ބާރުތަކުގެ ކުރިމަތީގައި އީރާން އިން ފަހަތަށް ނުޖެހޭނަން: ރައީސް ޕެޒެޝްކިއާން
8 އޯގަސްޓު 2026 | ހޮނިހިރު 06:19އީރާންގެ އައިއާރުއައިބީ ބްރޯޑްކާސްޓަރުން ރިޕޯޓު ކޮށްފައިވާ ގޮތުގައި، ޕެޒެޝްކިއާން ވިދާޅުވީ އީރާން އިން މަސައްކަތް ކުރަނީ އެ ޤައުމުގެ ދިފާއީ ޤާބިލުކަން އަދި ސަލާމަތާ ބެހޭ ކަންކަން ކުރިއެރުވުމަށް ކަމަށް. އެމެރިކާ އިން ގަލްފު ޤައުމުތަކުގައި ހުންނަ އަސްކަރީ ބޭސްތައް ބޭނުން ކޮށްގެން އީރާން އަށް ހަމަލާ ދީފައިވާ ކަމަށް އެ ޤައުމުން ބުނާ ބުނުން، ޕެޒެޝްކިއާން ވަނީ ތަކުރާރު ކުރައްވާފައި
އީރާންގެ ރައީސް މަސްއޫދު ޕެޒެޝްކިއާން | ގެޓީ އިމޭޖަސް
އިރާން އިން ބޭނުން ވަނީ ހަނގުރާމަ ފުޅާ ކުރަން ނޫން ކަމަށާއި، ނަމަވެސް ބާރުތަކުގެ ކުރިމަތީގައި އެ ޤައުމުން ފަހަތަށް ނުޖެހޭނެ ކަމަށް އީރާންގެ ރައީސް މަސްއޫދު ޕެޒެޝްކިއާން ވިދާޅުވެއްޖެ އެވެ.
އީރާންގެ އައިއާރުއައިބީ ބްރޯޑްކާސްޓަރުން ރިޕޯޓު ކޮށްފައިވާ ގޮތުގައި، ޕެޒެޝްކިއާން ވިދާޅުވީ އީރާން އިން މަސައްކަތް ކުރަނީ އެ ޤައުމުގެ ދިފާއީ ޤާބިލުކަން އަދި ސަލާމަތާ ބެހޭ ކަންކަން ކުރިއެރުވުމަށް ކަމަށެވެ. އެމެރިކާ އިން ގަލްފު ޤައުމުތަކުގައި ހުންނަ އަސްކަރީ ބޭސްތައް ބޭނުންކޮށްގެން އީރާން އަށް ހަމަލާ ދީފައިވާ ކަމަށް އެ ޤައުމުން ބުނާ ބުނުން، ޕެޒެޝްކިއާން ވަނީ ތަކުރާރު ކުރައްވައިފަ އެވެ.
މީގެ އިތުރުން ޕެޒެޝްކިއާން ވިދާޅުވީ، އެމެރިކާ އިން ބޭނުން ވަނީ އީރާން އާއި އެ ޤައުމުގެ ސަރަހައްދީ ޤައުމުތަކާ ދެމެދު ބައިބައިވުން އުފެއްދުމަށް ކަމަށެވެ. ނަމަވެސް ޕެޒެޝްކިއާން ވިދާޅުވީ، އީރާން އިން އަވަށްޓެރި ޤައުމުތަކާ ދެމެދު އޮތް ގިނަ މައްސަލަތައް ޙައްލު ކޮށްފައިވާ ކަމަށެވެ. އީރާން އަށް ދަތި ކުރުމާއި، ބިރު ދެއްކުން ހުއްޓާލައިފި ނަމަ، ނުތަނަވަސްކަން ދަމަހައްޓަން ޖެހޭ ސަބަބެއް ނެތް ކަމަށް ވެސް ޕެޒެޝްކިއާން ވަނީ ވިދާޅުވެފައި އެވެ،
އީރާންގެ ރައީސް ޕެޒެޝްކިއާންގެ މި ވާހަކަތައް އަައިސްފައި ވަނީ، މެދު އިރުމަތީގެ ސަރަހައްދުގައި ނުތަނަވަސްކަން އިތުރުވެ، ބައިނަލްއަޤުވާމީ މުޖުތަމައުން ކަންބޮޑުވުން ފާޅު ކުރަމުން އަންނަ ދަނޑިވަޅެއްގައި އެވެ. އީރާން އާއި އެމެރިކާއާ ދެމެދު އޮތް ނުތަނަވަސްކަން ސަރަހައްދީ ބޮޑު ނުރައްކަލަކަށް ވެފައިވާއިރު، އެކި ޤައުމުތަކުން މި ދެ ޤައުމުގެ ދެ މެދުގައި ސުލްޙަވެރިކަން ޤާއިމު ކުރުމަށް މަސައްކަތް ކުރަމުން ގެންދެ އެވެ.
ޕެޒެޝްކިއާންގެ ވާހަކަ ތަކުގައި އެމެރިކާގެ ސިޔާސަތުތަކަށް ވަރަށް ބޮޑަށް ފާޑު ވިދާޅުވިއިރު، އަވަށްޓެރި ޤައުމުތަކާ ގުޅުން ރަނގަޅު ކުރުމަށް އީރާން އިން ތައްޔާރަށް އޮތް ކަމުގެ އިޝާރާތް ވެސް ވަނީ ދެއްވައިފަ އެވެ. ސަރަހައްދީ ޤައުމުތަކާ އެކު މަސައްކަތް ކުރުމަށް އީރާން އިން ބޭނުންވާ ކަމަށާއި، އެކަމަށް ހުރަސް އެޅިފައި އޮތީ ބޭރުގެ ބާރުތަކުގެ ސަބަބުން ކަމަށް ވެސް ޕެޒެޝްކިއާން ވަނީ ވިދާޅުވެފައި އެވެ.
މީގެ އިތުރުން، ސަރަހައްދީ ސަލާމަތާއި ސުލްޙަ ދެމެހެއްޓުނަށް އީރާން އިން ވަރަށް ބޮޑަށް ސަމާލުކަން ދެމުން އަންނަ ކަމަށާއި، އެހެން ނަމަވެސް ޤައުމުގެ ސިޔާދަތާއި ރައްކާތެރި ކަމަށް ނުރައްކާވާ ކޮންމެ ކަމަކަށް ވެސް ބަދަލު ދޭނެ ކަމަށް ޕެޒެޝްކިއާން ވަނީ ވިދާޅުވެފައި އެވެ.
މަސްދަރު: އަލް ޖަޒީރާ
