ނާމަލް ރާޖަޕަކްސަ ހައްޔަރުކޮށްފި
4 ސެޕްޓެމްބަރު 2026 | ހުކުރު 10:15އެއަރބަސް މުއާމަލާތަކާ ގުޅިގެން ކުރިއަށްދާ ތަހުގީގަށް ފަސް ގަޑިއިރަށްވުރެ ގިނައިރު ސުވާލުކުރުމަށްފަހު، ނާމަލް ރާޖަޕަކްސަ ވަނީ ހައްޔަރުކޮށްފައި. މި ތަހުގީގާ ގުޅިގެން ނާމަލް ވިދާޅުވީ އޭނާ އެއްވެސް ގޯސް ކަމެއް ކުރައްވާފައި ނުވާނެ ކަމަށާއި، ނަމަވެސް ސަރުކާރުގެ ނުފޫޒުގެ ސަބަބުން ޝަރުއީ ނިޒާމުގެ މިނިވަންކަމާމެދު ސުވާލު އުފެދޭ ކަމަށް. އަދި ކޮންމެ ވަގުތެއްގައިވެސް މިނިވަން ތަހުގީގުތަކާ ކުރިމަތިލުމަށް ތައްޔާރަށް ހުންނެވި ކަމަށް އޭނާ ވިދާޅުވި
ކުރީގެ ރައީސް ގޮތަބަޔާ ރާޖަޕަކްސަގެ ސަރުކާރުގައި ވަޒީރުކަން ކުރެއްވި، ރައްޔިތުންގެ މަޖިލީހުގެ މެންބަރު ނާމަލް ރާޖަޕަކްސަ ހައްޔަރުކޮށްފި | ލަންކާ ފައިލްސް
އެއަރބަސް ކުންފުންޏާއެކު ކޮށްފައިިވާ މުއާމަލާތަކާ ގުޅިގެން ކުރިއަށްދާ ތަހުގީގަކަށް، ފަސް ގަޑިއިރަށްވުރެ ގިނަ އިރު ސުވާލުކުރުމަށްފަހު، ސްރީލަންކާ ޕޮޑުޖަނަ ޕެރަމުނަ (އެސް.އެލް.ޕީ.ޕީ) ގެ ނޭޝަނަލް އޯގަނައިޒަރ އަދި ޕާލަމެންޓް މެންބަރު ނާމަލް ރާޖަޕަކްސަ، އެ ގައުމުގެ ކޮމިޝަން ޓު އިންވެސްޓިގޭޓް އެލިގޭޝަންސް އޮފް ބްރައިބަރީ އޯ ކޮރަޕްޝަން (ސީ.އައި.އޭ.ބީ.އޯ.ސީ) އިން ހައްޔަރުކޮށްފި އެވެ.
މި މައްސަލައިގައި ބަޔާން ދިނުމަށް ހުކުރު ދުވަހު ހެނދުނު 9:00 އަށް ކޮމިޝަނަށް ހާޒިރުވުމަށް އެންގުމާ ގުޅިގެން، ނާމަލް ރާޖަޕަކްސަ ސީ.އައި.އޭ.ބީ.އޯ.ސީ އަށް ހާޒިރުވީ ހުކުރު ދުވަހުގެ ހެނދުނުގެ ވަގުތެއްގަ އެވެ.
އޭނާ ހައްޔަރުކޮށްފައިވަނީ، ސީ.އައި.އޭ.ބީ.އޯ.ސީ ގެ އޮފިޝަލުން ފަސް ގަޑިއިރަށްވުރެ ގިނަ އިރުވަންދެން އޭނާއާ ސުވާލުކުރުމަށް ފަހުގަ އެވެ.
ނާމަލް ރާޖަޕަކްސަ ވިދާޅުވީ، ކޮންމެ ވަގުތެއްގައިވެސް މިނިވަން ތަހުގީގުތަކާ ކުރިމަތިލުމަށް އޭނާ ހުންނެވީ ތައްޔާރަށް ކަމަށެވެ. ނަމަވެސް، ޕާލަމެންޓުގައި ކުރެވޭ ސިޔާސީ ބަހުސްތަކުގެ ސަބަބުން ފުލުހުންނާއި ޝަރުއީ ނިޒާމުގެ މިނިވަންކަމާމެދު ސުވާލު އުފެދޭތީ އެކަމާ ކަންބޮޑުވުން ފާޅުކުރެއްވި އެވެ.
ނާމަލް ވިދާޅުވީ، ތަހުގީގީ އިދާރާތަކުން މަސައްކަތް ނިންމުމުގެ ކުރިން، ސަރުކާރުގެ ބައެއް ވަޒީރުން ތަހުގީގުތަކާއި، ހައްޔަރުކުރުންތަކާއި އަދި މައްސަލަތަކާ މެދު ވަކި ގޮތްތަކެއް ނިންމަވާފައިވާ ކަމަށް ފެންނަ ކަމަށެވެ.
"ބަދުނަސީބަކީ، މި ގައުމުގެ ފުލުހުންނާއި ޝަރުއީ ނިޒާމުގެ މިނިވަންކަމާމެދު މިހާރު އާންމު ރައްޔިތުން ސުވާލު އުފައްދަން ފަށާފައިވާކަން،" އޭނާ ވިދާޅުވި އެވެ.
އޭނާއާ ގުޅުންހުރި މައްސަލަތަކުގައި ހެކި އުފައްދާފައިވާ ކަމަށް ތުހުމަތު ކުރައްވަމުން ނާމަލް ވިދާޅުވީ، އެކަން ކުރި ބަޔަކު ކޮންމެވެސް ދުވަހަކުން އެކަމަށް ޖަވާބުދާރީވާން ޖެހޭނެ ކަމަށެވެ.
މީގެ އިތުރުން، އޭނާ އެއްވެސް ގޯސް ކަމެއް ކުރައްވާފައި ނުވާނެ ކަމުގެ ޔަގީންކަން އެބައޮތް ކަމަށާއި، ތަހުގީގުތަކުން ރެކިވަޑައިގަންނަވަން ޖެހޭ އެއްވެސް ސަބަބެއް ނެތް ކަމަށްވެސް ނާމަލް ވިދާޅުވި އެވެ.
"އަޅުގަނޑުމެން މިތިބީ ކޮންމެ ވަގުތެއްގައިވެސް މިނިވަން ތަހުގީގުތަކާ ކުރިމަތިލާން ތައްޔާރަށް،" އޭނާ ވިދާޅުވި އެވެ.
"އަޅުގަނޑުމެން ބިރުގަންނަނަމަ ހާޒިރެއް ނުވާނެ. ހާޒިރުވާން އެންގި އެންމެން ގާތުވެސް އަޅުގަނޑުމެން ބުނީ ދާނެ ވާހަކަ،" އޭނާއާ ހަވާލާދީ ލަންކާ މީޑިއާތަކުން ރިޕޯޓުކޮށްފައިވެ އެވެ.
