ރައީސް ޑރ. މުހައްމަދު މުއިއްޒު، ވެރިކަމާއި ހަވާލުވިދުވަހުން ފެށިގެން ގަސްތުގައި ރާވައިގެން ދިވެހިރާއްޖޭގެ ދުސްތޫރީ ނިޒާމް ހަލާކުކޮށްލުމުގެ ހަޑިހުތުރު މަސައްކަތް މެދުކެނޑުމެއް ނެތި ކުރަމުން ގެންދާތީ އެކަން ނިމުމަކަށް ގެނައުމަށް އިދިކޮޅު ޕާޓީ މޯލްޑިވިވް ޑިމޮކްރެޓިކް ޕާޓީ (އެމްޑީޕީ) އިން މާލޭގައި ސިލްސިލާކޮސް މުޒާހަރާ ކުރުމަށް ގަރާރެއް ފާސްކޮށްފި އެވެ.

އެމްޑީޕީން އެ ގަރާރު ފާސްކުރީ ހޯމަ ދުވަހުގެ ރޭ އެ ޕާޓީން ބޭވި ގައުމީ މަޖިލީހުގެ ހަތަރުވަނަ ދައުރުގެ 26 ވަނަ ޖަލްސާގަ އެވެ.

މަނަދޫ ދާއިރާގެ އެމްޑީޕީ ރައީސް މުހައްމަދު ތާރިގް ހުށަހެޅުއްވި މި ގަރާރަށް ތާއީދު ކުރެއްވީ ހޯރަފުށީ ދާއިރާގެ ރައީސް އަހުމަދު ސަލީމް އެވެ.

ގައުމީ މަޖިލީހަށް މުހައްމަދު ތޯރިގު ހުށަހެޅުއްވި މި ގަރާރުގައި ބުނީ 2023 ނޮވެމްބަރު 17 ވަނަ ދުވަހު ދިވެހިރާއްޖޭގެ ރައީސުލްޖުމްހޫރިއްޔާ ކަމުގެ މަގާމާއި ރައީސް ޑރ. މުހައްމަދު މުއިއްޒު ހަވާލުވި ދުވަހުން ފެށިގެން ގަސްތުގައި ރާވައިގެން ދިވެހިރާއްޖޭގެ ތުސްތޫރީ ނިޒާމް ހަލާކުކޮށްލުމުގެ ހަޑިހުތުރު މަސައްކަތް މެދުކެނޑުމެއް ނެތި ކުރަމުން ގެންދާ ކަމަށެވެ.

ރައީސް މުއިއްޒު ވެރިކަމާއި ހަވާލުމާއި ހަމައަށް ހިނގަމުން އައި އިގްތިސާދީ ސިޔާސަތުތަކަށް ގެނައި ދޯހަޅި ބަދަލުތަކުގެ ސަބަބުންނާއި އިގްތިސާދީ ސިޔާސަތުތައް ރާވާ ހިންގުމަށް އައްޔަން ކުރެވުނު މީހުންނަށް އިގްތިސާދު ހިންގަން ނޭންގުމުގެ ސަބަބުންނާއި ދައުލަތުގެ ހަޒާނާއިން ކުރަމުން ގެންދާ ވައްކަންތަކުގެ ސަބަބުން މިއަދާއި ހަމައަށް އައިއިރު ރާއްޖޭގެ އިގްތިސާދީ ހާލަތު ދައްވެ، އާންމު ޒަރޫރީ ބޭނުންތަކަށް ބޭނުންވާ ތަކެތީގެ އަގާއި ދިރިއުޅުމުގެ އަގުތައް ބޮޑުވެ އާންމު ދިރިއުޅުމަށް އުނދަގޫވެފައި ވާކަމަށް ވެސް މި ގަރާރުގައި ބުނެފައި ވެއެވެ.

މީގެ އިތުރުން ދިވެހިރާއްޖޭގެ ގާނޫނު އަސާސީއަށް މި ސަރުކާރުން ގެނައި ބަދަލުގެ ސަބަބުން ރައްޔިތުންގެ މަޖިލިސް ތަޅުއަޅުވާފައި ވުމާއި އަދި ތަޅު ނައްޓާލުމަށް ހުރަސް އެޅުމައްޓަކައި ދިވެހިރާއްޖޭގެ ސްޕްރީމް ކޯޓުގެ ފަނޑިޔާރުން މަގާމުން ވަކިކޮށް އަދުލު އިންސާފުގެ ދާއިރާގެ މިނިވަންކަމަށް އަރައިގަނެފައިވާ ކަމަށާއި ރާއްޖޭގެ ހުރިހާ މިނިވަން މުއައްސަސާތަކެއް ސީދާ ސަރުކާރުގެ ކޮންޓްރޯލުގެ ދަށަށް ގެނައުމަށްޓަކައި ގާނޫނުތަކަށް ބަދަލު ގެނެސް އަދުލު އިންސާފު ހޯދުމަށް އޮތް ހުރިހާ ދޮރެއް ބަންދުކޮށްފައިވާ ކަން މި ގަރާރުގައި ވަނީ ފާހަގަކޮށްފަ އެވެ.

އަދި ރާއްޖޭގެ ރަށްތައް ލާމަރުކަޒީ އުސޫލުން ހިނގުމަށް އެމްޑީޕީން އެކަށައެޅި ލާމަރުކަޒީ ނިޒާމް ފުނޑާލައި ކައުންސިލްތަކުގެ ބާރު ކަނޑުވާލާފައި ވީ ހިނދު ދިވެހިރައްޔިތުން ބޭސްފަރުވާއަށް ސަލާން ޖެހުން ނައްތާލުމަށް ފައްކާކުރި އާސަންދައިގެ ނިޒާމް މި ސަރުކާރު އުފެދުނުފަހުން އެކީއެކަށް ފުނޑާލާފައިވާ ކަމަށް ވެސް ގަރާރުގައި ވަނީ ބުނެފަ އެވެ.

އެގޮތުން އެންސްޕާއާއި އާސަންދައިގެ ބަޖެޓް ބޭނުންކޮށްގެން ސަރުކާރުގެ ސިޔާސީ ކެމްޕެއިން ތަކަށް ފައިސާ ހޯދުމަށް ކުރަމުން ގެންދާ ވައްކަންތަކުގެ ސަބަބުން ބަޖެޓު ހުސްވެ ރައްޔިތުން ހާލުގައި ޖެހިފައިވާ ކަމަށް ގަރާރުގައި ވަނީ ފާހަގަ ކޮށްފަ އެވެ.

މީގެ އިތުރުން ދިވެހިރާއްޖޭގެ ރައްޔިތުންނަށް ބޯހިޔާވަހިކަން ހޯދައިދިނުމަށްޓަކައި އުތުރު ތިލަފަޅާއި، ގުޅީ ފަޅާއި، ގިރާވަރު ފަޅު ތަރައްގީ ކުރުމަށް އެމްޑީޕީ ސަރުކާރުން ފެށި މަސައްކަތް ހުއްޓާލައި އެއްވެސް ޕްލޭނެއް ނެތި ފުށިދިއްގަރު ފަޅު ހިއްކުމުގެ މަޝްރޫއު އިއުލާނުކޮށް އެ މަޝްރޫއު ބޭނުން ކޮށްގެން ރައްޔިތުންގެ ފައިސާއިން އެތައް މިލިއަން ޑޮލަރަކަށް ހިޔާނާތްތެރިވެފައިވާކަމަށް ވެސް ގަރާރުގައި ބުނެފައި ވެއެވެ.

އަދި އެމްޑީޕީ ސަރުކާރުން ރާއްޖޭގެ ރަށްރަށުގައި ހިންގަމުން ގެންދިޔަ އެންމެހާ މަޝްރޫއު ތައް އެކީ އެކަށް ހުއްޓާލައި، ރައްޔިތުންނަށް ޚިދުމަތް ކުރުމަށް ސަރުކާރަށް އޮތް އަސާސީ ޒިންމާ އަދާކުރަމުން ނުގެންދާ ކަމަށާއި ސަރުކާރުން ކުރަމުން ގެންދާ މިފަދަ ވައްކަން ތަކާއި ބޭއިންސާފުގެ އެއްވެސް ވާހަކައެއް އާންމުރައްޔިތުންނާއި ހަމައަށް ތިލަވިޔަ ނުދިނުމަށް މަސައްކަތް ކުރަން ޖެހޭ ކަމަށް އެމްޑީޕީ ގަރާރުގައި ވެއެވެ.

މި ސަރުކާރުގެ ވައްކަންތަކުގެ ސަބަބުން ރާއްޖޭގެ އިގްތިސާދީ ހާލަތު އާޚިރުގައި ބަނޑަށް ޖެހިގެން ދާނެތީ މިއީ ދިވެހި ރައްޔިތުންގެ ޑިމޮކްރެޓިކް ޕާޓީން ނުކުމެ މި ސަރުކާރު ހަމަމަގަށް އަޅުވާ ސަރުކާރުން ބޭނުންހާ ގޮތަކަށް ކަންތައްތައް ގެންދިއުމަށް ފުރުސަތު ނުދޭނޭ ކަން ފާޅުގައި އިއުލާނުކޮށް އެކަން ސާބިތުކޮށްދޭން ޖެހޭ ދަނޑިވަޅު ކަމަށް ވެސް ގަރާރުގައި ވަނީ ބުނެފައެވެ.

އަދި މި ސަރުކާރުން ކުރަމުންގެންދާ ވައްކަން ތަކާއި ކޮރަޕްޝަނާއި، ފަސާދައާއި، ރައްޔިތުންގެ ހައްގުތަކަށް ހުރަސް އެޅުމާއި އަދުލުއިންސާފަށް އަތްބޭނުމާއި، ރައްޔިތުންގެ އާންމުހާލަތު ދައްވުމާއި، ދިވެހިރާއްޖޭގެ ދިރިއުޅުމަކީ ދަތި ތަކުލީފަކަށް ވަމުން ދިއުމާއި، މިކަންކަމުގެ މައުލޫމާތު ފެތުރުމަށް އޮތް މިނިވަން މީޑިއާ ނެތިކޮށްލުމަށް ކުރަމުން ގެންދާ މަސައްކަތްތައް ހުއްޓުވުމަށްޓަކައި އެމްޑީޕީން ސިލްސިލާކޮށް 2025 އޮކްޓޫބަރު 3 ވަނަ ދުވަހު މި ސަރުކާރާއި ދެކޮޅަށް މާލޭގައި މުޒާހަރާ ކުރުމަށް ގަރާރުން ވަނީ ފާސްކޮށްފަ ވެއެވެ.

އަދި މި ސަރުކާރު ހަމަ މަގަށް އެޅުވުމުގެ މަސައްކަތް ކާމިޔާބު ވުމާއި ހަމައަށް އިހުތިޖާޖުތައް ސިލްސިލާގޮތެއްގައި ގެންދިއުމަށް ދިވެހިރައްޔިތުންގެ ޑިމޮކްރެޓިކް ޕާޓީގެ ގައުމީ މަޖިލީހުން އިގުރާރުވެފައި ވެއެވެ.