އަލްޖީރިއާ އިން ޔުނައިޓެޑް އެރަބް އެމިރޭޓްސް އާ ގުޅުން ކަނޑާލައި، ސަފީރު ފުރަން އަންގައިފި

"އިހާނެތި އަދި ދުޝްމަން" އަމަލުތަކެއް ހިންގަމުންދާ ކަމަށް ބުނެ، ޔުނައިޓެޑް އެރަބް އެމިރޭޓްސް (ޔޫއޭއީ) އާއެކު ބާއްވަމުން އައި ޚާރިޖީ ގުޅުން ކަނޑާލުމަށް ނިންމާފައިވާ ކަމަށް އަލްޖީރިއާއިން ބުނެފި އެވެ.

އަލްޖީރިއާގެ ފޮރިން މިނިސްޓްރީން ބުރާސްފަތި ދުވަހު ބުނީ، ޔޫއޭއީގެ އަމަލުތައް މިހާރު ހުރީ ބަލައިގަނެވޭނެ މިންވަރަށް ވުރެ މާ މަތީގައި ކަމަށާއި، ދެ ގައުމުގެ ދެމެދުގައި އޮތް ގުޅުން ދެމެހެއްޓުމަށް ކުރެވެން ހުރި ހުރިހާ މަސައްކަތެއް މިހާރު ނިމުމަކަށް އައިސްފައިވާ ކަމަށެވެ. އަދި ޔޫއޭއީގެ ސަފީރު ފޮރިން މިނިސްޓްރީއަށް ހާޒިރުކޮށް، ގުޅުން ކަނޑާލިކަން އަންގައި، 48 ގަޑިއިރު ތެރޭގައި ގައުމުން ފުރައިގެން ދިއުމަށް އަންގާފައިވާ ކަމަށް ވެސް އެ މިނިސްޓްރީން ބުންޏެވެ.

މި ނިންމުމާ ގުޅޭގޮތުން ޔޫއޭއީގެ ސަރުކާރުން މިހާތަނަށް އެއްވެސް އެއްޗެއް ބުނެފައެއް ނުވެ އެވެ.

ސަރަހައްދީ އެކި މައްސަލަތަކުގައި އަލްޖީރިއާ އާއި އަބޫ ދާބީން ގެންގުޅޭ ހިޔާލުތަފާތުވުންތަކާ ހެދި، ފާއިތުވި އަހަރުތަކުގައި ދެ ގައުމުގެ ގުޅުމަށް ވަނީ ވަރަށް ބޮޑަށް ބުރޫއަރާފަ އެވެ.

އިސްރާއީލާއެކު ގުޅުން ގާއިމުކުރުމާ އަލްޖީރިއާއިން ދެކޮޅު ހަދަމުންދާއިރު، ޔޫއޭއީ އާއި އަލްޖީރިއާގެ ވާދަވެރި މޮރޮކޯއިން ވަނީ 2020 ވަނަ އަހަރު އެމެރިކާ މެދުވެރިވެގެން ސޮއިކުރި "އަބްރަހަމް އެކޯޑްސް" ގެ ދަށުން އިސްރާއީލާއެކު ހާރިޖީ ގުޅުން ގާއިމުކޮށްފަ އެވެ.

މީގެ އިތުރުން، އެތައް އަހަރެއްވީ ވެސްޓަން ސަހާރާގެ މިލްކުވެރިކަމުގެ މައްސަލައިގައި ވެސް ދެ ގައުމު އޮތީ ދެކޮޅުގަ އެވެ. ޔޫއޭއީން ތާއީދުކުރަނީ އެ ސަރަހައްދަކީ މޮރޮކޯގެ ބައެއް ކަމަށް ބުނާ ބުނުމަށެވެ. އަދި އެ ސަރަހައްދުގައި ޔޫއޭއީގެ ކޮންސިއުލޭޓެއް ވެސް ހުރެ އެވެ. ނަމަވެސް އަލްޖީރިއާއިން ތާއީދުކުރަނީ ވެސްޓަން ސަހާރާގެ މިނިވަންކަމަށް މަސައްކަތްކުރާ ޕޮލިސާރިއޯ ފްރަންޓަށެވެ.

ސާހެލް ސަރަހައްދުގައި ވެސް ދެ ގައުމުގެ މަސްލަހަތު ވަނީ ފުށުއަރާފަ އެވެ. ފާއިތުވި އަހަރުތަކުގައި ޔޫއޭއީން އެ ސަރަހައްދުގެ ގައުމުތަކާއެކު އޮންނަ ގުޅުން ވަރުގަދަކުރަމުންދާއިރު، އަލްޖީރިއާގެ ދެކުނު ބޯޑަރުގައި އޮތް ބައެއް ގައުމުތަކަށް އައި އަސްކަރީ ބަޣާވާތްތަކާ ގުޅިގެން އެ ގައުމުތަކާއި އަލްޖީރިއާއާ ދެމެދު އޮތް ގުޅުން ވަނީ ގޯސްވެފަ އެވެ.

އަލްޖީރިއާގެ ރައީސް އަބްދުލްމަޖީދު ތެބޫން ދެއްވާ ތަގުރީރުތަކުގައި، ޔޫއޭއީއަކީ ސަރަހައްދުގެ ގައުމުތަކުގެ ހަމަޖެހުން ނަގާލަން މަސައްކަތްކުރާ "ކުޑަކުޑަ ދައުލަތެއް" ގެ ގޮތުގައި ސިފަކުރައްވަ އެވެ. މިދިޔަ ޖުލައި މަހު ޓީވީ މެދުވެރިކޮށް ދެއްވި އިންޓަވިއުއެއްގައި އޭނާ ވިދާޅުވީ، ޔޫއޭއީން ފައި އެޅި ކޮންމެ ތަނެއްގައި ލޭއޮހޮރުވުން ހިނގާފައިވާ ކަމަށާއި، އެ ގައުމުގެ ސަބަބުން ވަރަށް ނޭދެވޭ އަސަރުތަކެއް ކުރަމުންދާ ކަމަށެވެ.

"އަޅުގަނޑުމެން ބޭނުންވަނީ އެމީހުން އަޅުގަނޑުމެންނާ ދުރުގައި ތިބެން. އެއީ އަޅުގަނޑުމެންގެ ގައުމުގައި ލޭއޮހޮރުވުމެއް ހިނގިޔަ ނުދިނުމަށްޓަކައި،" ރައީސް ތެބޫން ވިދާޅުވި އެވެ.

އެ ދުވަސްވަރު ތަބޫން ވިދާޅުވެފައިވަނީ، އަރަބި ދުނިޔޭގެ ބައިބައިވުން ބޮޑުވިޔަ ނުދިނުމަށް އަލްޖީރިއާއިން މަސައްކަތް ނުކުރި ނަމަ، މާ ކުރިން ވެސް ޔޫއޭއީއާއެކު އޮތް ހާރިޖީ ގުޅުން ކަނޑާލީސް ކަމަށެވެ.