މޯދީގެ ވީޑިއޯ މައްސަލައިގައި ޒަކަރބާގް މައާފަށް އެދިއްޖެ
5 އޯގަސްޓު 2026 | ބުދަ 15:11އިންޑިއާގެ ބޮޑުވަޒީރު ނަރެންދުރަ މޯދީގެ ވީޑިއޯއެއް ފޭސްބުކުން ބްލޮކްކުރި މައްސަލައިގައި މެޓާގެ އިސްވެރިން ޕާލަމެންޓްރީ ޕެނަލަށް ހާޒިރުކޮށް، އެކަމަށް މައާފަށް އެދުމަށް ތިން ދުވަހުގެ މުހުލަތެއް ވަނީ ދީފަ. މި މައްސަލައިގައި އިހުމާލުވާ ފަރާތްތަކަށް ފިޔަވަޅު ނާޅާނަމަ މެޓާއަށް ލިބިދޭ ގާނޫނީ ރައްކާތެރިކަން އުވާލާނެ ކަމުގެ އިންޒާރު އިންޑިއާ ސަރުކާރުން ވަނީ ދީފައި
އައިޑަހޯގެ ސަން ވެލީގައި ހުންނަ ސަން ވެލީ ލޮޖްގައި 2026 ޖުލައި 9 ވަނަ ދުވަހު ބޭއްވި "އެލަން އެންޑް ކޮމްޕެނީ ސަން ވެލީ ކޮންފަރެންސް" ގައި މެޓަ ޕްލެޓްފޯމްސްގެ ސީއީއޯ މާކް ޒަކަބާގް އާއި އެމެރިކާގެ ކުރީގެ ޑެޕިއުޓީ ނޭޝަނަލް ސެކިއުރިޓީ އެޑްވައިޒަރު ދީނާ ޕަވަލް މެކޯމިކް ބައިވެރިވަނީ | ގެޓީ އިމޭޖަސް
އިންޑިއާގެ ބޮޑުވަޒީރު ނަރެންދުރަ މޯދީގެ ވީޑިއޯއެއް ފޭސްބުކުން އުނިކުރި މައްސަލައިގައާއި، ކުޑަކުދިންނަށް ކުރާ ޖިންސީ ގޯނާގެ މަންޒަރުތައް ދައުރުވުމާއި، ފޭކް ކޮންޓެންޓް ނުވަތަ 'ޑީޕްފޭކް' ފަދަ ކަންކަމާ ގުޅިގެން އިންޑިއާގެ ޕާލަމެންޓްރީ ޕެނަލްގެ ކިބައިން މެޓާގެ ފައުންޑަރ އަދި ސީ.އީ.އޯ މާކް ޒަކަރބާގް މައާފަށް އެދިއްޖެ ކަމަށް އާރް.ޓީ އިންޑިއާއަށް ސަރުކާރުގެ މަސްދަރުތަކުން މައުލޫމާތު ދީފި އެވެ.
މިދިޔަ ބުދަ ދުވަހުގެ ކުރީކޮޅު، ބޮޑުވަޒީރު ނަރެންދުރަ މޯދީގެ ވީޑިއޯއެއް ފޭސްބުކުން ވަގުތީ ގޮތުން ބްލޮކްކުރި މައްސަލައިގައި މެޓާގެ އިސްވެރިން ޕާލަމެންޓްރީ ޕެނަލަށް ހާޒިރުކުރުމަށްފަހު، އެ ޕެނަލްގެ އިސްވެރިޔާ ވަނީ މައާފަށް އެދުމަށް ޒަކަރބާގަށް ތިން ދުވަހުގެ މުހުލަތެއް ދީފަ އެވެ.
މި މައާފަށް އެދުމާ ގުޅޭގޮތުން މެޓާގެ ފަރާތުން ރަސްމީކޮށް އަދި އެއްވެސް ބަޔާނެއް ނެރެފައެއް ނުވެ އެވެ.
މޯދީ ނިސްބަތްވެވަޑައިގަންނަވާ ބާރަތިޔާ ޖަނަތާ ޕާޓީ (ބީ.ޖޭ.ޕީ) ގެ މެންބަރެއް ކަމަށްވާ ނިޝިކާންތު ދުބޭ ވިދާޅުވީ، މި މައްސަލައިގައި އިހުމާލުވި ފަރާތްތަކާ މެދު ފޭސްބުކުން ފިޔަވަޅު ނާޅާނަމަ، އެ ކުންފުންޏަށް ލިބިދޭ 'ސޭފް ހާބަރ ކްލޯޒް' ނުވަތަ ގާނޫނީ ރައްކާތެރިކަން އުވާލާނެ ކަމަށެވެ. މީގެ އިތުރުން، ވީޑިއޯ އުނިކުރި މައްސަލައިގައި ޖަވާބުދާރީވުމަށްޓަކައި މެޓާގެ ގްލޯބަލް އެފެއާޒްގެ އިސްވެރިޔާ ޖޮއެލް ކެޕްލަން ވެސް ވަނީ ބުދަ ދުވަހު އިންޑިއާގެ މިނިސްޓްރީ އޮފް އިލެކްޓްރޯނިކްސް އެންޑް އިންފޮމޭޝަން ޓެކްނޮލޮޖީގެ ސެކްރެޓަރީގެ އަރިހަށް ހާޒިރުކޮށްފަ އެވެ.
މި މައްސަލައާ ގުޅިގެން މެޓާއިން ބުނެފައިވަނީ، ބޮޑުވަޒީރުގެ ވީޑިއޯ ބްލޮކް ކުރެވުނީ ފަންނީ މައްސަލައެއް ނުވަތަ 'ޓެކްނިކަލް ގްލިޗް' އެއްގެ ސަބަބުން ކަމަށެވެ.
ފޭސްބުކުން ބްލޮކްކުރި ވީޑިއޯއަކީ، މިދިޔަ މަހު ދިއްލީގައި މުޒާހަރާކުރި ދަރިވަރުންނާ މުޚާތަބު ކުރައްވައި ބޮޑުވަޒީރު މޯދީ ދެއްކެވި ވާހަކަފުޅުތަކެއް ހިމެނޭ ވީޑިއޯއެކެވެ. މިއީ ވެރިކަންކުރާ ބީ.ޖޭ.ޕީ އަށް ނުހަނު ނާޒުކު މައްސަލައެކެވެ.
މީގެ އިތުރުން، އިންޑިއާގެ ކުޑަކުދިންނަށް ކުރާ ޖިންސީ ގޯނާގެ މަންޒަރުތަކާ ގުޅޭ (ސީ.އެސް.އޭ.އެމް) ގަވާއިދުތަކަށް ހުރިހާ ސޯޝަލް މީޑިއާ ޕްލެޓްފޯމްތަކުން އަމަލުކުރުމަށް ޕާލަމެންޓްރީ ޕެނަލުން ވަނީ އިންޒާރު ދީފަ އެވެ. އަދި އިންސްޓަގްރާމުން މި ގަވާއިދުތަކާ ޚިލާފުވެފައިވާތީ، މިދިޔަ މަހު މެޓާއަށް ވަނީ އެކަމާ ގުޅޭ ނޯޓިސްއެއް ވެސް ފޮނުވާފަ އެވެ.
