ލީ ކުއާން ޔޫ ބޭނުންކުރެއްވި ދެލިއަޅާ ގަލަމެއް 461،500 ސިންގަޕޫރު ޑޮލަރަށް ނީލަމެއްގައި ވިއްކާލައިފި
17 އޯގަސްޓު 2026 | ހޯމަ 16:34ސިންގަޕޫރުގެ ބާނީ ލީ ކުއާން ޔޫ ބޭނުންކުރެއްވި ރިހިކުލައިގެ "މޮންބްލާންކް" ގަލަމެއް، ނީލަމުގައި އަންދާޒާކުރި އަގަށްވުރެ ނުވަ ގުނަ ބޮޑު އަގަކަށް ވިއްކާލައިފި. ދުނިޔޭގެ އެކި ކަންކޮޅުތަކުން ގިނަ ބަޔަކު ބިޑުކުރި މި ގަލަން ވިއްކާލާފައިވަނީ 461,500 ސިންގަޕޫރު ޑޮލަރަށް. މިއީ 1950 ގެ އަހަރުތަކުގައި އުފައްދާފައިވާ، ލީ ކުއާން ޔޫގެ ނަންފުޅު ކަނޑައިގެން ލިޔެފައިވާ ވަރަށް ޚާއްޞަ ގަލަމެއް
ސިންގަޕޫރުގައި ބޭއްވި ނީލަމެއްގައި ރަން ތުނޑެއް ލާފައިވާ ދެލިއަޅާ ގަލަމެއް 266،000 ޕައުންޑް (ގާތްގަނޑަކަށް 5.2 މިލިއަން ދިވެހި ރުފިޔާ) އަށް ވިއްކާލައިފި | ހޮޓްލޮޓްޒް
ސިންގަޕޫރުގައި ބޭއްވި ނީލަމެއްގައި، ރިހިކުލައިގެ "މޮންބްލާންކް" ދެލިއަޅާ ގަލަމެއް 461,500 ސިންގަޕޫރު ޑޮލަރަށް (266,682 އިނގިރޭސި ޕައުންޑަށް) ވިއްކާލައިފި އެވެ.
މި ފައުންޓަން ޕެން ވިއްކާލާފައިވަނީ، ނީލަން ފެށުމުގެ ކުރިން އެ ގަލަމަށް ލިބޭނެ ކަމަށް އަންދާޒާކުރި އެންމެ މަތީ އަގަށްވުރެ ނުވަ ގުނަ ބޮޑު އަގަކަށެވެ.
އޮންލައިންކޮށް ކުރިއަށްދިޔަ މި ނީލަމުގައި ދުނިޔޭގެ އެކި ކަންކޮޅުތަކުން 111 ބިޑު ހުށަހަޅާފައިވާއިރު، މިއީ ސިންގަޕޫރުގެ ބާނީ އަދި ފުރަތަމަ ބޮޑުވަޒީރު ލީ ކުއާން ޔޫ ބޭނުންކުރެއްވި ގަލަމެކެވެ.
"ސްޓާލިން ސިލްވަރ މޮންބްލާންކް މައިސްޓަރސްޓަކް ނަންބަރު 146" މޮޑެލްގެ މި ގަލަމަކީ 1950 ގެ އަހަރުތަކުގައި އުފައްދާފައިވާ، ޕިސްޓަން ބޭނުންކޮށްގެން ދެލި އެޅޭގޮތަށް ފަރުމާކޮށްފައިވާ އަގުބޮޑު ގަލަމެކެވެ.
މި ގަލަމުގެ ދޯޯރީގައި "SM Lee Kuan Yew" (ސީނިއާ މިނިސްޓަރ ލީ ކުއާން ޔޫ) ގެ ނަންފުޅު ކަނޑައިގެން ލިޔެފައިވާއިރު، ރަންކުލައިގެ މެޓަލް ޑީޓެއިލްތަކާއި 18 ކެރަޓް ރަނުން ހަދާފައިވާ ގަލަމުގެ ތުނޑެއް ހިމެނެ އެވެ. މި ގަލަން ވިއްކާލާފައިވަނީ ސިންގަޕޫރުގެ ނީލަން ކުންފުންޏެއް ކަމަށްވާ "ހޮޓްލޮޓްޒް" އިން އިންތިޒާމުކުރި "އިންޓީރިއާސް އެންޑް ކަލެކްޓިބަލްސް – އޯގަސްޓް، ފައިން އާޓް ފޯކަސް" އޮންލައިން ނީލަމުގަ އެވެ.
ނީލަން ފެށުމުގެ ކުރިން މި ގަލަން ވިކޭނެ ކަމަށް އަންދާޒާކޮށްފައިވަނީ 30,000 އާއި 50,000 ސިންގަޕޫރު ޑޮލަރާ ދެމެދުގެ އަގަކަށެވެ. ނަމަވެސް ބިޑް ކުރަން ފަށާފައިވަނީ 20,000 ސިންގަޕޫރު ޑޮލަރުންނެވެ.
ލީ ކުއާން ޔޫ އަކީ 1959 އިން 1990 އަށް ސިންގަޕޫރުގެ ފުރަތަމަ ބޮޑުވަޒީރުކަން ކުރެއްވި ފަރާތެވެ. އޭނާއަކީ ޒަމާނީ ސިންގަޕޫރު ބިނާކުރެއްވި މޭސްތިރިޔާގެ ގޮތުގައި ގިނަ ބަޔަކު ގަބޫލުކުރާ ޝަޚުސިއްޔަތެކެވެ.
ބޮޑުވަޒީރުކަމަށްފަހު، އޭނާ ވަނީ 2004 ވަނަ އަހަރާ ހަމައަށް ސީނިއާ މިނިސްޓަރުކަން ކުރައްވާފަ އެވެ. އަދި އޯގަސްޓް 2004 އިން މެއި 2011 އަށް ސިންގަޕޫރުގެ ފުރަތަމަ "މިނިސްޓަރ މެންޓޯރ" ގެ މަގާމު ފުރުއްވި އެވެ. އޭނާ 2015 ވަނަ އަހަރު އަވަހާރަވުމާ ހަމައަށް ހުންނެވީ ސިންގަޕޫރުގެ ޕާލަމެންޓް މެންބަރެއްގެ ގޮތުގަ އެވެ.
މި ގަލަމަކީ މީގެ ކުރިން ޖުލައި 2003 ގައި ބޭއްވި "ލީ ކުއާން ޔޫ ފެމިލީ ކަލެކްޝަން" ޗެރިޓީ ނީލަމުގައިވެސް ވިއްކާލާފައިވާ ގަލަމެކެވެ. އެ ފަހަރު އޭނާގެ އަމިއްލަފުޅު ބައެއް ތަކެތި ނީލަން ކިޔާފައިވަނީ ޚައިރާތަށް ފައިސާ ހޯދުމަށެވެ.
2003 ވަނަ އަހަރު، ލީއާ ގުޅުންހުރި އެހެން ދެލިއަޅާ ގަލަމެއް ކަމަށްވާ ކަޅުކުލައިގެ "ވޯޓަރމަން" ގަލަމެއް 350,000 ސިންގަޕޫރު ޑޮލަރަށް ވިއްކާލާފައިވެ އެވެ. އެއީ 1957 ވަނަ އަހަރު ސިންގަޕޫރަށް އަމިއްލަ ދާޚިލީ ސަރުކާރެއް ހިންގުމުގެ ބާރު ލިބިދިން ގާނޫނީ އެއްބަސްވުމުގައި ސޮއިކުރެއްވުމަށް އޭނާ ބޭނުންކުރެއްވި ގަލަމެވެ. އެ ގަލަމުގެ އަގަކީ 10,000 ޑޮލަރު ކަމަށް އޭރު އަންދާޒާކުރި ނަމަވެސް، އެއަށްވުރެ މާ ބޮޑު އަގަކަށް ވިކިގެންދިޔަ އެ ނީލަމުން ލިބުނު ފައިސާވެސް ހަދިޔާކުރީ ޗެރިޓީއަށެވެ.
