އެކްސިޑެންޓްގައި ޒަހަމްވި ޒުވާނާއަށް އިތުރު ފަރުވާއަށް މާލެ ގެންނަނީ
4 އޮކްޓޯބަރު 2017 | ބުދަ 04:01އަނިޔާވި ހަތަރު މީހުންނަށް ހިތަދޫ ރީޖަނަލް ހޮސްޕިޓަލްގައި މިހާރު ދަނީ ފަރުވާދެމުން
ހިތަދޫ ރީޖަނަލް ހޮސްޕިޓަލް
އައްޑޫ ސިޓީގައި ދެ ސައިކަލް ޖެހި ހިނގި އެކްސިޑެންޓުގައި އަނިޔާވި ހަތަރު މީހުންގެ ތެރެއިން އެކަކު ބުދަ އިތުރު ފަރުވާއަށް މާލެ ގެންނަން ހަމަޖެހިފައިވާ ކަމަށް ހިތަދޫ ރީޖަނަލް ހޮސްޕިޓަލުން ބުނެފިއެވެ.
އައްޑޫ ސިޓީ ހިތަދޫ ބޮޑުމަގުގައި އަންގާރަ ދުވަހުގެ ހަވީރުގެ ވަގުތެއްގައި މި އެކްސިޑެންޓް ހިނގާފައި ވަނީ ބޮޑުމަގުން ދިޔަ ސައިކަލެއް ގޯޅި އަޅަން އުޅެނިކޮށް ފަހަތުން އައި އެހެން ސައިކަލަކުން ޖެހިގެންނެވެ.
އައްޑޫ ރީޖަނަލް ހޮސްޕިޓަލްގެ މެނޭޖަރ މުހައްމަދު ނަޖީބް ވިދާޅުވީ އެކްސިޑެންޓުގައި ޒަހަމްވި މީހުންގެ ތެރެއިން އަންހެނަކަށް ސީރިއަސް އަނިޔާތަކެއް ލިބިގެން އަންގާރަ ދުވަހު އައިސީޔޫގައި ފަރުވާދެމުންދާ ކަމަށެވެ. އެހެންކަމުން އައިސީޔޫގައި ފަރުވާދެމުންދާ އަންހެން މީހާއަށް އިތުރު ފަރުވާ ދިނުމަށް ބުދަ ދުވަހުގެ މެންދުރު ފްލައިޓުން މާލެ ފޮނުވާލުމުގެ ކަންކަން ހަމަޖައްސަމުންދާ ކަމަށް ނަޖީބް ވިދާޅުވިއެވެ.
"އިތުރު ފަރުވާއަށް މާލެ ގެންނަން ހަމަޖެހިފައިވާ އަންހެން މީހާގެ ހާލު އެހާ ގޯހެއް ނޫން، އެހެންނަމަވެސް މޫނަށް ވަރަށް ބޮޑަށް އަނިޔާވެފައި ވަނީ، ހާއްސަކޮށް ދަތްދޮޅިއަށް" ނަޖީބް ވިދާޅުވިއެވެ.
މަންޒަރު ދުށް ބައެއް މީހުން ރާއްޖެއެމްވީއަށް މައުލޫމާތު ދެމުން ބުނީ ގޯޅި އަޅަން އުޅުނު ސައިކަލުގައި ތިބި ދެ އަންހެނުންގެ ތެރެއިން ސައިކަލް ދުއްވަން އިން އަންހެނާގެ ބޯ ފަޅައިގެން ގޮސް މޫނަށް ވެސް ވަރަށް ބޮޑަށް އަނިޔާވި ކަމަށެވެ.
ހިތަދޫ ރީޖަނަލް ހޮސްޕިޓަލުން ބުނީ މާލެ ފޮނުވާލަން ހަމަޖެހިފައިވާ އަންހެން މީހާގެ އިތުރުން ތިން މީހާކަށް އެ ހޮސްޕިޓަލުން ފަރުވާދެމުންދާ ކަމަށެވެ. އަދި އެމީހުންގެ ހާލު ރަނގަޅު ކަމަށް ވެސް ބުންޏެވެ.
