ބިޔަ ރާޅުތަކުގެ ތެރެއިން ކުޑަ ކުއްޖަކު ސަލާމަތް ކުރި 16 އަހަރުގެ ޒުވާނަކަށް ވައިޓް ހައުސްގައި އިނާމު ދެއްވަން ޓްރަމްޕް ނިންމަވައިފި

އެމެރިކާގެ ކެލިފޯނިއާގެ ސެއިންކްރޫޒްގައި ބޮޑެތި ބިޔަ ރާޅުތަކުގެ ތެެރެއިން ކުޑަ ކުއްޖަކު ސަލާމަތް ކުރި، އުމުރުން 16 އަހަރުގެ ޒުވާނަކަށް ރިޔާސީ ގަނޑުވަރު ވައިޓް ހައުސްގައި އިނާމު ދެއްވަން އެމެރިކާގެ ރައީސް ޑޮނަލްޑް ޓްރަމްޕް ނިންމަވައިފި އެވެ. 

ޓްރަމްޕް ވަނީ އޭނާގެ ރަސްމީ އެކްސް އެކައުންޓުގައި އެ ވީޑިއޯ ރީޕޯސްޓު ކުރައްވައިފަ އެވެ. އެ ވީޑިއޯ އެންމެ ފުރަތަމަ ޕޯސްޓު ކުރައްވާފައި ވަނީ ޓްރަމްޕް ދަރިކަލުން އެރިކް ޓްރަމްޕް އެވެ. އެ ޕޯސްޓުގައި އެރިކް ލިޔުއްވާފައި ވަނީ، އެ ޒުވާނާ އަށް އެންމެ މަތީ ފަންތީގެ އިނާމެއް ދިނުމަށެވެ. 

އެ ޕޯސްޓު ރީޕޯސްޓި ކުރައްވައި ޓްރަމްޕް ވިދާޅުވީ، އެ ހިތްވަރުގަދަ ޒުވާނާ އާއި، އޭނާގެ އާއިލާ އަދި އެ ހާދިސާގައި ސަލާމަތްވި ކުއްޖާ ވައިޓް ހައުސް އަށް ގެންނާނެ ކަމަށެވެ. އަދި ވައިޓް ހައުސްގައި އެ ޒުވާނާ އަށް އިނާމު ދިނުން އޮންނާނެ ކަމަށް ވެސް ޓްރަމްޕް ވިދާޅުވި އެވެ. އެއާ އެކު ޓްރަމްޕް ވިދާޅުވެފައި ވަނީ، އެ ޒުވާނާ އަކީ ވަރަށް ހިތްވަރުގަދަ ޒުވާނެއް ކަމަށާއި، އޭނާ އަށް އިނާމު ހައްގުވާ ކަމަށެވެ.

ހޮނިހިރު ދުވަހު ހިނގި މި ހާދިސާގައި އެ ޒުވާނާ ވަނީ އުމުރުން 10 އަހަރުގެ ކުއްޖަކު ސީބްރައިޓް ބީޗުގެ ބޮޑެތި ރާޅުތަކުގެ ތެރެއިން ސަލާމަތް ކޮށްފައި އެވެ. ހޫނު މޫސުމުގެ މި ދުވަސްވަރު، އެ ސަރަހައްދުގައި ބޮޑެތި ރާޅުތަކެއް އުފެދޭ ކަމަށް ރިޕޯޓުތައް ބުނެ އެވެ. 

ރާޅުތަކުގެ ތެރެއިން އެ ކުޑަ ކުއްޖާ ސަލާމަތް ކުރުމަށް އެ ޒުވާނާ ވަރަށް ގިނަ މަސައްކަތްތަކެއް ކުރާ މަންޒަރު ފެނެ އެވެ. އަދި އޭނާގެ ފަހަތުން އެހެން ބަޔަކު ވެސް އެކަމުގައި ބައިވެރިވެ، އެ ޒުވާނާ އާއެކު އެ ކުއްޖާާ ސަލާމަތް ކުރުމަށް މަސައްކަތް ކުރާ މަންޒަރު ފެނެ އެވެ. އެ ޒުވާނާ ވަނީ އެ ހާދިސާގެ ފަހުން، ގެނބުނު ކުއްޖާގެ އާއިލާއާ ވެސް ބައްދަލުކޮށްފައި އެވެ. 

އުމުރުން 16 އަހަރުގެ ޒުވާނާ އަށް ޓްރަމްޕް އަރުވަނީ ކޮން އިނާމެއް ކަމެއް މިހާތަނަށް ހާމަ ކޮށްފައެއް ނުވެ އެވެ. އެމެރިކާގެ އެންމެ މަތީ ފަންތީގެ އިނާމަކީ ޕްރެޒިޑެންޝަލް މެޑަލް އޮފް ފްރީޑަމް ކަމަށްވާއިރު، އެ އިނާމު އާންމުކޮށް ދެނީ ޤައުމީ ސަލާމަތާއި މަސްލަޙަތަށް ނުވަތަ ދުނިޔޭގެ ސުލްޙަ އަށް ނުވަތަ ސަގާފީ މުހިންމު މަސައްކަތްތައް ކޮށްފައިވާ ޚިދުމަތްތަކަށެވެ.