ރާއްޖެ ހިމެނޭހެން އޭޝިއަން ކްލިއަރިންގް ޔޫނިއަންގެ ގައުމުތަކާއެކު ކުރާ ވިޔަފާރީގެ މުއާމަލާތްތަކުގައި އިންޑިއާ ރުޕީސް ބޭނުންކުރުމުގެ ފުރުސަތު އެކްސްޕޯޓަރުންނަށް ފަހިކޮށްދޭން އެ ގައުމުގެ ޓްރޭޑް ޕޮލިސީއަށް ބަދަލުތަކެއް ގެނެސްފި
21 އޯގަސްޓު 2026 | ހުކުރު 03:00މި ނިންމުމުގެ ސަބަބުން ޑޮލަރަށް ބަރޯސާވާ މިންވަރު ކުޑަވެ، ފައިސާ ބަދަލުކުރުމުގެ ޚަރަދުތައް ސަލާމަތްވުމުގެ އިތުރުން ބައިނަލްއަގުވާމީ ބާޒާރުގައި ރުޕީސްގެ ދައުރު ފުޅާވެގެންދާނެ
ޖޫން 12، 2026 ގައި ޖައްމޫ އެންޑް ކަޝްމީރުގެ ސްރީނަގަރުގައި ހުންނަ ހިންދުސްތާން ޕެޓްރޯލިއަމް ފިއުލް ސްޓޭޝަނެއްގައި މުވައްޒަފަކު އިންޑިއާގެ ފައިސާ ނޫޓުތަކެއް ގުނަނީ | ގެޓީ އިމޭޖަސް
ވިޔަފާރީގެ މުއާމަލާތްތައް ހިންގުމުގައި އިންޑިއާ ރުޕީސް ބޭނުންކުރާ މިންވަރު އިތުރުކުރުމަށް ބާރުއެޅުމުގެ ގޮތުން، ބޭރު ގައުމުތަކާއެކު ކުރާ ވިޔަފާރީގެ މުއާމަލާތްތަކުގެ އިންވޮއިސް ތައްޔާރުކުރުމާއި ފައިސާ ބަލައިގަތުމުގައި އެކްސްޕޯޓް ކުރާ ފަރާތްތަކަށް ލުއިތަކެއް ދިނުމަށްޓަކައި، އިންޑިއާ ސަރުކާރުން ބުރާސްފަތި ދުވަހު އެ ގައުމުގެ ފޮރިން ޓްރޭޑް ޕޮލިސީގެ ބައެއް މާއްދާތަކަށް ބަދަލު ގެނެސްފި އެވެ. މި ނިންމުމުގެ ސަބަބުން ބައިނަލްއަގުވާމީ މައިދާނުގައި އިންޑިއާ ރުޕީސް ބޭނުންކުރާ މިންވަރު ފުޅާވެގެންދާނެ ކަމަށް ބެލެވެ އެވެ.
އިންޑިއާގެ ޑައިރެކްޓްރޭޓް ޖެނެރަލް އޮފް ފޮރިން ޓްރޭޑް (ޑީ.ޖީ.އެފް.ޓީ) އިން ނެރުނު ނޯޓިފިކޭޝަނެއްގައި ބުނެފައިވަނީ، ފޮރިން ޓްރޭޑް ޕޮލިސީ (އެފް.ޓީ.ޕީ) 2023 ގެ ދެ މާއްދާއަކަށް އިސްލާހު ގެނެސްފައިވާ ކަމަށެވެ. މި ބަދަލު ގެނައީ އެކްސްޕޯޓް ކޮންޓްރެކްޓްތަކުގައި ފައިސާ ކަނޑައެޅުމާއި، އިންޑިއާ ރުޕީސްއިން ފައިސާ ހޯދުމުން ލިބޭ އިނާޔަތްތަކާ ގުޅޭ އުސޫލުތައް، "ފޮރިން އެކްސްޗޭންޖް މެނޭޖްމަންޓް ރެގިއުލޭޝަންސް 2023" އާ އެއްގޮތްކުރުމަށްޓަކައި ކަމަށް އެ އިދާރާއިން ހާމަކުރެ އެވެ.
އޭޝިއަން ކްލިއަރިންގް ޔޫނިއަން (އޭ.ސީ.ޔޫ) ގައި ނުހިމެނޭ ގައުމުތަކަށް މުދާ ފޮނުވާއިރު، އެކްސްޕޯޓް ކުރާ ފަރާތްތަކަށް މިހާރު އެފަރާތްތަކުގެ ކޮންޓްރެކްޓްތަކާއި އިންވޮއިސްތައް އިންޑިއާ ރުޕީސްއިން ނުވަތަ ބޭރުގެ އެހެން ފައިސާއަކުން ވެސް ތައްޔާރުކުރެވޭނެ އެވެ. މީގެ ކުރިން އާންމު އުސޫލެއްގެ ގޮތުން އެކްސްޕޯޓް ފައިސާ ބަލައިގަންނަން ޖެހެނީ ބައިނަލްއަގުވާމީ ބާޒާރުގައި ފަސޭހައިން ބަދަލުކުރެވޭ ފައިސާއަކުންނެވެ. އަލަށް ގެނައި އިސްލާހުގެ ދަށުން ދިވެހިރާއްޖެ، ބަންގްލަދޭޝް، އީރާން، މިޔަންމާ، ޕާކިސްތާން އަދި ސްރީލަންކާއާ އެކު ކުރެވޭ އެކްސްޕޯޓް މުއާމަލާތްތަކުގައި ބޭނުންކުރަން ޖެހޭނީ އޭ.ސީ.ޔޫ އިން ކަނޑައަޅާފައިވާ ފައިސާއެކެވެ. ނަމަވެސް، ރިޒާވް ބޭންކް އޮފް އިންޑިއާ (އާރް.ބީ.އައި) އިން ނެރޭ އިރުޝާދުތަކާ އެއްގޮތަށް އިންވޮއިސް ތައްޔާރުކުރުމާއި ފައިސާ ދެއްކުމުގެ ފުރުސަތު މި ނޯޓިފިކޭޝަނުން ފަހިކޮށްދެ އެވެ.
ޖީ.ޓީ.އާރް.އައި ގެ ބާނީ އަޖޭ ސްރިވަސްތާވާ ވިދާޅުވި ގޮތުގައި، ނޭޕާލް އަދި ބޫޓާނާ މެދު އަމަލުކުރަނީ ތަފާތު ގޮތަކަށެވެ. އެގޮތުން އެ ދެ ގައުމާއެކު ކުރެވޭ އެކްސްޕޯޓް ކޮންޓްރެކްޓްތަކުގެ އަގު ކަނޑައަޅައި ފައިސާ ދައްކަން ޖެހެނީ އާންމު ގޮތެއްގައި އިންޑިއާ ރުޕީސްއިން ނުވަތަ އާރް.ބީ.އައި ގެ އިރުޝާދުތަކާ އެއްގޮތްވާ ގޮތުގެ މަތިންނެވެ. އޭޝިއަން ކްލިއަރިންގް ޔޫނިއަންގައި ހިމެނެނީ ނުވަ ގައުމެކެވެ. އެއީ ދިވެހިރާއްޖެ، ބަންގްލަދޭޝް، ބޫޓާން، އިންޑިއާ، އީރާން، މިޔަންމާ، ނޭޕާލް، ޕާކިސްތާން އަދި ސްރީލަންކާ އެވެ. މި ކޮންމެ ގައުމަކުން ވެސް އެ ގައުމެއް ތަމްސީލުކުރަނީ މަރުކަޒީ ބޭންކުން ނުވަތަ މަނިޓަރީ އޮތޯރިޓީންނެވެ.
ޖީ.ޓީ.އާރް.އައި އިން ބުނާ ގޮތުގައި، މި ބަދަލުގެ ސަބަބުން އެމެރިކާ ޑޮލަރަށް ނުވަތަ ބައިނަލްއަގުވާމީ އެހެން ފައިސާއަކަށް ބަރޯސާނުވެ، އިންޑިއާގެ އެކްސްޕޯޓަރުންނާއި ބޭރުގެ ގަންނަ ފަރާތްތަކަށް މުއާމަލާތްތައް ނިންމުމުގެ ފުރުސަތު ލިބި، އިންޑިއާ ރުޕީސް ބައިނަލްއަގުވާމީ ގޮތުން ބޭނުންކުރުން ފުޅާވެގެންދާނެ އެވެ. މި ނިންމުމަށް މަރުހަބާ ވިދާޅުވަމުން އަޖޭ ސްރިވަސްތާވާ ވިދާޅުވީ، މީގެ ސަބަބުން ކުރިން އޮތް ނުތަނަވަސްކަން ނެތިގޮސް، ރުޕީސްއިން ލިބޭ ފައިސާއަށް ވެސް ބޭރު ފައިސާއިން ލިބޭ އާމްދަނީއާ އެއް ހަމައެއްގެ ދަރަޖަ ލިބިގެންދާނެ ކަމަށެވެ. ނަމަވެސް ހަމައެކަނި ގަވާއިދަށް ގެނެވޭ ބަދަލަކުން ބޮޑު މިންވަރަކަށް ރުޕީސްގެ ވިޔަފާރި ކުރިއަށް ނުދާނެ ކަމަށާއި، އެހެންނަމަވެސް ރުޕީސް ބޭނުންކުރުމުން ފައިސާ ބަދަލުކުރުމުގެ ޚަރަދު ކުޑަވެ، ބޭރު ފައިސާގެ އަގަށް އަންނަ ބަދަލުތަކުން ކުރާ އަސަރު ކުޑަވާނެ ކަމަށް އޭނާ ފާހަގަކުރެއްވި އެވެ. އަދި ޑޮލަރުގެ ތަދިކަން ކުރިމަތިވެފައިވާ ގައުމުތަކާއި ބައިނަލްއަގުވާމީ ފައިސާ ދެއްކުމުގެ ނިޒާމުތައް ބޭނުންކުރުމުގައި ދަތިތައް ހުރި ގައުމުތަކާއެކު ވިޔަފާރިކުރުމުގައި މި އިންތިޒާމަކީ ވަރަށް ބޭނުންތެރި އިންތިޒާމަކަށް ވާނެ ކަމަށް ވެސް އޭނާ އިތުރަށް ވިދާޅުވި އެވެ.
