ފުވައްމުލައް ސިޓީގެ ވެމްކޯ އަދި ފެނަކަ ބްރާންޗުގެ މުވައްޒަފުން ވަކިކުރަމުން ދާތީ އެކަމުގެ ކަންބޮޑުވުން ފާޅުކޮށްފި
30 އޯގަސްޓު 2026 | އާދީއްތަ 03:50ފުވައްމުލައް ފެނަކަ އާއި ވެމްކޯގެ މުވައްޒަފުން ވަކިކުރަނީ ސިޔާސީ ބޭނުމެއްގައި ކަމަށް ތުހުމަތުކޮށް، އެކަން ހުއްޓާލުމަށް ސިޓީ ކައުންސިލުން ގޮވާލައިފި. ކުންފުނިތަކުން ދިން ޔަގީންކަމާ ޚިލާފަށް މުވައްޒަފުން ވަކިކުރުމަކީ އާއިލާތަކަށް ލިބޭ ބޮޑު ނިކަމެތިކަމެއްކަން ފާހަގަކޮށް، ވަކިކުރި މީހުންނަށް ވަޒީފާ އަނބުރާ ދިނުމަށް ކައުންސިލުން ވަނީ ގޮވާލާފައި
ފުވައްމުލައް ސިޓީ ކައުންސިލް ބައްދަލުވުމުގެ ތެރެއިން | ފުވައްމުލައް ސިޓީ ކައުންސިލް
ފުވައްމުލައް ސިޓީގެ ވެމްކޯ އަދި ފެނަކަ ބްރާންޗުގެ މުވައްޒަފުން ވަކިކުރަމުން ދާތީ އެކަމުގެ ކަންބޮޑުވުން ފުވައްމުލައް ސިޓީ ކައުންސިލުން ފާޅުކޮށްފި އެވެ.
މިކަމުގެ ކަންބޮޑުވުން ފާޅުކޮށް އަދި މިކަން ކުށްވެރިކޮށް ފުވައްމުލައް ސިޓީ ކައުންސިލުން ނެރުނު ނޫސްބަޔާނުގައި ބުނީ އެ ސިޓީގައި ހުރި ވެމްކޯ އަދި ފެނަކަ ބްރާންޗުގައި މަސައްކަތްކުރާ ބައެއް މުވައްޒަފުން ކުއްލި ގޮތަކަށް ވަޒީފާއިން ވަކިކުރަމުންދާކަން ކައުންސިލްގެ ސަމާލުކަމަށް އައިސްފައިވާ ކަމަށެވެ.
އެގޮތުން މުވައްޒަފުން ވަޒީފާއިން ވަކިކުރުމަކީ އާމްދަނީ ލިބޭނެ މަގު ކުއްލިއަކަށް ބަންދުވެ، އެ މުވައްޒަފުންނާއި އެމީހުންގެ އާއިލާތަކުގެ އިގުތިސާދީ އަދި އިޖުތިމާއީ ރައްކާތެރިކަމަށް ބޮޑެތި ގޮންޖެހުންތަކެއް ކުރިމަތިވާނެ ކަމަކަށްވާތީ، މިކަމަކީ އެ ކައުންސިލުން އެކަމާ މެދު އިންތިހާއަށް ކަންބޮޑުވެ އަދި އެންމެ ހަރުކަށި އިބާރާތުން ކުށްވެރިކުރާ ކަމެއް ކަމަށް ފުވައްމުލައް ސިޓީ ކައުންސިލުން ނެރުނު ބަޔާނުގައި ބުނެފައިވެ އެވެ.
ކުންފުނިތައް "ރައިޓް ސައިޒް" ކުރުމުގެ ނަމުގައި މިފަދަ ފިޔަވަޅުތައް އަޅަމުންދާއިރު، މުވައްޒަފުންގެ މަސައްކަތުގެ އިޙުލާސްތެރިކަމާއި ފެންވަރަށް ބެލުމެއް ނެތި، ވަކި ސިޔާސީ ފިކުރަކަށް ނިސްބަތްވާތީ ނުވަތަ ވަކި ވިސްނުމަކަށް ތާއީދު ނުކުރާތީ ވަޒީފާއިން ވަކިކުރަމުންދާކަން ފާހަގަކުރެވޭ ކަމަށް މި ބަޔާނުގައި ބުނެފައިވެ އެވެ. އަދި މިއީ ވަޒީފާގެ ރައްކާތެރިކަން ކަށަވަރުކޮށްދިނުމަށް ރައީސް މުއިއްޒު ވެވަޑައިގަންނަވަފައިވާ ވައުދުފުޅުތަކާއި އިންސާފުވެރިކަމާއެކު ވަޒީފާގެ ފުރުސަތުތައް ފަހިކޮށްދޭނެ ކަމަށް ބުނާ ސަރުކާރުގެ އުސޫލުތަކާ ފުށުއަރާ ކަމެއްކަން މި ބަޔާނުގައި ފާހަގަކޮށްފައިވެ އެވެ.
މީގެ އިތުރުން، އާދައިގެ މުވައްޒަފުން ވަކިކުރުމަށް ފަހު، މަތީ ފަންތީގެ ސިޔާސީ މަގާމުތަކަށް މީހުން އައްޔަނުކުރަމުން ދާތީ އެކަމުގެ ކަންބޮޑުވުންތައް އާންމުންގެ މެދުގައި އުފެދިފައިވާ ކަމަށް ފުވައްމުލައް ސިޓީ ކައުންސިލުން ބުނެ އެވެ. ހަމައެއާއެކު، އިގުތިސާދީ ގޮތުން ދަތި ދުވަސްވަރެއްގައި، ވަޒީފާގެ ރައްކާތެރިކަން ކަށަވަރުކޮށްދިނުމުގެ ބަދަލުގައި، ސިޔާސީ ސަބަބުތަކަށްޓަކައި އާދައިގެ މުވައްޒަފުންގެ ވަޒީފާ ގެއްލުވާލުމަކީ އެތައް ބައެއްގެ ހައްގުތަކަށް އުނިކަން ލިބޭނެ ކަމެއް ކަމުގައި ވެސް ވަނީ ބުނެފަ އެވެ.
އޮގަސްޓު މަހު ފުވައްމުލައް ސިޓީ ކައުންސިލުން މާލެ އަށް ކުރި ދަތުރުގައި އެސްއޯއީތަކުގެ ވެރިންނާއި ބައްދަލު ކުރެއްވިކަން ފާހަގަ ކުރައްވައި، އެ ސިޓީގައި ކުރިއަށްގެންދާ ޕްރޮޖެކްޓްތަކުގެ މަސައްކަތް ހުއްޓާނުލާ ކުރިޔަށް ގެންދާނެ ކަމުގެ ޔަޤީންކަން ފެނަކަ އަދި ވެމްކޯއިން ދީފައިވާ ކަމަށް މި ނޫސްބަޔާނުގައި ބުނެފައިވެ އެވެ. ނަމަވެސް ޔަގީންކަން ދިނުމަށްފަހު ވެސް ކުއްލި ގޮތަކަށް ޕްރޮޖެކްޓު ހުއްޓާލުމާ ގުޅިގެން ވަޒީފާއިން ވަކިކުރާ ވާހަކަ ދެއްކުމަކީ ސަރުކާރުގެ ބަހާއި އަމަލު ދިމާނުވާ ކަމެއް ކަމުގައި ދެކޭ ކަމަށް މި ބަޔާނުގައިވެ އެވެ.
ވަޒީފާއިން ވަކިކުރަމުންދާ ފަރާތްތަކަށް އިންސާފު ހޯދައިދޭން މުއްސަސާތަކަށާއި މިނިވަން ކޮމިޝަންތަކަށް ގޮވާލައި ވަކިކޮށްފައިވާ ފަރާތްތަކަށް ވަޒީފާ އަނބުރާ ދިނުމަށް ފުވައްމުލައް ސިޓީ ކައުންސިލުން ގޮވާލާފައިވެ އެވެ.
ފުވައްމުލައް ސިޓީ ފެނަކަ ބްރާންޗުގެ 51 މުވައްޒަފުން ވަކިކޮށްފައިވާ ކަމަށް ބުނެ ސޯޝަލް މީޑިއާގައި ވަނީ އަޑު ފެތުރިފައި އެވެ.
