ސްޕެއިންގެ ބާސެލޯނާ އާއިއެކު އުމުރު ދުވަހުގެ އެއްބަސްވުމެއްގައި އެ ޓީމުގެ ކެޕްޓަން އަންދްރޭސް އިނިއެސްޓާ ސޮއިކޮށްފިއެވެ.

2010 ވަނަ އަހަރުގެ ވޯލްޑްކަޕް ސްޕެއިންއަށް ކާމިޔާބު ކޮށްދިން ހުނަރުވެރި މިޑްފީލްޑަރ  ބާސާގެ އާ ކޮންޓްރެކްޓްގައި ސޮއި ކުރުމާއެކު ކެރިއަރު ނިމެންދެން އޭނާ ދެމިހުންނާނީ ބާސާގެ ކުޅުންތެރިޔެއްގެ ގޮތުގައެވެ. ބާސާގެ ވެބްސައިޓުގައި އާންމުކޮށްފައިވާ ބަޔާނެއްގައި ވަނީ އެކްލަބާއެކު އިނިއެސްޓާ އުމުރު ދުވަހުގެ ކޮންޓްރެކްޓެއްގައި ސޮއިކޮށްފައިވާ ކަމަށާއި، އެ އެއްބަސްވުމާއެކު އޭނާގެ ކެރިއަރު ނިންމާލާނީ ބާސެލޯނާގައި ހުރި ކަމަށެވެ.

އިނިއެސްޓާ އެކްލަބުގެ އާ އެއްބަސްވުމެއްގައި ސޮއިކޮށްފައިވާއިރު މިދިޔަ ހޫނު މޫސުމުގެ ޓްރާންސްފާ މާކެޓުގައި އޭނާ ބާސާ ދޫކޮށް އިޓަލީގެ ޖުވެންޓަސްއަށް ސޮއި ކުރަން އުޅޭކަމަށް އަޑުފެތުރުނެވެ.

އިނިއެސްޓާ އަކީ 639 މެޗާއިއެކު ބާސާއަށް ދެވަނައަށް އެންމެ ގިނަ މެޗު ކުޅެދިން ކުޅުންތެރިޔާއެވެ. އަދި 2002 ވަނަ އަހަރުގެ އޮކްޓޯބަރު މަހުގެ 29 ދުވަހުން ފެށިގެން ބާސާގެ ޓީމުގައި ހިމެނިގެން ކުޅެމުން އަންނަ އިނިއެސްޓާ ވަނީ އެ ޓީމަށް 55 ލަނޑު ޖަހައިދީފައެވެ. އަދި 2015 ވަނަ އަހަރުން ފެށިގެން އެ ކްލަބުގެ ކެޕްޓަނަކީވެސް އިނިއެސްޓާ އެވެ.

އިނިއެސްޓާ ބާސާއާއި ގުޅިފައިވަނީ 1996 ވަނަ އަހަރުގެ ސެޕްޓެމްބަރު މަހު އުމުރުން 12 އަހަރުގައެވެ. އޭނާއަކީ 30 ތައްޓާއެކު ބާސާގެ ތާރީހުގައި އެންމެ ގިނަ ތަށި ކާމިޔާބު ކުރި އެއް ކުޅުންތެރިޔާއެވެ. ބާސާ އާއެކު އިނިއެސްޓާ ހޯދާފައިވާ ކާމިޔާބީތަކުގެ ތެރޭގައި ސްޕެނިޝް ލީގު ޗެމްޕިއަންކަން 8 ފަހަރު، އަދި ޔުއޭފާ ޗެމްޕިއަންސް ލީގުގެ ތަށި 4 ފަހަރު ހޯދުން ފާހަގަ ކޮށްލެވެއެވެ.