އިންތިޚާބުތަކާއި ދިމާކޮށް ރައީސް މުއިއްޒު ރަށްރަށް ގޮސް ކަންކަން ކޮށްދެނީ "ދީފަ އަތުލާ ފީފާ ބުރިއެއް" ގެ އުސޫލުން: ތޯރިގް
އަމިއްލަފުޅަށް 15 ބުރި ގެއެއްގައި ދިރިއުޅުއްވާއިރު ރައްޔިތުންނަށް އާޚިރަތުގެ ވާހަކަ ދެއްކެވުމަކީ ރައްޔިތުންނަށް މަލާމާތް ކުރުން
މަނަދޫ ދާއިރާގެ ކުރީގެ މެމްބަރު މުޙައްމަދު ތޯރިގު: ވިދާޅުވީ ރައީސް މުއިއްޒަކީ ދީފަ އަތުލާ ފީފާ ކުރިއެއް ކަމަށް
އިންތިޚާބުތަކާއި ދިމާކޮށް ރައީސް ޑރ މުހައްމަދު މުއިއްޒު ރަށްރަށަށް ވަޑައިގެން ކަންކަން ކޮށްދެއްވަމުން ގެނަދަވަނީ "ދީފައި އަތުލާ ފީފާ ބުރިއެއް" ގެ އުސޫލުން ކަމަށް ނ. މަނަދޫ ދާއިރާގެ ކުރީގެ މެމްބަރު މުޙައްމަދު ތޯރިގު ވިދާޅުވެއްޖެ އެވެ.
ތޯރިގު މިފަދައިން ވިދާޅުވެފައި ވަނީ އިދިކޮޅު އެންމެ ބޮޑު ޕާޓީ އެމްޑީޕީން ބޭއްވި ކަންމަތީ ބައްދަލުވުމުގައި ވާހަކަދައްކަވަމުންނެ އެވެ.
ރައީސް މުއިއްޒު އަށާއި އެމަނިކުފާނުގެ ސަރުކާރަށް ވަރަށް ބޮޑަށް ފާޑުވިދާޅުވަމުން ތޯރިގު ވިދާޅުވީ ރައީސް މުއިއްޒު އަކީ ކަނޑައެޅިގެން ބޮޑެތި ދޮގު ހައްދަވަމުގެންދަވާ ބޭފުޅެއް ކަމަށާއި މުއިއްޒަކީ ރާއްޖޭގެ ރައްޔިތުންނަށް ހެވެއް އެދޭނޭ ބޭފުޅެއް ނޫން ކަމަށެވެ.
ތޯރިގު ވިދާޅުވީ ރައީސް މުއިއްޒު ރައްޔިތުންނަށް އާޚިރަތް ދުވަހުން ސުވަރުގެއިން ގަނޑުވަރެއް ނުވަތަ ގޯއްޗެއް ހޯދަން ވިދާޅުވެ، އަމިއްލަފުޅަށް ދިރިއުޅުއްވާ ގެ 15 ބުރިއަށްނަގައި އަރާމާއި އިއްޒަތުގައި އިންނަވައިގެން، ހިތުހުރިގޮތަކަށް ކަންކަން ކުރައްވަމުން ގެންދެވުމަކީ ރައްޔިތުންނަށް މަލާމާތް ކުރުން ކަމަށެވެ.
ތޯރިގު ވިދާޅުވީ މި ދިވެހި ގައުމަކީ ސައްތައިންސައްތަ މުސްލިމުން ދިރިއުޅޭ، އިސްލާމީ ގައުމެއް ކަމަށާއި އެކަން ހުރިހާ ރައްޔިތުންނަށް ވެސް އެނގޭ ކަމަށެވެ. އަދި ހުރިހާ ރައްޔިތުން ވެސް މަސައްކަތް ކުރަނީ ދުނިޔެ އާއި އާހިރަތް ބާއްޖަވެރި ކުރުމަށް ކަމަށް ވެސް އޭނާ ވިދާޅުވި އެވެ.
ދިވެހިންނަށް މަލާމާތް ނުކުރުމަށް ރައީސް މުއިއްޒަށް ގޮވާލައްވަމުން ތޯރިގު ވިދާޅުވީ ރައީސް މުއިއްޒު އަށް މުޚާތަބުކުރުން އެންމެ އެކަށީގެން ވަނީ "ކައްޒާބު" ގެ ނަމުން ކަމަށާއި ކައްޒާބަކީ ދޮގުހަދާ މީހުންނަށް ކިޔާ އެއްޗެއް ކަމަށެވެ. އެގޮތުން ރައީސް މުއިއްޒު އަކީ ވަރަށް ގިނައިން ބޮޑެތި ދޮގުހައްދަވާ ބޭފުޅެއް ކަމަށް ވެސް އޭނާ ވިދާޅުވި އެވެ.
އަމިއްލަ ގެ 15 ބުރިއަށް ހަދާ ނިންމާފަ ނިކަމެތި ރައްޔިތުންގެ ކައިރި މި ބުނަނީ ކަލޭމެން ގޯތިގެދޮރު ހޯދަން އުޅޭނޭ ކަމެއް ނެތޭ، މަހުސަރު ދުވަހުން ގިޔާމަތް ދުވަހުން ސުވަރުގެއިން ގަނޑުވަރުތައް ހޯދަން މަސައްކަތް ކުރާށޭ ކަލޭމެން. ތިމަންނަ އިންނާނަމޭ 15 ބުރިއަށް ގެހަދައިގެން އެގޭގަ. މިހުންނަނީ ރައްޔިތުންނަށް ކުރާ މަލާމާތް. މިއީ މުސްލިމް ގައުމެއް ، މި ގައުމުގެ ރައްޔިތުންނަށް އެނގޭ ދުނިޔެއާއި އާޚިރަތް ހޯދަންކަން އަންގަވާފައި އޮތީ. އެހެންވީމަ މި މުއިއްޒު ކައްޒާބު، އަޅުގަނޑު މިރޭ އަލަށް ކައްޒާބޭ މި ދެންނެވީ، ކައްޒާބޭ މި ދެންނެވީ ވަރަށް ގިނަ ދޮހު ހައްދަވާތީ. ކައްޒާބު މުއިއްޒަށް އަޅުގަނޑު ދަންނަވާލަން ރައްޔިތުންނަށް މަލާމާތް ނުކުރުމަށް.މަނަދޫ ދާއިރާގެ ކުރީގެ މެމްބަރު މުޙައްމަދު ތޯރިގު
ނިމިގެންދިޔަ މަޖިލިސް އިންތިޚާބާއި ދިމާކޮށް ނ. އަތޮޅުގެ މާފަރުގެ އިހުތިސާސްގެ ތެރޭގައި ހިމަނައިގެން މީހުން ދިރިނޫޅެ ފަޅަށް އޮތް ދެ ހުރާގަނޑު ރައީސް މުއިއްޒު ދެއްވިކަން ފާހަގަކުރައްވައި ތޯރިގު ވިދާޅުވީ އެ އެތަންތަން ދިނުމަށް ފަހު އެތަން ހަދައި ނިމުމާއި އެކު އަތުލާފައި ކަމަށެވެ.
ތޯރިގު ވިދާޅުވީ ރައީސް މިފަހަރު ކައުންސިލް އިންތިޚާބާއި ދިމާކޮށް ވެސް ރަށްރަށަށް ވަޑައިގެން ވެސް ގެންދަވަނީ މިފަދައިން އަމަލު ކުރައްވަމުން ކަމަށާއި އެގޮތުން ދީފަ އަތުލާ ފީފާބުރި އެއްހެން ދޭ ކޮންމެ އެއްޗެއް ފަހުން އަތުލަމުން ގެންދާ ކަމަށެވެ. އަދި މިއީ ރައީސް މުއިއްޒުގެ އަސްލު ސިފަކަމަށް ވެސް އޭނާ ވިދާޅުވި އެވެ.
ރައީސް މުއިއްޒު ކަންތައް ކުރައްވަމުން ގެންދަވަނީ ރައްޔިތުންގެ ހެވާއިލާބަ އަށް އެދިގެން ނޫން ކަމަށާއި އެހެންކަމުން ނޮވެމްބަރު މަހުގެ 17 ވަނަ ދުވަހު ސަރުކާރު ޖަވާބުދާރީ ކުރުމަށް ބާއްވާ ބޮޑު އެއްވުމަށް ހުރިހާ ރައްޔިތުން މާލެ އެރުމަށް ތޯރިގު ވަނީ ގޮވާލައްވާފަ އެވެ.
