރު ދުނިޔޭގައި  އިތުރަށް ކިލަނބުވެ، ރާއްޖެ އެކަހެރިވެގެންދާނެ ކަމަށާ، ސިޔާސީ މަންފާއެއް ޙާސިލް ކުރުމަށް މިފަދަ ލާއިންސާނީ ކަންކަމުގައި ދިވެހި އަސްކަރިއްޔާ ބޭނުންކުރުމަކީ ކަންބޮޑުވާ ކަމެއް  ކަމަށެވެ.

ޔަމަނުގައި ހަރަކާތްތެރިވާ އަސްކަރީ ކޯލީޝަނުން ރާއްޖެ ވަކިވުމަށް އެމްޑީޕީން ގޮވާލި ނަމަވެސް، އދ އިން "ލަދުގެ ލިސްޓް" ގައި ހިމަނައި، ބްލެކްލިސްޓް ކޮށްފައިވާ ސައުދީގެ އަސްކަރީ ކޯލީޝަންގައި ރާއްޖެއެއް  ނުހިމެނެއެވެ. އދ ބްލެކްލިސްޓް ކޮށްފައި ވަނީ، 2015 ވަނަ އަހަރުގެ މާޗް  މަހު ސައުދީން އިސްވެ އޮވެ، އަބްދުރައްބު މަންސޫރު ހާދީގެ ސަރުކާރަށް ވާގިވެރި ވުމަށާއި، ޔަމަނުގެ ހޫޡީންނާއި ދެކޮޅަށް ހަނގުރާމަ ކުރުމަށް އުފެއްދި ކޯލީޝަނެކެވެ. އެ ކޯލީޝަންގައި ސައުދީ އަރަބިއާގެ އިތުރުން ދެން ހިމެނެނީ، އެކުވެރި އަރަބި އިމާރާތް، ބަޚްރެއިން، ކުވެއިތު، މިޞްރު، އުރުދުން، މޮރޮކޯ، ސެނެގޯލް އަދި ސޫދާނެވެ. މި ކޯލީޝަންގައި ކުރިން ޤަތަރު ހިމެނުނު ނަމަވެސް، ސައުދީ އާއި ދެމެދު އުފެދުނު ސިޔާސީ ނުތަނަވަސްކަމަށް ފަހު، މި އަހަރުގެ ޖޫން މަހު ޤަތަރު ވަނީ މި ކޯލިޝަނުން ބޭރު ކޮށްފައެވެ. މި ކޯލިޝަނަށް ވާގިވެރިވާ ޤައުމުތަކުގެ ތެރޭގައި ހިމެނެނީ އެމެރިކާ، އިނގެރޭސިވިލާތް، ފްރާންސް، ތުރުކީ، އަދި ބެލްޖިއަމްއެވެ.

އދ އިން "ލަދުގެ ލިސްޓް" ގައި ހިމަނައި، ބްލެކްލިސްޓް ކޮށްފައިވާ ސައުދީގެ އަސްކަރީ ކޯލީޝަންގައި ރާއްޖެ ނުހިމެނުނު ނަމަވެސް، 2015 ވަނަ އަހަރުގެ ޑިސެމްބަރު މަހު، މައިގަނޑުގޮތެއްގައި ހަނގުރާމަވެރި ދައީޝް ޖަމާޢަތާއި ހަނގުރާމަ ކުރުމަށް ސައުދީ އިސްވެ އޮވެ އުފެއްދި، އިސްލާމިކް މިލިޓަރީ އެލަޔަންސް (އިސްލާމިކް މިލިޓަރީ އެލަޔަންސް ޓު ފައިޓް ޓެރަރިޒަމް)، ނުވަތަ ޓެރަރިޒަމާއި ދެކޮޅަށް ހަނގުރާމަކުރާ އިސްލާމީ އިއްތިހާދުގައި ދިވެހިރާއްޖެ ހިމެނެއެވެ. ރާއްޖޭގެ އިތުރުން 40 ޤައުމެއް ހިމެނޭ މި ކޯލިޝަންގައި ރަސްމީކޮށް ރާއްޖެއިން އަދާކުރާނެ ދައުރެއް މިހާތަނަށް ހާމަކޮށްފައި ނުވާއިރު، މި ކޯލިޝަނުން، އަސްކަރީ ތަމްރީނުތަކެއް ކުރިއަށްގެންދިއުން ނޫން އިތުރު ކަމެއް ކޮށްފައި ނުވެއެވެ.