މަގުމައްޗަށް ނުކުންނަން ޖެހެނީ ލައްކަ ވޭނާ ހިތި ތަޖުރިބާ އިހުސާސްކޮށްފައި - ސައްލެ
1 ސެޕްޓެމްބަރު 2025 | ހޯމަ 21:35މި ސަރުކާރުން ބޭނުންވަނީ އިންތިޚާބުތައް އޮޅުވާލަން
އެމްޑީޕީގެ ގައުމީ މަޖިލީހުގައި ހޯރަފުށީ ދާއިރާގެ ރައީސް އަހުމަދު ސަލީމް ވާހަކަ ދައްކަވަނީ | އެމްޑީޕީ
މަގުމައްޗަށް ނުކުންނަން ޖެހެނީ ލައްކަ ވޭނާ ހިތި ތަޖުރިބާ އިހުސާސްކޮށްފައި ކަމަށް ހޯރަފުށީ ދާއިރާގެ ކުރީގެ މެންބަރު އަހުމަދު ސަލީމް ވިދާޅުވެއްޖެއެވެ.
ސަލީމް މިފަދައިން ވިދާޅުވީ އެމްޑީޕީގެ ގައުމީ މަޖިލީހުގެ ޖަލްސާގައި ވާހަކަ ދައްކަވަމުންނެވެ.
އެމްޑީޕީ މަނަދޫ ދާއިރާގެ ރައީސް މުހައްމަދު ތޯރިގު ހުށަހެޅުއްވި ގަރާރަށް ތާއިދުކުރައްވާ ވާހަކަ ދައްކަވަމުން ސަލީމް ވިދާޅުވީ މި ސަރުކާރުން ބޭނުންވަނީ އިންތިޚާބުތައް އޮޅުވާލަން ކަމަށެވެ. މީޑިއާގައި އަތް އަޅައި، ދިވެހި ރައްޔިތުންނަކީ ކަނު، މަންމަން، ބީރު ބައެއް ކަމަށް ހަދަން، މި ސަރުކާރުން މި ކުރާ ހުރިހާ މަސައްކަތެއްގެ ފަހަތުގައި އޮތް ކަމަކީ އިންތިޚާބުތައް އޮޅުވާލުން ކަމަށާއި، ޖަވާބުދާރީވަނިވި ސަރުކާރެއް، ދައުލަތެއް ނެތި ކަންކަން އިޞްލާޙުނުކޮށް ލޯކަލް ކައުންސިލު އިންތިޚާބަށް ވެސް ރިޔާސީ އިންތިހާބަށްވެސް އަދި މަޖިލިސް އިންތިހާބަށް ވެސް ނުކުމެގެން ނުވާނެ ކަމަށް ސަލީމް ވިދާޅުވިއެވެ.
ސަައްލެ ވިދާޅުވީ ކަންކަން އިޞްލާޙުކުރުމަށްޓަކައި މީޑިއާގެ މިނިވަންކަމަށް ގޮވާލަން ޖެހޭ ކަމަށެވެ. އަދި ހުޅުވިފައި ހުރި ލޯތަކަކާއި އިވޭ ކަންފަތްތަކެއް ނެތިއެއް ހެޔޮ ވެރިކަމެއްގެ މިސްރާބަކާ ދިމާލަށް ގައުމެއް ނުދާނެ ކަމަށެވެ. ސައްލެ ވިދާޅުވީ މަގުމައްޗަށް ނުކުންނަން މިއަދު ޖެހެނީ ލައްކަ ވޭނާއި، ލައްކަ ހިތި ތަޖުރިބާއާއި، ލައްކަ ހިތި އިހުސާސް ކޮށްފައި ކަމަށެވެ.
އަދި އެ ކަންކަމަށް ހެޔޮ އެދޭ ސަރުކާރެއް، ހެޔޮ ވެރިކަމެއްގައި، ޒައްރެއްގެ މިންވަރު ހުރި ސަރުކާރެއް ނަމަ، ލާމަރުކަޒީ ނިޒާމަށް ގެނައި ބަދަލުތައް ރުޖޫޢަކުރައްވައި، އަދި މީޑިއާގެ މިނިވަންކަމަށް ހުރަސްއެޅުވުމަށްޓަކައި މިހާރު މި އޮތް ބިލު އެތަނުން ބޭރުކުރައްވައި، މި ޤައުމުގެ މިނިވަން މުއައްސަސާތަކަށް މިނިވަންކަން ދެއްވައި، ދިވެހި ރައްޔިތުން ސަލާންޖަށް ނުޖައްސަވާނަމަ އެމްޑީޕީއިން ގޭގައި ތިބެދާނެ ކަމަށެވެ.
