ސައުދީ އާއި ޕާކިސްތާނު ގުޅިގެން އަސްކަރީ ތަމްރީނުތަކެއް ބާއްވައިފި
ފަހަކަށް އައިސް ސައުދީން ދަނީ ސައުދީގެ ނުފޫޒު ހިނގާ އެކި ޤައުމުތަކާ އެކު މިފަދަ ތަމްރީނުތައް ބާއްވަމުން
ސައުދީ އާއި ޕާކިސްތާނު ގުޅިގެން ކުރިއަށްގެންދިޔަ އަސްކަރީ ތަމްރީނުތަކުގެ ތެރެއިން
ސައުދީ އަރަބިއާ އާއި ޕާކިސްތާނު އަސްކަރިއްޔާގެ އެއްގަމު ސިފައިން ގުޅިގެން، އަސްކަރީ ތަމްރީނުތަކެއް ކުރިއަށް ގެންގޮސްފިއެވެ.
ސައުދީގެ ހުޅަނގު ދެކުނުގެ ސަރަޙައްދުތަކުގައި މި ތަމްރީނުތައް ކުރިއަށްދިޔައިރު ސައުދީ އަސްކަރިއްޔާގެ ހުޅަނގު ދެކުނު ސަރަޙައްދުގެ ކޮމާންޑަރު، މޭޖަރ ޖެނެރަލް ދާފަރް ބިން އަލީ އަލްޝެހްރީ ވަނީ އެ ތަމްރީނުތައް ކުރިއަށްދިޔަ ގޮތް ބައްލަވާލައްވާފައެވެ.
ތަމްރީނު ކުރިއަށްދިޔަ ސަރަޙައްދުގެ އަސްކަރީ ޑައިރެކްޓަރު، ބްރިގޭޑިއަރ ޖެނެރަލް ޔޫސުފް ޚައިރަﷲ އަލް ޝަޙްރާނީ ވިދާޅުވީ މި ތަމްރީނުތަކުގެ މައިގަނޑު ބޭނުނަކީ ތަޖުރިބާ ހިއްސާ ކުރުމާއި، ހަނގުރާމައިގެ މައިދާނަށް ތައްޔާރުވެ ތިބުން ކަމަށެވެ.
އެމަނިކުފާނު ވިދާޅުވީ، ސައުދީގެ އަސްކަރިއްޔާ އާއި ޕާކިސްތާނުގެ އަސްކަރިއްޔާއާ ދެމެދު އޮތީ ވަރަށް ދުވަސްވީ، ގާތް ގުޅުމެއް ކަމަށެވެ.
ސައުދީން ޕާކިސްތާނާ އެކު އަސްކަރީ ތަމްރީނުތަކެއް ކުރިއަށް ގެންގޮސްފައިވާއިރު، ފަހަކަށް އައިސް ސައުދީން ދަނީ ސައުދީގެ ނުފޫޒު ހިނގާ އެކި ޤައުމުތަކާ އެކު މިފަދަ ތަމްރީނުތައް ކުރިއަށް ގެންދަމުންނެވެ.
