ކާބޯތަކެތީގެ އަގުތައް އަނެއްކާވެސް އުފުލިއްޖެ، ފިޔާގެ އަގު 92 އިންސައްތަ މައްޗަށް

2026 ވަނަ އަހަރުގެ މޭ މަހާ އަޅާބަލާއިރު، ޖޫން މަހު ކާބޯތަކެތީގެ އަގުތައް 1.90 އިންސައްތަ މައްޗަށް ދިޔައިރު އެންމެ ބޮޑަށް އަގު އުފުލުނު ފިޔާގެ އަގު 92 އިންސައްތަ މައްޗަށް ހިނގައްޖެ އެވެ.

މޯލްޑިވްސް ބިއުރޯ އޮފް ސްޓެޓިސްޓިކްސްއިން އާންމުކޮށްފައިވާ ތަފާސްހިސާބުތަކުން އެނގޭ ގޮތުގައި، އާއްމު ގޮތެއްގައި ބޭނުންކުރާ ގިނަ ބާވަތްތަކުގެ ކާބޯތަކެތީގެ އަގުތައް ވަނީ ހުސްވި މަހު ބޮޑުވެފަ އެވެ. އޭގެ ތެރޭގައި ފިޔާ (91.83 އިންސައްތަ)، ގިތެޔޮ މިރުސް (12.13 އިންސައްތަ)، ކުކުޅު ބިސް (6.64 އިންސައްތަ)، ކެރެޓު (14.83 އިންސައްތަ)، ފްލޭވަރޑް މިލްކް ޕެކެޓް (2.54 އިންސައްތަ)، ކޮށާފައި ހުންނަ ރޯ ކަނޑުމަސް (13.74 އިންސައްތަ)، މޭބިސްކަދުރު (7.47 އިންސައްތަ)، ޓޮމާޓޯ (9.55 އިންސައްތަ)، އަލުވި (11.42 އިންސައްތަ)، ތޮޅި މިރުސް (5.38 އިންސައްތަ)، ކަނޑުމަސް (1.07 އިންސައްތަ)، ކަރާ (8.29 އިންސައްތަ)، ދޮންކެޔޮ (1.44 އިންސައްތަ)، ހިކިމަސް (1.37 އިންސައްތަ) އަދި ލޮނުމެދު (5.06 އިންސައްތަ) ހިމެނެ އެވެ.

ބައެއް ބާވަތްތަކުގެ އަގު ބޮޑުވި ނަމަވެސް، އަނެއްބައި ތަކެތީގެ އަގު ވަނީ ދަށްވެފަ އެވެ. އެގޮތުން ކާށި (7.73- އިންސައްތަ)، ފަރުމަސް (3.27- އިންސައްތަ)، ކުރުނބާ (8.62- އިންސައްތަ)، އޮރެންޖު (8.30- އިންސައްތަ)، އާފަލު (3.86- އިންސައްތަ)، ލުނބޯ (1.85- އިންސައްތަ) އަދި ރިހާކުރުގެ އަގު (0.68- އިންސައްތަ) ވަނީ ދަށްވެފަ އެވެ. މި ބާވަތްތަކުގެ އަގު ހެޔޮވުމަކީ ކާބޯތަކެތީގެ އަގުތައް މައްޗަށް ދިޔަ މިންވަރު ކޮންމެވެސް ވަރަކަށް ހިފެހެއްޓުމަށް އެހީތެރިވި ކަމެއް ކަމަށް ބުނެފައިވެ އެވެ.

ފާއިތުވި 12 މަސްދުވަހަށް ބަލާއިރު ކެއިންބުއިމަށް ބޭނުންކުރާ ތަކެތީގެ އަގުތައް 7.28 އިންސައްތަ މައްޗަށް ގޮސްފައިވެ އެވެ.

2026 ވަނަ އަހަރުގެ މެއި މަހާ އަޅާބަލާއިރު ޖޫން މަހު ރާއްޖޭގެ ކޮންސިއުމަރ ޕްރައިސް އިންޑެކްސް (ސީޕީއައި) ނުވަތަ މުދަލާއި ޚިދުމަތުގެ އަގުތައް 0.26 އިންސައްތަ މައްޗަށް ގޮސްފައިވާކަން ފާހަގަ ކުރެވެ އެވެ. މިއީ މެއި މަހު އަގުތައް އުފުލުނު 0.20 އިންސައްތައާ އަޅާބަލާއިރު އިތުރުވުމެކެވެ. އަދި 2025 ވަނަ އަހަރުގެ ޖޫން މަހާ އަޅާބަލާއިރު، މިއަހަރުގެ ޖޫން މަހު އަހަރީ އިންފްލޭޝަން ރޭޓް ހުރީ 2.56 އިންސައްތައިގަ އެވެ. މަހުން މަހަށް ބަލާއިރު އަގުތަކަށް އައި ބަދަލުގައި އެންމެ ބޮޑު ހިއްސާއެއް ވަނީ މަހުގެ ބާވަތްތައް ނުހިމަނައި ކާބޯތަކެތީގެ އަގުތަކަށް އައި ބަދަލުންނެވެ.

މޯލްޑިވްސް ބިއުރޯ އޮފް ސްޓެޓިސްޓިކްސްއިން އާންމުކޮށްފައިވާ ތަފާސްހިސާބުތަކުން އެނގޭ ގޮތުގައި، ޖޫން މަހު އަގުތައް އެންމެ ބޮޑަށް އުފުލިފައިވާ ބާވަތްތަކުގެ ތެރޭގައި ހިމެނޭ، ތަރުކާރީގެ އަގު ވަނީ 18.87 އިންސައްތަ މައްޗަށް ގޮސްފަ އެވެ. މީގެ އިތުރުން ކިރާއި ބިހުގެ ބާވަތްތަކުން 1.72 އިންސައްތަ، ގޮދަނާއި ހަނޑުލުގެ ބާވަތްތަކުން 0.64 އިންސައްތަ، އަދި ގޭބިސީތަކުގެ މަރާމާތާއި ސަލާމަތީ ކަންކަމާ ގުޅޭ ޚިދުމަތްތަކުން 1.98 އިންސައްތަ އަގު އުފުލިފައިވެ އެވެ. އަދި ފައިވާނާއި ބޫޓުގެ އަގު 0.91 އިންސައްތަ، ކޮފީގެ ބާވަތްތަކުން 1.27 އިންސައްތަ، އަދި ގޭތެރޭގައި ބޭނުންކުރާ ކުދި އިލެކްޓްރޯނިކް ސާމާނުގެ އަގު 2.12 އިންސައްތަ ވަނީ މައްޗަށް ގޮސްފަ އެވެ. ވަކިވަކި ބާވަތްތަކަށް ބަލާއިރު ފިޔާގެ އަގަށް އައި ބޮޑު ބަދަލަކީ އިންފްލޭޝަން މައްޗަށް ދިއުމަށް ދިމާވި މައިގަނޑު އެއް ސަބަބެވެ.

މާލެއާއި އަތޮޅުތަކުގެ އަގުތަކަށް ބަލާއިރު، ޖޫން މަހު މާލޭގައި އަގުތައް އުފުލިފައިވަނީ 0.19 އިންސައްތައަށެވެ. މާލޭގައި އަގު އެންމެ ބޮޑަށް އުފުލުނީ ކާބޯތަކެތީގެ ބާވަތްތަކުން ކަމަށްވާއިރު، މީގެ ތެރޭގައި ފިޔާ، ބިސް، ފަތްކޭލާއި ކިރު ހިމެނެ އެވެ. އަތޮޅުތަކުގައި އަގުތައް އުފުލިފައިވަނީ 0.35 އިންސައްތައަށެވެ. އަތޮޅުތަކުގައިވެސް އަގު އުފުލުމުގެ މައިގަނޑު ސަބަބަކީ ކާބޯތަކެތީގެ އަގުތައް މައްޗަށް ދިއުމެވެ. ނަމަވެސް މާލެއާއި އަތޮޅުތަކުގައިވެސް ކަރަންޓާއި ފެނުގެ ޚިދުމަތުގެ އަގު ވަނީ މެއި މަހާ އަޅާބަލާއިރު ދަށަށް ގޮސްފަ އެވެ.

އަހަރީ އިންފްލޭޝަނަށް ބަލާއިރު، 2025 ޖޫން އިން 2026 ޖޫން އަށް މުޅި ރާއްޖޭގެ އަގުތައް ވަނީ 2.56 އިންސައްތަ މައްޗަށް ގޮސްފަ އެވެ. މީގެ ތެރެއިން މާލޭގެ އަހަރީ އިންފްލޭޝަން 1.93 އިންސައްތައިގައި ހުރިއިރު، އަތޮޅުތަކުގެ އިންފްލޭޝަން ހުރީ 3.49 އިންސައްތައިގަ އެވެ. އަހަރު ދުވަހުގެ ތެރޭގައި އެންމެ ބޮޑަށް އަގު އުފުލިފައިވަނީ ދަތުރުފަތުރުގެ ޚިދުމަތްތަކުންނާއި ކާބޯތަކެތީގެ ބާވަތްތަކުންނެވެ. އެގޮތުން ދަތުރުފަތުރުގެ އަގުތައް 8.05 އިންސައްތަ އަދި ކާބޯތަކެތީގެ އަގުތައް 7.28 އިންސައްތަ ވަނީ މައްޗަށް ގޮސްފަ އެވެ.