އެމްޓީޑީސީގެ ހިއްސާއަކަށް ބައިރުފިޔާއެއް ބަހަން ފާސްކޮށްފި

މޯލްޑިވްސް ޓޫރިޒަމް ޑިވެލޮޕްމަންޓް ކޯޕަރޭޝަން، (އެމްޓީޑީސީ)ގެ 2025 ވަނަ އަހަރުގެ ފައިދާގެ ގޮތުގައި ހިއްސާއަކަށް ބައިރުފިޔާ އެއް ބަހަން އެ ކުންފުނީގެ އަހަރީ އާންމު ޖަލްސާގައި ފާސްކޮށްފި އެވެ. 

އެމްޓީޑީސީން ހޮޓެލްސް ޖެންގައި ބޭއްވި އެކުންފުނީގެ އަހަރީ އާންމު ޖަލްސާގައި މިގޮތަށް ފާސްކުރިއިރު ހުސްވި އަހަރުގެ ހިއްސާ އަކަށް ބަހާފައިވަނީ މިވަރުކަން ފާހަގަ ކުރެވެ އެވެ. 

ކުންފުނީގެ ހިއްސާދާރުންގެ ތެރެއިން 1223 ފަރާތެއް ބައިވެރިވި މި ޖަލްސާގައި މި އަދަދު ފާސްވީ، 99 އިންސައްތަ މީހުންގެ ވޯޓުންނެވެ.

މި ފައިދާ ލިބޭނީ 11 އޯގަސްޓް 2026 ނިޔަލަށް އެކުންފުނީގެ ހިއްސާދާރުންގެ ރަޖިސްޓްރީގައި ތިބި ހިއްސާދާރުންނަށް ކަމަށްވެސް ވަނީ ނިންމާފަ އެވެ. 

2024 ވަނަ އަހަރާ އަޅާބަލާއިރު، ކުންފުންޏަށް މިދިޔަ އަހަރު ލިބުނު އާމްދަނީ ވަނީ 1.86 އިންސައްތަ ދަށްވެފަ އެވެ.

2025 ވަނަ އަހަރުގެ ތެރޭގައި ކުންފުނީގެ އާމްދަނީ ދަށްވުމާއި، އުފެއްދުންތަކަށް ހިނގި ސީދާ ޚަރަދުތައް އިތުރުވުމާ ގުޅިގެން، ކުންފުނީގެ ޖުމްލަ ފައިދާ (ގްރޮސް ޕްރޮފިޓް) ވަނީ 5.55 އިންސައްތަ ދަށްވެފަ އެވެ. އެގޮތުން 2024 ވަނަ އަހަރު ލިބުނު 3.10 މިލިއަން އެމެރިކާ ޑޮލަރުގެ ފައިދާ ވަނީ 2.93 މިލިއަން އެމެރިކާ ޑޮލަރަށް މަދުވެފަ އެވެ.

ކުންފުނިން ކުރި ކެޕިޓަލް ޚަރަދުތަކާ ގުޅިގެން ވިޔަފާރީގެ މުއާމަލާތްތަކަށް ދައްކަންޖެހޭ ފައިސާ އިތުރުވުމުގެ ސަބަބުން، ކުންފުނީގެ ޖުމްލަ ދަރަނި (ލައިބިލިޓީސް) ވަނީ 37.33 މިލިއަން އެމެރިކާ ޑޮލަރުން 41.45 މިލިއަން އެމެރިކާ ޑޮލަރަށް އިތުރުވެފަ އެވެ.

އެމްޓީޑީސީ އިން ޖުމްލަ ދޫކޮށްފައިވަނީ 34,087,354 ހިއްސާ އެވެ.

ކުންފުނީގެ ހިއްސާގެ އޮނިގަނޑަށް ބަލާއިރު، ޖުމްލަ ހިއްސާގެ 53 އިންސައްތަ ނުވަތަ 18,428,278 ހިއްސާ ހިއްސާކުރަނީ އާންމު ރައްޔިތުންނެވެ. އަދި ބާކީ 47 އިންސައްތަ ހިއްސާ ނުވަތަ 15,659,076 ހިއްސާ ހިއްސާކުރަނީ ދިވެހި ސަރުކާރެވެ.

ފަތުރުވެރިކަމުގެ މަންފާ ދިވެހި ރައްޔިތުންނަށް ހޯދައިދިނުމަށް ސަރުކާރުން 2006 ވަނަ އަހަރު އުފެއްދި އެމްޓީޑީސީ އަށް 2025 ވަނަ އަހަރު ޓެކުހަށް ކެނޑުމަށްފަހު ސާފު ފައިދާގެ ގޮތުގައި 2 މިލިޔަން އެމެރިކާ ޑޮލަރު ވަނީ ލިބިފަ އެވެ. 2024 ވަނަ އަހަރު އެކުންފުންޏަށް ފައިދާގެ ގޮތުގައި ލިބުނީ 1.9 މިލިޔަން އެމެރިކާ ޑޮލަރެވެ.