ބ. ފުޅަދޫ ހެލްތު ސެންޓަރުގައި ސާމްޕަލް ފުޅި ނެތްކަން ހާމަވެއްޖެ
1 އޯގަސްޓު 2026 | ހޮނިހިރު 07:26ބ. ފުޅަދޫ ސިއްހީ މަރުކަޒުން ޓެސްޓުތައް ހެދުމަށް ބޭނުންވާ ސާމްޕަލް އަޅާނެ ފުޅި ހުސްވެފައިވާތީ، އެ ރަށުގެ އާންމު ރައްޔިތުން ދަނީ ކަންބޮޑުވުން ފާޅުކުރަމުން. މި މައްސަލަ ފެންމަތިވެފައިވަނީ ސޯޝަލް މީޑިއާގައި އާންމުވި ވީޑިއޯއަކާ ގުޅިގެން
ބ. ފުޅަދޫ ހެލްތު ސެންޓަރު | އެންޑްރެޖް ހޮލީ
ބ. ފުޅަދޫ ހެލްތު ސެންޓަރުގައި ސާމްޕަލް ޓްސެޓް ހަދާފައި އަޅާނެ ފުޅި ނެތްކަން ހާމަވެއްޖެ އެވެ.
އާންމު ރައްޔިތަކު ކަންބޮޑުވުން ފާޅުކޮށް ސޯޝަލް މީޑިއާއަށް ދޫކޮށްލާފައިވާ ވީޑިއޯއެއްގައި ބުނެފައި ވަނީ ބ. ފުޅަދޫ ހެލްތު ސެންޓަރަށް ދާ މީހާ ޓެސްޓު ހަދަން ނަގާ ސާމްޕަލް އަޅާނެ ފުޅިއެއް ނެތް ކަމަށެވެ.
އޭނާ ބުނި ގޮތުގައި ސާމްޕަލް ފުޅި ގަންނަން ދާން ޖެހެނީ ބ. ގޮއިދޫއަށެވެ. އަދި ފުޅަދޫއިން ސާމްޕަލް ނެގުމަށް ފަހު ހަދަން ބޭނުންވާ ޓެސްޓްތައް ނުހެދޭ ކަމަށާއި، އެ ޓެސްޓްތައް ހަދަން ވެސް ދާން ޖެހެނީ ގޮއިދޫއަށް ކަމަަށް އޭނާ ބުންޏެވެ.
ލޯންޗެއް ނަގައިގެން ގޮއިދޫއަށް ދާން 400ރ ހޭދަވާ ކަމަށް ބުނެ އޭނާ ވަނީ އެންމެ އަސާސީ ކަންކަން ފުޅަދޫ ހެލްތު ސެންޓަރުން ނުކުރެވޭތީ އެކަމާއި ކަންބޮޑުވުން ފާޅުކޮށްފައި އެވެ.
މީގެއިތުރުން މިނިވަންކަމުގެ ވާހަކަ ދައްކާއިރު، ބޭސްފަރުވާއަށް ސަލާން ޖަހަން ޖެހުމުން އެއަށް ވުރެ ބޮޑު އަޅުވެތިކަމެއް ނޯންނާނެ ކަމަށް އޭނާ ބުނެފައިވެ އެވެ.
ބ. ފުޅަދޫގައި 340 އެއްހާ މީހުން ދިރިއުޅެމުން ދާއިރު އެ ރަށަކީ ގެސްޓްހައުސް ވިޔަފާރި ފުޅާ ދާއިރާއެއްގައި ކުރަމުން އަންނަ ރަށެކެވެ. ނަމަވެސް ފަތުރުވެރިން ޒިޔާރަތް ކުރަމުންދާ މިފަދަ ރަށެއްގައި ރަނގަޅު ސިއްހީ ހިދުމަތެއް ނުދެވޭތީ އެކަމުގެ ކަންބޮޑުވުން އެ ރަށު ރައްޔިތުން އަންނަނީ ފާޅުކުރަމުންނެވެ.
ރައީސް މުއިއްޒު ވެރިކަމަށް ވަޑައިގެންނެވި ފަހުން ސިއްހީ ނިޒާމް ހަލާކުވަމުންދާ ކަމަށް ގިނަ އަދަދެއްގެ ރައްޔިތުން އަންނަނީ ބުނަމުންނެވެ. އެގޮތުން އެންމެ ބޮޑު ކަންބޮޑުވުމަކީ ބޭސް ލިބުމުގައި ދިމާވާ ދަތިތަކެވެ. މި މައްސަލަ ހައްލު ކުރަން ރައީސް މުއިއްޒު ވަނީ ބޭސް އެތެރެކުރަން ވަކި ކުންފުންޏެއް ވެސް އުފައްދަވާފަ އެވެ. ނަމަވެސް އަދިވެސް މި މައްސަލައަށް ހައްލެއް ލިބޭ ގޮތެއް ނުވެ އެވެ.
