ރަޝިއާ ދަތުރުފުޅުގައި ސައުދީ ރަސްގެފާނުގެ ރަން އެސްކަލޭޓަރ މަސައްކަތެއް ނުކުރި

ހުސްވި ހަފްތާގެ ބުދަ ދުވަހު ތާރީޚީ ދަތުރުފުޅެއްގައި ސައުދީ އަރަބިއްޔާގެ ރަސްގެފާނު ސަލްމާން ބިން އަބްދުލް އަޒީޒް ރަޝިއާގެ ވެރިރަށް މޮސްކޯއަށް ވަޑައިގެން އެމަނިކުފާނުގެ ޕްރައިވެޓް ޖެޓުން ފައިބައިވަޑައިގަންނަވަން ތައްޔާރުވެ ވަޑައިގެންނެވި ވަގުތު ބޯޓުން ފައިބާވަޑައިގަތުމަށް ބޭނުންފުޅު ކުރައްވާ ރަން އެސްކަލޭޓަރ މަސައްކަތެއް ނުކުރިއެވެ.

މެދަކާ ހަމައިން ރަން އެސްކަލޭޓަރ ހުއްޓުމުން އެމަނިކުފާނަށް ޝޮކެއް ލިބިވަޑައިގެން ދެން ހައްދަވާނެ ގޮތެއް ވިސްނާވަޑައިގަތުމަށް އިރުކޮޅަކު ހުއްޓިވަޑައިގެން ހުންނެވި ކަމަށް މަންޒަރު ދުށް މީހުން ބުނެފައިވާ ކަމަށް ރިޕޯޓުތަކުގައި ވެއެވެ. ވިއްސަކަށް ސިކުންތު ވަރު ހުއްޓިވަޑައިގެން ހުންނެވުމަށްފަހު އެންމެ މަހުން ފައިންޅުގައި ސިޑިތަކުން މަޑުމަޑުން ތިރިއަށް ފައިބާވަޑައިގަންނަވަން ފެއްޓެވީއެވެ.

މިއީ ރަސްގެފާނުގެ މި ތާރީޚީ ދަތުރުފުޅު ފެށިގެން އައި ގޮތެވެ. މިއީ ސައުދީ ރަސްކަލަކު ރަޝިއާ އަށް ރަސްމީ ދަތުރުފުޅެއްގައި ވަޑައިގެންނެވި ފުރަތަމަ ފަހަރެވެ.

ހަތަރު ދުވަހުގެ ރަސްގެފާނުގެ މި ދަތުރުފުޅުގައި ރަޝިއާގެ ރައީސް އާ އެކު ސީރިއާ ހަނގުރާމަ އާއި ވިޔަފާރި އާއި، ތެލުގެ އަގާ ބެހޭ ގޮތުން މަޝްވަރާ ކުރައްވާފައި ވެއެވެ.

ސައުދީ ރަސްގެފާނު ބޭރު ގައުމުތަކަށް ކުރައްވާ ދަތުރުފުޅުތަކަކީ އެތައް އިންތިޒާމްތަކެއް މާ ދުރާލާ ކުރެވިގެން ކުރައްވާ ދަތުރުފުޅުތަކެކެވެ. މިއަހަރުގެ މާޗް މަހު އިންޑޮނީޝިއާ އަށް ކުރެއްވި ދަތުރުފުޅުގައި 500 ޓަނުގެ ލަގެޖް ގެންދެވިއެވެ. އަދި އެހީތެރިންގެ ގޮތުގައި 1000 މީހުން ޚިދުމަތުގައި އުޅެފައިވެއެވެ. ކައްކާ މީހުންގެ ގޮތުގައި 150 މީހުން ހަރަކާތްތެރިވިއެވެ. ޖަކާޓާ މިސްކިތައް ކުރެއްވި ޒިޔާރަތުގައި އެ މިސްކިތުގައި ރަސްގެފާނަށް ޚާއްސަ ވީ.އައި.ޕީ ފާޚާނާ އެއް ބިނާ ކުރިއެވެ.