ޕޯޓް ޓެކްނޮލޮޖީ އިންޓަނޭޝަނަލް ގެ އެޑްވައިޒަރީ ބޯޑުގެ ޗެއާމަންގެ މަގާމަށް ރައީސް ނަޝީދު
10 އޯގަސްޓު 2026 | ހޯމަ 18:10ޕޯޓް ޓެކްނޮލޮޖީ އިންޓަނޭޝަނަލްގެ "ގްލޯބަލް ޓްރާންސްފޯމޭޝަން ސީރީޒް" ގެ ދަށުން ސައުދީ އަރަބިއްޔާ އާއި ދެކުނު އެމެރިކާގެ ބަނދަރުތަކާ ގުޅޭ ދިރާސާ ފޮތްތަކެއް ނެރުމަށް ރައީސް ނަޝީދު އިސްކޮށް މަސައްކަތް ކުރައްވާނެ. މި މަސައްކަތްތަކުގެ ސަބަބުން ދެމެހެއްޓެނިވި ތަރައްގީއާއި ތިމާވެށީގެ ގޮންޖެހުންތަކަށް ހައްލު ހޯދުމަށް ބައިނަލްއަގުވާމީ ފެންވަރުގައި ކުރާ މަސައްކަތްތަކަށް އިތުރު ބާރެއް ލިބިގެންދާނެ ކަމަށް އެމަނިކުފާނު ވިދާޅުވި
ދިވެހިރާއްޖޭގެ ކުރީގެ ރައީސް މުޙައްމަދު ނަޝީދު | ގެޓީ އިމޭޖަސް
ޕޯޓް ޓެކްނޮލޮޖީ އިންޓަނޭޝަނަލް (ޕީ.ޓީ.އައި) ގެ އެޑްވައިޒަރީ ބޯޑުގެ ޗެއާމަންގެ މަގާމަށް ކުރީގެ ރައީސް މުހައްމަދު ނަޝީދު އައްޔަންކޮށްފި އެވެ. މި މަގާމުގައި އެމަނިކުފާނު މަސައްކަތް ކުރައްވާނީ އެ އިދާރާއަށް އިސްތިރާޖީ ލަފާދެއްވުމަށާއި، ބައިނަލްއަގުވާމީ މަޝްރޫއުތަކާއި ހަރަކާތްތަކަށް އެހީތެރިކަން ފޯރުކޮށްދެއްވުމަށެވެ.
މި ޒިންމާގެ ދަށުން ރައީސް ނަޝީދު އެންމެ ފުރަތަމަ އިސްކަންދެއްވާނީ ޕީ.ޓީ.އައި ގެ "ގްލޯބަލް ޓްރާންސްފޯމޭޝަން ސީރީޒް" ގެ ދަށުން ނެރުމަށް ހަމަޖެހިފައިވާ މުހިންމު ދެ ފޮތަކަށެވެ. މީގެ ތެރެއިން ފުރަތަމަ ފޮތް ކަމަށްވާ "މަވާނީ: ދަ ޓްރާންސްފޯމޭޝަން އޮފް ސައުދީ އަރަބިއާސް ޕޯޓްސް" ގައި، ސައުދީ އަރަބިއްޔާގެ ބަނދަރުތަކުގެ ނެޓްވޯކާއި، އެ ގައުމުގެ ލީޑަޝިޕާއި، އިންވެސްޓްމަންޓް ޕްރޮގްރާމްތަކުގެ އިތުރުން "ވިޜަން 2030" ގެ ދަށުން ލޮޖިސްޓިކްސްގެ ދާއިރާއިން އެ ގައުމުން ގެންގުޅޭ އަމާޒުތަކަށް އަލިއަޅުވާލާނެ އެވެ. މި ފޮތް ޗާޕުކޮށްގެންނާއި ޑިޖިޓަލް ފޯމެޓުގައި ޝާއިއުކުރުމަށް ވަނީ ހަމަޖެހިފަ އެވެ.
މީގެ އިތުރުން، މި ސީރީޒްގެ ދެވަނަ ފޮތް ކަމަށްވާ "10 ފާސްޓެސްޓް-ގްރޯވިންގ ޕޯޓްސް އިން ސައުތު އެންޑް ސެންޓްރަލް އެމެރިކާ" ތައްޔާރުކުރުމުގައި ވެސް ރައީސް ނަޝީދު ބައިވެރިވެވަޑައިގަންނަވާނެ އެވެ. މިއީ 2027 ވަނަ އަހަރު ޕެނަމާގައި ބޭއްވުމަށް ހަމަޖެހިފައިވާ "ސީ.ޓީ.އޭ.ސީ އެމެރިކާސް" ކޮންފަރެންސްގައި ނެރުމަށް ހަމަޖެހިފައިވާ އަހަރީ ރިޕޯޓެކެވެ. ޗާޕުކޮށްގެންނާއި އޮންލައިންކޮށް ޝާއިއުކުރާ މި ރިޕޯޓުގައި، ދެކުނު އަދި މެދުތެރޭ އެމެރިކާގެ ސަރަހައްދީ ކުރިއެރުމާއި، އިންވެސްޓްމަންޓް އަދި ވިޔަފާރީގައި މުހިންމު ދައުރެއް އަދާކުރާ ބަނދަރުތައް ދިރާސާކުރާނެ އެވެ. އަދި މޫސުމީ ބަދަލުތަކުގެ ނުރައްކާ އޮތް އިގްތިސާދުތަކަށް، ބަދަލުވަމުންދާ ހާލަތްތަކަށް ކެތްކުރެވޭ ފަދަ އިންފްރާސްޓްރަކްޗާއެއްގެ މުހިންމުކަމާ މެދު ވެސް މި ރިޕޯޓުގައި ބަހުސްކުރާނެ އެވެ.
ރައީސް ނަޝީދުގެ ދައުރުގެ ތެރޭގައި ޕީ.ޓީ.އައި އިން އިންތިޒާމުކުރާ ހާއްސަ ހަރަކާތްތަކާއި ބައިނަލްއަގުވާމީ ބައްދަލުވުންތަކުގައި ބައިވެރިވެވަޑައިގަތުން ހިމެނެ އެވެ. މީގެ ބޭނުމަކީ ބައިނަލްއަގުވާމީ ވިޔަފާރިއާއި ކަނޑުދަތުރުފަތުރުގެ ދާއިރާ ކުރިއެރުވުމުގައި އިސްކޮށް އުޅުއްވާ ސިޔާސަތު ކަނޑައަޅާ ފަރާތްތަކާއި، ސިނާއަތުގެ މާހިރުންނާ ގުޅުވައިދިނުމަށް އެ ޖަމިއްޔާއަށް އެހީތެރިކަން ފޯރުކޮށްދިނުމެވެ.
ޕީ.ޓީ.އައި ގެ އެޑްވައިޒަރީ ބޯޑާ ގުޅިވަޑައިގަތުމާ ގުޅޭގޮތުން ރައީސް މުހައްމަދު ނަޝީދު ވިދާޅުވީ، އެ ބޯޑާ ގުޅިވަޑައިގަތުމަކީ ލިބިވަޑައިގެންނެވި ވަރަށް ބޮޑު ޝަރަފެއް ކަމަށެވެ.
"މި މަސައްކަތުގެ ސަބަބުން ދެމެހެއްޓެނިވި ތަރައްގީ ކުރިއެރުވުމަށް އަޅުގަނޑު ކުރަމުންދާ މަސައްކަތްތަކަށް އިތުރު ބާރެއް ލިބިގެންދާނެ. އަދި ތިން ދަހަރަށްވުރެ ގިނަ ދުވަސްވަންދެން ސިނާއަތުގެ އިތުބާރު ހޯދާފައިވާ މިފަދަ މުހިންމު ޕްލެޓްފޯމަކަށް ހިއްސާވުމުގެ ފުރުސަތު ލިބިގެންދާނެ. ޕީ.ޓީ.އައި އިން ދާއިރާގެ ކުރިއެރުމަށް ކުރަމުންދާ މަސައްކަތްތަކަކީ، ސިނާއަތަށް ކުރިމަތިވެފައިވާ ތިމާވެށީގެ ގޮންޖެހުންތަކާ މެދު ފުންކޮށް މަޝްވަރާކޮށް، ހައްލު ހޯދުމަށް އެޅޭ ވަރުގަދަ ބިންގަލެއް،" ރައީސް ނަޝީދު ވިދާޅުވި އެވެ.
އެމްޑީޕީ ޗެއަރޕާސަންގެ މަގާމުގައި ހުންނެވި ރައީސް ނަޝީދު އެންމެ ފަހުން ފުރުއްވި މުހިންމު މަގާމުތަކުގެ ތެރޭގައި، 2023 އިން ފެށިގެން 2026 ވަނަ އަހަރުގެ އޭޕްރީލް މަހުގެ ނިޔަލަށް ކްލައިމެޓް ވަލްނަރަބަލް ފޯރަމް (ސީ.ވީ.އެފް) އަދި ވީ20 ފައިނޭންސް މިނިސްޓަރުންގެ ސެކްރެޓަރީ ޖެނެރަލްގެ މަގާމު ހިމެނެ އެވެ. އެމަނިކުފާނުގެ ސިޔާސީ ހަޔާތްޕުޅުގައި ޔޫރަޕް، އުތުރު އެމެރިކާ، ގަލްފް ސަރަހައްދު އަދި ދެކުނު އޭޝިއާގެ ގައުމުތަކުގެ ސަރުކާރުތަކާއި ބައިނަލްއަގުވާމީ ލީޑަރުންނާއެކު ގާތުން މަސައްކަތް ކުރައްވާފައިވެ އެވެ.
މަސްދަރު: ޕޯޓް ޓެކްނޮލޮޖީ އިންޓަރނޭޝަނަލް
