ރިސޯޓުތަކުން މީހުން އުޅޭ ރަށްރަށަށް ކުނި ގެންދިއުމަށް އޮތް ގާނޫނީ ހުރަސް ނައްތާލައިފި، ހުއްދަ އޮވެގެން ރާއްޖޭގައި ނުރައްކާތެރި ކުނި ވިއްކޭނެ މަގު ތަނަވަސްކޮށްދީފި
24 އޯގަސްޓު 2026 | ހޯމަ 05:50ކުނި މެނޭޖުކުރުމުގެ ގާނޫނަށް ގެނައި އިސްލާހާއެކު، ރިސޯޓުތަކާއި ސިނާއީ ރަށްތަކުގައި އުފެދޭ ކުނި މީހުން ދިރިއުޅޭ ރަށްރަށުގެ ކުނި މަރުކަޒުތަކަށް ގެންދިއުމަށް އޮތް ހުރަސްތައް މިހާރު ވަނީ ނައްތާލައިފަ. މީގެ އިތުރުން ރާއްޖެއަށް ކުނި އެތެރެކުރުން މަނާކޮށްފައިވީ ނަމަވެސް، ހާއްސަ ހުއްދައެއްގެ ދަށުން ނުރައްކާތެރި ކުނި ވިއްކުމާއި ބޭނުންކުރުމުގެ ފުރުސަތު މި ބަދަލާއެކު ލިބިގެންދާނެ
ރާއްޖޭގެ ރިސޯޓަކުން ދޯންޏަކަށް ކުނި އަރުވަނީ | އެލަމީ
ރިސޯޓުތަކާއި އިންޑަސްޓްރިއަލް ރަށްތަކުން މީހުން އުޅޭ ރަށްރަށަށް ކުނި ގެނައުމަށް އޮތް ގާނޫނީ ހުރަސް ރައީސް ޑރ. މުހައްމަދު މުއިއްޒުގެ ސަރުކާރުން ގާނޫނަށް ގެނައި ބަދަލާ އެކު ނައްތާލައިފި އެވެ.
ކުނި މެނޭޖުކުރުމުގައި އެތައް ގޮންޖެހުންތަކެއް މިހާރުވެސް ކުރިމަތިވެފައިވާ މީހުން ދިރިއުޅޭ ރަށްރަށަށް ރިސޯޓުތަކުންނާއި ސިނާއީ މަސައްކަތްތައް ކުރާ ރަށްރަށުން ކުނި ގެނައުން އޮތީ ގާނޫނީ ގޮތުން މަނާކޮށްފަ އެވެ.
އެހެން ނަމަވެސް ރައީސް މުއިއްޒުގެ ސަރުކާރުން ޤާނޫނު ނަންބަރު 2022/24 (ކުނި މެނޭޖުކުރުމުގެ ޤާނޫނު) އަށް ގެނައި 1 ވަނަ އިޞްލާޙާ އެކު މިކަމުގައި އޮތް ހުރަސް މިހާރު ވަނީ ނެތިގެން ގޮސްފަ އެވެ.
ރައީސް މުއިއްޒުގެ ފުރިހަމަ ކޮންޓްރޯލު އޮތް 20 ވަނަ ރައްޔިތުންގެ މަޖިލީހުން މި އިސްލާހު ފާސްކޮށްފައިވަނީ 2026 ވަނަ އަހަރުގެ ދެވަނަ ދައުރުގެ 25 ވަނަ ޖަލްސާއިންނެވެ.
މި އިޞްލާޙުގައި، މީހުން ދިރިއުޅޭ ރަށެއްގެ އިޚްތިޞާޞްގެ ތެރޭގައި ނުހިމެނޭ، އިޤްތިޞާދީ / އިންޑަސްޓްރިއަލް މަސައްކަތްކުރާ ރަށްރަށުގައްޔާއި ސަރަހައްދުތަކުގައި އުފެދޭ ކުންޏާއި އުފައްދާ ކުނި، ދިވެހިރާއްޖޭގެ މީހުން ދިރިއުޅޭ ރަށެއްގެ ކުނި މެނޭޖުކުރާ މަރުކަޒަކަށް ގެންދެވޭނެ ގޮތަށް ކަނޑައަޅައިފައިވެ އެވެ.
ކުނި މެނޭޖުކުރުމުގެ ގާނޫނު 19 ވަނަ ރައްޔިތުންގެ މަޖިލީހުން އެކުލަވާލި އިރު ރިސޯޓްތަކާއި އިގްތިސާދީ މަސައްކަތްކުރާ ތަންތަނުގައި އުފެދޭ ކުނި މީހުން ދިރިއުޅޭ ރަށްރަށަށް ގެނައުން މަނާ ކޮށްފައިއޮތީ، އެކަމަށް ފުޅާ ދާއިރާއެއްގައި ބަހުސްކޮށް ކުންޏަކީ އެ އުފެދޭ ތަނެއްގައި މެނޭޖުކުރުމަށް ބާރުއެޅުމުގެ ގޮތުންނާއި، މިފަދަ ފުރުސަތެއްގެ ސަބަބުން ކުޑަ ފީއެއް ދައްކައިގެން ރިސޯޓުތަކުންނާއި އިގްތިސާދީތަންތަނުގައި އުފެދޭ މެނޭޖުކުރަން އުނދަގޫ އެތައް ބާވަތެއްގެ ކުނި ވަސީލަތްތައް މަދު މީހުން ދިރިއުޅޭ ރަށްރަށަށް ގެންދިއުމުގެ ސަބަބުން ދިމާވެދާނެ ތިމާވެށީގެ މައްސަލަތަކާއި، ސިއްޙީ މައްސަލަތަކަކުން މީހުން ދިރިއުޅޭ ރަށްތައް ސަލާމަތްކުރުމުގެ މަގްސަދުގަ އެވެ.
ކުނި މެނޭޖުކުރުމުގެ ގާނޫނު އައުމުގެ ކުރިން ރާއްޖޭގެ ރިސޯޓުތަކުން ވަރަށް ކުޑަ ފީއެއް ދީގެން މީހުން ދިރިއުޅޭ ރަށްރަށަށް ކުނި ގެންދިއުމުގެ ސަބަބުން ރަށްރަށުގައި ބޮޑެތި ގޮނޑުތައް އުފެދި އެތައް މައްސަލަތަކެއް ކުރިމަތިވަމުން ދިޔަކަން އޮތީ ފާހަގަ ކުރެވިފަ އެވެ.
ފަތުރުވެރިކަމުގެ ގާނޫނާއި އެ ގާނޫނުގެ ދަށުން ހެދިފައިވާ ގަވައިދުތައް ބުނާ ގޮތުން ރިސޯޓުތަކުގައި އުފެދޭ ކުނި އެރަށެއްގައި މެނޭޖުކުރުމަށް ބޭނުންވާ ހުރިހާ ވަސީލަތްތަކެއް ހުންނަން ޖެހޭނީ ގާއިމު ކޮށްފަ އެވެ.
އަނެއްކޮޮޅުން މި ޤާނޫނަށް ޢަމަލުކުރަން ފެށުމުން، އެއްވެސް ފަރާތަކުން، އެއްވެސް ބާވަތެއްގެ ކުންޏެއް ދިވެހިރާއްޖެއަށް އެތެރެކުރުމަކީ ކުށެއްކަމުގައި ވަނީ ކަނޑައަޅާފަ އެވެ. މިއާއެކު އެއަރލައިންތަކުން ރާއްޖެ އަށް ބާލައި ކުންޏާއި، ރާއްޖެއަށް ކަނޑުމަގުން އަންނަ ބޯޓު ފަހަރުގައި ހުންނަ ކުނި ރާއްޖެ އަށް ބޭލޭނެ ކަމާމެދު ވަނީ ސުވާލު އުފެދިފަ އެވެ. މިއީ ވައިގެ މަގުންނާއި ކަނޑުގެ މަގުން ރާއްޖެއަށް އަންނަ އުޅަނދުފަހަރަށް މިހާރުވެސް ދެމުން އަންނަ ޚިދުމަތެކެވެ. އެހެން ނަަމަވެސް އެންވަޔަރަންމަންޓަލް ރެގިއުލޭޓަރީ އޮތޯރިޓީން ދޫކޮށްފައިވާ ހުއްދައެއް އޮވެގެން، ނުރައްކާތެރި ކުންޏާއި އެފަދަ ކުނި ހިމެނޭ އެއްޗެހި ދިވެހިރާއްޖޭގައި ވިއްކުމާއި، ބޭނުންކުރުމާއި، ޑިސްޓްރިބިއުޓް ކުރުވިދާނެ ކަމަށް ވެސް ގާނޫނަށް ގެނައި ބަދަލުގައިވެ އެވެ. އެނޫން ގޮތަކަށް އެކަން ކުރާނަމަ އެއީ ކުށެއްކަމުގައި ވަނީ ކަނޑައަޅާފަ އެވެ.
