ރައީސް މުއިއްޒު އަށް ހީފުޅުވަނީ މުޅި މި ގައުމަކީ އެމަނިކުފާނުގެ މިލްކެކޭ، މިވަރަށް ރައްޔިތުން އަޅުވެތިވެ ނިކަމެތިވި ވެރިކަމެއް ނާދޭ: ޑރ. ޖަމީލް
18 ސެޕްޓެމްބަރު 2026 | ހުކުރު 17:39ސަރުކާރު ހިންގާ ޕާޓީ، ޕީއެންސީއަށް މެންބަރުން އިތުރުކުރުމަށް ރައްޔިތުންނަށް ބިރުދައްކައި ވަޒީފާގެ ނުފޫޒު ފޯރުވަމުންދާކަމަށް ކުރީގެ ނައިބު ރައީސް ޑރ. މުހައްމަދު ޖަމީލް އަހުމަދު ތުހުމަތުކުރައްވައިފި. މި ސަރުކާރުން ރައްޔިތުންގެ ކަރާމާތަށް އަރައިގަނެ އަޅުވެތިކުރަމުންދާ ކަމަށާއި، ނަމަވެސް ރައްޔިތުން މިހާރު ތިބީ މިކަންކަމަށް ހޭލުންތެރިވެފައިކަމަށް ޖަމީލް ވިދާޅުވި
ކުރީގެ ނައިބު ރައީސް ޑރ. މުހައްމަދު ޖަމީލް އަހުމަދު | ރާއްޖެއެމްވީ
ރައީސް ޑރ. މުހައްމަދު މުއިއްޒު އާއި އެމަނިކުފާނުގެ ޕާޓީގެ ބޭފުޅުންނަށް މި ދިވެހިރާއްޖެ އަކީ އެ ބޭފުޅުންގެ މިލްކެއް ކަމަށް ހީފުޅުކުރެއްވި ނަމަވެސް، މިއީ އެ ބޭފުޅުންގެ މިލްކެއް ނޫން ކަމަށް ކުރީގެ ނައިބު ރައީސް ޑރ. މުހައްމަދު ޖަމީލް އަހުމަދު ވިދާޅުވެއްޖެ އެވެ.
ރާއްޖެޓީވީގެ ޓީވީ ޓޯކް ޕްރޮގްރާމްގައި ވާހަކަފުޅު ދައްކަވަމުން ޑރ. ޖަމީލް ވިދާޅުވީ ޕީއެންސީ އަށް މެންބަރުން އިތުރު ކުރަން ސަރުކާރުން ކުރާ މަސައްކަތުން މިއީ ރޭހެއްތޯ ވެސް ހީވާ ކަހަލަ ކަމަށެވެ. ނުވަތަ ވެރިކަން ލިބޭނީ އެންމެ ގިނަ ބަޔަކު ސޮއި ކުރާ ޕާޓީއަކަށް ކަމަށް ހީއްކޮށްގެން ގަދަކަމުން މީހުން އެ ޕާޓީ އަށް ވައްދަން މަސައްކަތް ކުރަނީ ކަމަށް ވެސް ވެދާނެ ކަމަށް ޑރ. ޖަމީލް ވިދާޅުވި އެވެ.
ތިން ވަނަ ކަމެއްގެ ގޮތުގައި ޑރ. ޖަމީލް ފާހަގަ ކުރެއްވީ މެންބަރުން އިތުރުވުމުން ލިބޭ މާލީ މަންފާ އެވެ. އެގޮތުން ޕާޓީގެ މެންބަރުންގެ ނިސްބަތަށް ބަލައި ގިނަ ފައިސާ ލިބޭނެތީ މީހުން އިތުރު ކުރަނީ ކަމަށް ވެދާނެ ކަމަށް ވެސް ޑރ. ޖަމީލް ވިދާޅުވި އެވެ. އެހެން ނަމަވެސް އެކަން މި ސަރުކާރުން ކުރަނީ ރައްޔިތުންނަށް ބިރު ދައްކައިގެން ކަމަށާއި މިގައުމާއި މި ގައުމުގެ ހުރިހާ ރައްޔިތުން މިއަދު މި ސަރުކާރުން ނިކަމެތި ކޮށްލާފައިވާ ކަމަށް ވިދާޅުވި އެވެ.
އެއްވެސް ވެރިއަކު އަޅުގަނޑަކަށް ހިޔެއް ނުވޭ ރާއްޖޭގެ ރައްޔިތުން މި މިންވަރަށް އެއްވެސް ޕާޓީއަކުން ވެސް، އެއްވެސް ވެރިއަކު ވެސް މި މިންވަރަށް ރާއްޖޭގެ ރައްޔިތުންނަށް ނިކަމެތިކޮށްލި ހެނެއް. އިންސާނަކަށް ދެވޭނެ އެންމެ ބޮޑު އަނިޔާ، އޭނަގެ ނަފްސުގެ އިއްޒަތް، އޭނަގެ ކަރާމާތް، އަޅުގަނޑުމެން ކޮންމެ މީހަކުވެސް ހިނގާ ބިނގާވެ މިއުޅެނީ، އަޅުގަނޑު ގަބޫލު ކުރާ ގޮތުގައި އަމިއްލަ ނަފްސުގެ ކަންތައްތައް ނިންމާނީ އަޅުގަނޑޭ. އެހެންވީމާ އަޅުގަނޑަށް މިނިވަންކަން އޮންނާނެއޭ. އެ މިނިވަންކަން އޮންނަ ކަމަށް ގަބޫލު ކޮށްގެންނޭ ކޮންމެ މީހަކު މި އުޅެނީ. އެކަމު މިއަދުގެ ހަގީގަތަކީ ވަޒީފާ ބޭނުން ހެއްޔޭ. ވަޒީފާ ބޭނުންކަމުގައި ވާނަމަ، ޕީއެންސީ އަށް ސޮއި ކުރާށޭ. މި މިންވަރަށް ރާއްޖޭގެ ރައްޔިތުން އަޅުވެތި ކޮށްފި. އެއީ ވެސް ހަމަ މީހެއް. އޭނަ ހިޔެއް ނުކުރާނެތާ ވަޒީފާ އަކީ އެއްގޮތަކަށް ވެސް ރައީސް މުއިއްޒު ދެއްވައިގެން، ޕީއެންސީ އިން ދީގެން އުޅޭ އެއްޗެކޭ. މިހާރު ހީވާ ކަހަލަ މުޅި ތަން ބިލޯންގްސް ނުވަތަ މުޅި ތަނުގެ މިލްކުވެރިއަކީ މުއިއްޒު އޭޑރ. މުހައްމަދު ޖަމީލް އަހުމަދު
ޑރ. ޖަމީލް އިތުރަށް ވިދާޅުވީ މިއަދު މި ސަރުކާރުން ރައްޔިތުންނަށް ވިސްނައިދޭން މަސައްކަތް ކުރަނީ ވަޒީފާ ވެސް ލިބެނީ އަދި އެހެން ކަމެއް ވެސް ވަނީ މި ސަރުކާރާ ރައީސް މުއިއްޒުގެ ހެޔޮފުޅު ކަމުން ކަމަށެވެ. އެހެން ނަމަވެސް މި ސަރުކާރާއި ރައީސް މުއިއްޒު ރައްޔިތުން އަޅުވެތިކޮށް، ނިކަމެތި ކުރަމުންދާކަން އެނގޭ ކަމަށާއި އެކަން ރައްޔިތުންނަށް މިހާރު އޮޅުވާ ނުލެވޭނެ ކަމަށް އޭނާ ވިދާޅުވި އެވެ.
އެއަށްވުރެ ރައްޔިތުން ހޭލުންތެރި ކަމަށާއި، ކުރިއަށް އޮތް ތަނުގައި މި ސަރުކާރަށް، މިކަންކަން އެނގި ހާމަވެގެން ދާނެ ކަމަށް ވެސް ޑރ. ޖަމީލް ވިދާޅުވި އެވެ.
