ސިގްނަލްތަކަށް ހުރަސްއަޅައިގެން އިސްރާއީލުގެ ހާމީސް ޑްރޯނަކާއި އެމެރިކާގެ ރީޕަރ ޑްރޯނެއް އެއްވެސް ގެއްލުމެއް ނުދީ އަތުލައިގެންފައިވާ މަންޒަރު އީރާނުން ދައްކާލައިފި

އިލެކްޓްރޯނިކް ވޯފެއާ ނުވަތަ ސިގްނަލްތަކަށް ހުރަސްއަޅައިގެން އިސްރާއީލުގެ "ހާމީސް 900" މަރުކާގެ ޑްރޯން (ޔޫއޭވީ) އެއް އެއްވެސް ގެއްލުމެއް ނުދީ ހުއްޓުވައި، އަތުލައިގެންފައިވާ ކަމަށް ބުނެ އީރާނުން އޭގެ މަންޒަރުތައް އާންމުކޮށްފި އެވެ.

އީރާނުގެ އިސްލާމިކް ރިވޮލިއުޝަނަރީ ގާޑް ކޯޕްސް (އައިއާރުޖީސީ) އިން ބުނި ގޮތުގައި، އެ ޑްރޯންގެ ޓެކްނޮލޮޖީ ދިރާސާކުރުމަށް ވަނީ ޑްރޯން ރޫޅާލައިފަ އެވެ.

މިއީ ޒަމާނީ ޑްރޯން ހަނގުރާމައިގައި އީރާނަށް ލިބުނު ޖާސޫސީ ބޮޑު ކުރިއެރުމެއްގެ ގޮތުގައި ބެލެވެ އެވެ.

އޭގެ އިތުރުން އެމެރިކާގެ "އެމްކިއު-9 ރީޕާ" މަރުކާގެ ޑްރޯނެއް މިހާރު ވަނީ އީރާނުގެ ބާރުގެ ދަށަށް ގެންގޮސްފަ އެވެ. އަދި މި ދެ ޑްރޯނަށް ވެސް ބޮޑު ގެއްލުމެއް ލިބިފައި ނުވާކަން ފާހަގަކުރެވެ އެވެ. އައިއާރުޖީސީން  މި ޑްރޯންތަކުގައި ބޭނުންކޮށްފައިވާ ނިޒާމުތަކާއި ޓެކްނޮލޮޖީތައް ދިރާސާކޮށް އަދި އޭގެ މުހިންމު ބައިތައް ރިވާސް އިންޖިނިއަރިން މެދުވެރިކޮށް  ލިބޭ މައުލޫމާތުގެ އެހީގައި އީރާނުގެ އަމިއްލަ ޑްރޯންތައް އިތުރަށް ތަރައްގީކުރުމުގެ މަސައްކަތް ދަނީ ކުރަމުންނެވެ.

ހަނގުރާމަ ފެށުނީއްސުރެ އެމެރިކާގެ "އެމްކިއު-9 ރީޕާ" މަރުކާގެ ގާތްގަނޑަކަށް 30 ޑްރޯން އީރާނުން ވައްޓާލާފައިވާ ކަމަށް އެމެރިކާގެ އޮފިޝަލަކު މިދިޔަ ޖުލައިމަހުގެ ކުރީކޮޅު ވަނީ ވިދާޅުވެފަ އެވެ.

2007 ވަނަ އަހަރު އެމެރިކާގެ އެއާފޯސްގެ ޚިދުމަތަށް ނެރުނު ރީޕާ ޑްރޯންތަކަކީ، މެދުއިރުމައްޗާއި އެހެނިހެން ހަމަނުޖެހުން ބޮޑު ސަރަހައްދުތަކުގައި އެމެރިކާއިން ހިންގާ އޮޕަރޭޝަންތަކުގެ މައިބަދަ އެވެ. މިއީ އިރާގާއި އަފްޣާނިސްތާނުގެ ހަނގުރާމަތަކުގައި އިންސާނުންނާ ނުލައި ދުއްވާ އުޅަނދުތަކަށް އެމެރިކާގެ އަސްކަރިއްޔާއިން ބަރޯސާވާ މިންވަރު އިތުރުވެފައިވާކަން ހާމަކޮށްދޭ ކަމެކެވެ.

ރީޕާ ޑްރޯންތައް ފަރުމާކޮށްފައިވަނީ ވައިގެ ސަރަހައްދުގެ ފުރިހަމަ ކޮންޓްރޯލް އެމެރިކާއަށް އޮންނަ ހާލަތްތަކުގައި ބޭނުންކުރުމަށެވެ. ނަމަވެސް، އީރާނުން ވަނީ އެމެރިކާއަށް އޮތް އެ ފުރުސަތަށް ތަކުރާރުކޮށް ހުރަސްއަޅައި ގޮންޖަހާފަ އެވެ.

ޖެނެރަލް އެޓޮމިކްސް ކުންފުނީގެ ތަރުޖަމާނު ސީ. މާކް ބްރިންކްލީ ވިދާޅުވި ގޮތުގައި، އެމެރިކާގެ އެއާފޯސް އިން ރީޕާ ޑްރޯން ގަތުމުގެ ފަސް އަހަރުގެ އެންމެ ފަހު ކޮންޓްރެކްޓް އިއުލާންކުރީ 2020 ވަނަ އަހަރު އެވެ. އަދި ޖުމްލަ 575 ޑްރޯން އުފެއްދުމަށްފަހު، އެ އުފައްދާ ލައިން މިދިޔަ އަހަރު ވަނީ ހުއްޓާލާފަ އެވެ. އެންމެ ފަހުން އުފެއްދި ބެޗުން ހަތަރު ޑްރޯން އެކުގައި ގަތްއިރު، އޭގެން ކޮންމެ ޑްރޯނަކަށް ގާތްގަނޑަކަށް 16 މިލިއަން ޑޮލަރު ޖެހުނު ކަމަށް އޭނާ ވިދާޅުވި އެވެ. އީރާނުން ވަނީ ހަނގުރާމައިގެ ތެރޭގައި އެމެރިކާގެ އެތައް ޑްރޯނެއް ވައްޓާލާފައިކަމަށް އިއުލާނު ކޮށްފަ އެވެ.

މިދިޔަ މޭ މަހު ބޭއްވި ބަޖެޓް އަޑުއެހުމެއްގައި، އެމެރިކާ އެއާފޯސްގެ އެންމެ އިސް އޮފިސަރު ޖެނެރަލް ކެނެތު ވިލްސްބެކް ގާނޫނު ހަދާ މަޖިލީހުގެ މެންބަރުންނަށް ވިދާޅުވީ، އީރާނާއެކު ކުރާ ހަނގުރާމައިގައި ރީޕާ ޑްރޯން އަކީ "އެންމެ އަގުހުރި" ވަސީލަތް ކަމަށެވެ.

އެއާފޯސް އިން ޑްރޯން ބޭނުންކުރާ މިންވަރަށް އިޝާރާތް ކުރައްވައި އޭނާ ވިދާޅުވީ، "އަޅުގަނޑުމެން ވަރަށް ގިނަ ހަމަލާތައް ދީފިން. އެހެން އެއްވެސް ވަސީލަތެއް މިއާ ގާތްވެސް ނުކުރޭ،" ކަމަށެވެ.

ޑްރޯންގެ އިތުރުން މި ހަނގުރާމައިގައި އެމެރިކާގެ ބައެއް އަސްކަރީ މަތިންދާބޯޓުތައް ވެސް ވަނީ ގެއްލިފަ އެވެ. އޭގެ ތެރޭގައި މިދިޔަ މާރިޗު މަހު ކުވެއިތުގެ އެއާ ޑިފެންސް ސިސްޓަމަށް އޮޅިގެން އެމެރިކާގެ ތިން އެފް-15 ފައިޓާ ޖެޓް ވައްޓާލުން ހިމެނެ އެވެ. އެ ހާދިސާގައި ހުރިހާ ފްލައިޓް ކްރޫއިން ވަނީ ސަލާމަތުން ބޯޓުން ފުންމާލާފަ އެވެ. އަދި ހަމަ އެ މަހު، އިރާގުގެ ހުޅަނގު ސަރަހައްދުގައި ވައިގެ ތެރޭގައި ދެ ކޭސީ-135 ރިފިއުލިން މަތިންދާބޯޓު ޖެހި ހިނގި އެކްސިޑެންޓެއްގައި އެއް ބޯޓު ވެއްޓި، އޭގައި ތިބި ހަ ފަޅުވެރިން ވެސް ވަނީ މަރުވެފަ އެވެ.

މީގެ އިތުރުން، އޭޕްރީލް މަހު އީރާނުން ދިން ހަމަލާއެއްގައި އެމެރިކާ އެއާފޯސްގެ އެފް-15 ޖެޓެއް ވައްޓާލާފައިވެ އެވެ. އޭގެ ޕައިލެޓް ވަގުތުން ސަލާމަތްކުރެވުނު އިރު، ވެޕަން ސިސްޓަމްސް އޮފިސަރު ސަލާމަތްކުރެވުނީ ދެ ދުވަސް ފަހުންނެވެ. އެފް-15 ގެ އިތުރުން، ސަލާމަތްކުރުމުގެ އޮޕަރޭޝަނަށް އެހީތެރިވަމުންދިޔަ އޭ-10 މަރުކާގެ ބޯޓަކަށް ވެސް އީރާނުގެ ހަމަލާތައް އަމާޒުވި އެވެ. ނަމަވެސް، އެ ބޯޓު ކުވެއިތާ ހަމައަށް ދަތުރުކޮށް، ބޯޓު ވެއްޓުމުގެ ކުރިން ޕައިލެޓް ވަނީ ސަލާމަތުން ފުންމާލާފަ އެވެ.