ސްޓޭންޑާޑް ޓޯނަމެންޓްގައި ރާއްޖޭގެ މުޖާހިދު ކުޅުނު ފުރަތަމަ މެޗު ކާމިޔާބުކޮށްފި
17 ޖޫން 2022 | ހުކުރު 15:40މުޖާހިދަކީ ރާއްޖޭގެ ގައުމީ ފެންވަރުގައިވެސް ފާހަގަކުރެވޭ މޮޅު ކުޅުންތެރިއެއް
ސްޓޭންޑާޑް ރައުންޑުގެ ތެރެއިން ރާއްޖޭގެ މުޖާހިދު
މިހާރު ކުރިއަށްދާ ވެސްޓަރން އޭޝިއަން ޖޫނިއަރ ޗެސް ޗެމްޕިއަންޝިޕްގެ ސްޓޭންޑާޑް ޓޯނަމެންޓުގައި ރާއްޖޭގެ ޗެސް ކުޅުންތެރިޔާ މުޖާހިދު ބިން ޔަޒީދު ކުޅުނު ފުރަތަމަ މެޗު ކާމިޔާބު ކޮށްފިއެވެ.
މުޖާހިދު މިއަދު ކާމިޔާބުކުރީ ސްޓޭންޑާޑް ޓޯނަމެންޓްގެ އޯޕަން އަންޑަރ 18 ކެޓަގަރީގެ ފުރަތަމަ މެޗެވެ. މި މެޗުގައި ރާއްޖޭގެ ޒުވާން ކުޅުންތެރިޔާ ބައްދަލުކުރީ ބަންގްލަދޭޝްގެ ކެންޑިޑޭޓް މާސްޓަރ މަނޯން ރީޖާ ނީރްއާއެވެ.
ޓޯނަމެންޓްގެ ފުރަތަމަ ރައުންޑް މުޖާހިދު ކާމިޔާބުކުރިއިރު، ސްޓޭންޑާޑް ޓޯނަމެންޓްގައި މުޅިއަކު ކުޅޭނީ ނުވަ ރައުންޑެވެ. މިއަދު ފަށާފައިވާ ސްޓޭންޑާޑް ޗެސް ޓޯޓަމެންޓްގެ ހުރިހާ ރައުންޑެއް ނިމޭނީ އަންނަ ބުދަ ދުވަހުއެވެ.
އުމުރުން 16 އަހަރުގެ މުޖާހިދަކީ ރާއްޖޭގެ ގައުމީ ފެންވަރުގައިވެސް ފާހަގަކުރެވޭ މޮޅު ކުޅުންތެރިއެކެވެ. އޭނާ ވަނީ އެންމެ ފަހުން ކުޅުނު ގައުމީ މުބާރާތުގައި ރާއްޖޭގެ ތިންވަނަ ހޯދާފައެވެ.
ވެސްޓަރން އޭޝިއަން ޖޫނިއަރ ޗެސް ޗެމްޕިއަންޝިޕް ކުރިއަށް ގެންދާނީ މައިގަނޑު ތިން ބަޔަކަށް ބަހާލައިގެންނެވެ. އޭގެ ތެރެއިން ރެޕިޑް ރައުންޑް ވަނީ މިދިޔަ ބުރާސްފަތި ދުވަހު ނިމިފައެވެ. މިހާރު ކުރިއަށްދަނީ ސްޓޭންޑާޑް ޗެސް ރައުންޑެވެ. މުބާރާތުގެ އެންމެ ފަހު ރައުންޑް ކަމުގައިވާ ބީޗް ބްލިޓްޒް ރައުންޑް އޮންނާނީ މިއަންނަ ބުރާސްފަތި ދުވަހުއެވެ.
