ޖުމްހޫރީ ޕާޓީގެ ލީޑަރު ގާސިމް އިބްރާހިމްގެ ބޭސްފަރުވާއަށް ސަރުކާރުން ދިން މުއްދަތު ހޯމަ ދުވަހު ހަމަވާއިރު، ގާސިމް ފްލައިޓަށް އެރުވުމަށް އެއާލައިނުން އަނެއްކާ ވެސް ދެކޮޅު ހަދާފައިވާ ކަމަށް ގާނޫނީ ވަކީލުން ވިދާޅުވެއްޖެ އެވެ.

ގާސިމްގެ ގާނޫނީ ވަކީލުން ނެރުއްވި ބަޔާނެއްގައި ބުނެފައިވަނީ  ގާސިމްގެ އާއިލާއަށް އަންގާފައިވަނީ، ހޯމަ ދުވަހުގެ ކުރިން އެމަނިކުފާނު މާލެ ގެނެސް އެސަރވިސްއާ ހަވާލުކުރުމަށް ކަމަށެވެ. ނަމަވެސް، އެމަނިކުފާނަކީ ފްލައި ކުރުމަށް އަންފިޓް މީހެއް ކަމަށް ކުރީންވެސް ކަނޑައަޅާފައިވާތީ އާއި އެމަނިކުފާނުގެ މެޑިކަލް ސްޓޭޓަސް އަށް ބަދަލެއް އައިސްފައި ނުވާތީ އެއަރލައިނުން އެމަނިކުފާނަށް ހޯމަ ދުވަހު ވެސް ދަތުރު ކުރުމަށް ހުއްދަ ދީފައިނުވާ ކަމަށް ބަޔާނުގައި ބުނެފައިވެއެވެ.

އެހެންކަމުން ސިންގަޕޫރުން މާލެއަށް އޮންރަބަލް ޤާސިމް އިބްރާހީމަށް ދަތުރުކުރުމުގެ ހުއްދަ އެއަރލައިނުން ދީފައިނުވާކަން މޯލްޑިވްސް ކަރެކްޝަނަލް ސަރވިސްއަށް ހޯމަ ދުވަހު ވެސް އަންގާފައިވާނެ ކަމަށް ވަކީލުން ވިދާޅުވެފައިވެއެވެ.

ވަކީލުން ވިދާޅުވީ ކަރެކްޝަނަށް ހުށަހަޅާފައިވާ ގާސިމްގެ ޑޮކްޓަރުންގެ މެޑިކަލް ރިޕޯރޓް ގައިވާ ފަދައިން އެމަނިކުފާނުގެ ހިތުގެ އީ.ޕީ.ސްޓަޑީ ސިންގަޕޫރުގެ މައުންޓް އެލިޒަބަތް ނޮވީނާ ހޮސްޕިޓަލުގައި ހެދުމަށް އޮކްޓޯބަރު 19 ވަނަ ދުވަހަށް ޝެޑިއުލް ކޮށްފައިވާކަމާއި، އީ.ޕީ.ސްޓަޑީ އަށްފަހުވެސް އިތުރު ފަރުވާކުރުމަށްޓަކައި ސިންގަޕޫރުގައި ހުންނަވަންޖެހޭނެ ކަމަށް ޑޮކްޓަރު ލަފާ ދެއްވާފައިވާކަންވެސް ވަނީ ކަރެކްޝަނަށް އަންގާފައެވެ.

ގާސިމަށް ސިންގަޕޫރުގައި ފަރުވާދެއްވާ ޑޮކްޓަރުންގެ މެޑިކަލް ރިޕޯރޓް ގައިވާ މުއްދަތަށް ފަރުވާ ލިބިގަތުމަށްޓަކައި ސިންގަޕޫރުގައި ހުންނެވުމަށް ހުއްދަ ދެއްވުމަށާއި އެކަމަށް ބޭނުންވާ އިންތިޒާމް ހަމަޖައްސަވައި ދެއްވުން އެދި މޯލްޑިވްސް ކަރެކްޝަނަލް ސަރވިސްގައި އެމަނިކުފާނުގެ ފަރާތްޕުޅުން ތަކުރާރުކޮށް އެދިވަޑައިގެންނެވުމުން، ހޯމަ ދުވަހުގެ ހަވީރު 4:55 ގައި ބޭސްފަރުވާގެ މުއްދަތު އިތުރުކޮށްދެވެން ނެތްކަމަށް އެސަރވިސްއިން ގާސިމްގެ ޢާއިލާއަށް އަންގާފައިވާ ކަމަށް ވަކީލުން ވިދާޅުވި އެވެ.

ފަންނީ ޑޮކްޓަރުންގެ ލަފަޔާއި، އަދި ކްރިމިނަލް ކޯޓުގެ ހުކުމުގައި މޯލްޑިވްސް ކަރެކްޝަނަލް ސަރވިސްގެ މައްޗަށް ކޮށްފައިވާ އަމުރާއި، އެސަރވިސްގެ ފަރާތުން ތަބާވާންޖެހޭ ޤާނޫނީ އޮނިގަނޑުގައި އެފަރާތުގެ މައްޗަށް ޢަމަލުކުރަން ލާޒިމުކުރާ އުޞޫލުތަކާ އެއްގޮތަށް ގާސިމަށް ރާއްޖެއިން ބޭރުގައި ބޭސް ފަރުވާ ކުރުމަގެ ފުރަޞަތު ދެއްވުމަށް މޯލްޑިވްސް ކަރެކްޝަނަލް ސަރވިސް އަށާއި ދިވެހި ސަރުކާރަށް ވަކީލުން ވަނީ ގޮވާލައްވާފަ އެވެ.

ވަކީލުން ވިދާޅުވީ ގާސިމް 3 އަހަރާއި 2 މަހާއި 12 ދުވަހަށް ޖަލަށްލުމަށް ޙުކުމްކުރިއިރުވެސް، އެމަނިކުފާނުގެ ފުރާނައަށް ނުރައްކާތެރިވެފައިވާ ކަމަށާއި އެމަނިކުފާނަށް ބޭނުންވާ ފަރުވާ ރާއްޖެއިން ލިބެން ނެތްކަމަށް މާލޭގެ އެންމެ ބޮޑު ތިން ހޮސްޕިޓަލް ކަމަށްވާ އައި.ޖީ.އެމް.އެޗް އާއި އޭ.ޑީ.ކޭ. ހޮސްޕިޓަލް އަދި މެޑިކާ ހޮސްޕިޓަލްގެ ސްޕްޝަލިސްޓް ޑޮކްޓަރުން ލަފާދެއްވާފައިވާތީ، ސެޕްޓެމްބަރު 6 ވަނަ ދުވަހު ކަރެކްޝަނުން އެމަނިކުފާނުގެ އާލާސްކަންފުޅަށް ބޭސްފަރުވާއަށް ސިންގަޕޫރަށް ވަޑައިގަތުމުގެ ހުއްދަ ދެއްވުމަށް ފަހު، ޑޮކްޓަރުންގެ ލަފާއާއި އިރުޝާދާ ޚިލާފަށް، އެމަނިކުފާނުގެ ފުރާނައަށް ނުރައްކަލެއް ކުރިމަތިވެދާނެ ގޮތަށް އެ ސަރވިސްގެ ފަރާތުން ތަކުރާރުކޮށް ޢަމަލުކުރަމުން ގެންދާ މައްސަލައަކީ ނުހަނު ކަންބޮޑުވާ މައްސަލައެއް ކަމަށެވެ.