ބޯހިޔާވަހިކަމުގެ ހައްލުނުވެ ހުރި މައްސަލަތައް ނިންމުމަށް އޮފީސް ފޯރ ސިވިލް ރައިޓްސްއަށް ފޮނުވަން ނިންމައިފި
10 ސެޕްޓެމްބަރު 2026 | ބުރާސްފަތި 12:53ބޯހިޔާވަހިކަމުގެ މައްސަލަތަކަކީ ރައްޔިތުންގެ މަސްލަހަތާ ގުޅިފައިވާ ކަންކަމަށްވާތީ، އެފަދަ މައްސަލަތައް ހައްލުކުރުމުގައި އިންސާފުވެރިކަން ގާއިމުކުރުމަށްޓަކައި މީގެފަހުން އެކަންކަން ނިންމާނީ އޮފީސް ފޯރ ސިވިލް ރައިޓްސްއިން ކަމަށް ހައުސިން މިނިސްޓަރު ވިދާޅުވެއްޖެ. މިނިސްޓްރީން މިގޮތަށް ނިންމީ ހުޅުމާލެއިން އަގުހެޔޮކޮށް ބިމެއް ވިއްކި މައްސަލައެއް ފެންމަތިވެފައިވާ ދަނޑިވަޅެއްގައި
ހައުސިންގ މިނިސްޓަރު ޑރ. އަބްދުﷲ މުއްތަލިބު | މަޖިލިސް
ބޯހިޔާވަހިކަމާ ގުޅޭގޮތުން ހައްލުނުވެ ގިނަ ދުވަސްވެފައިވާ މައްސަލަތަކުގައި، ސީދާ މިނިސްޓްރީން ގޮތް ނިންމުމުގެ ބަދަލުގައި، އެ މައްސަލަތައް ބަންޑާރަނައިބުގެ އޮފީހުގެ ދަށުން ހިންގާ އޮފީސް ފޯރ ސިވިލް ރައިޓްސްއަށް ފޮނުވުމަށް ނިންމަވާފައިވާ ކަމަށް މިނިސްޓަރ އޮފް އިންފްރާސްޓްރަކްޗަރ، ހައުސިންގ އެންޑް އާރބަން ޑިވެލޮޕްމަންޓް ޑރ. އަބްދުﷲ މުއްތަލިބު ވިދާޅުވެއްޖެ އެވެ.
މިނިސްޓަރ މުއްތަލިބު އެކްސްގައި ކުރެއްވި ޕޯސްޓެއްގައި ވިދާޅުވީ، ބޯހިޔާވަހިކަމާ ގުޅޭގޮތުން ހުރި، އެކި ސަބަބުތަކާހުރެ ހައްލުނުވެ ދިގުލައިގެން ގޮސްފައިވާ މައްސަލަތަކުގައި ސީދާ މިނިސްޓްރީން މީގެފަހުން ގޮތް ނުނިންމުމަށް މިހާރު ކަނޑައަޅާފައިވާ ކަމަށެވެ.
މި ނިންމެވުން ނިންމެވި ސަބަބު ބަޔާންކުރައްވަމުން މިނިސްޓަރު ވިދާޅުވީ، ބޯހިޔާވަހިކަމުގެ މައްސަލަތަކަކީ އާންމު ރައްޔިތުންގެ މަސްލަހަތާ ނުހަނު ބޮޑަށް ގުޅިފައިވާ ހައްސާސީ ކަންކަމަށް ވާތީ، އެފަދަ މައްސަލަތައް ހައްލުކުރުމުގައި ވީހާ ވެސް ދެފުށްފެންނަ، އިންސާފުވެރި އުސޫލަކުން އަމަލުކުރުމަކީ މުހިންމު ކަމެއް ކަމަށެވެ. އެހެންކަމުން، އެ މައްސަލަތައް މީގެފަހުން ފޮނުވާނީ ބަންޑާރަނައިބުގެ އޮފީހުގެ ދަށުން ހިންގަމުން އަންނަ އޮފީސް ފޯރ ސިވިލް ރައިޓްސް އަށް ކަމަށް މިނިސްޓަރު ވިދާޅުވި އެވެ.
މީގެއިތުރުން މިނިސްޓަރު މުއްތަލިބު ވިދާޅުވީ، އެފަދަ ކަންކަމުގައި ދެން މިނިސްޓްރީން އަމަލުކުރަމުން ގެންދާނީ އޮފީސް ފޯރ ސިވިލް ރައިޓްސްއިން ބަލައި، ކަނޑައަޅާ ނިންމެވުންތަކާ އެއްގޮތްވާ ގޮތުގެ މަތިން ކަމަށެވެ.
މި ފިޔަވަޅު އަޅަން ނިންމަވާފައިވާކަން ހައުސިންގ މިނިސްޓަރު ހާމަކުރައްވާފައި މިވަނީ، ހަތަރު ލައްކަ ރުފިޔާގެ ކުޑަ އަގެއްގައި ހުޅުމާލެ ފޭސް 2 އިން ބިމެއް ވިއްކިކަން ފަޅާއެރުމާ ގުޅިގެން، އެކަން ދިފާއުކޮށް ހައުސިންގ މިނިސްޓްރީން ބަޔާނެއް ވެސް ނެރިފައިވާ ދަނޑިވަޅެއްގަ އެވެ.
