ޔޫކްރެއިން އަށް ޕެޓްރިއޮޓް މިސައިލް އުފެއްދުމުގެ ލައިސަންސް ދިނުމަށް ޓްރަމްޕް އެއްބަސްވެއްޖެ

ޔޫކްރެއިން އަށް ޕެޓްރިއޮޓް މިސައިލް އުފެއްދުމުގެ ލައިސަންސް ދިނުމަށް އެމެރިކާގެ ރައީސް ޑޮނަލްޑް ޓްރަމްޕް އެއްބަސްވެ ވަޑައިގެންފައިވާ ކަމަށް، ޔޫކްރެއިންގެ ރައީސް ވޮލޮޑިމީރް ޒެލެންސްކީ ވދާޅުވެއްޖެ އެވެ. 

ޒެލެންސްކީ އާއި ޓްރަމްޕް ބައްދަލު ކުރައްވާފައިވާއިރު، ޒެލެންސްކީ ވިދާޅުވީ ޔޫކްރެއިން އިން އުންމީދު ކުރަނީ އެމެރިކާގެ ދިފާއީ ކުންފުނިތަކާ އެކު މިސައިލް އުފެއްދުމުގެ ހަމަޖެހުމެއް ޤާއިމު ކުރުން ކަމަށެވެ. 

ރޮއިޓާސް ނިއުސް އެޖެންސީ އިން ރިޕޯޓު ކޮށްފައިވާ ގޮތުގައި، މިއީ ޔޫކްރެއިންގެ ދިފާއީ ޤާބިލުކަން ވަރުގަދަ ކުރުމަށް ކުރެވޭ މުހިންމު ފިޔަވަޅަކަށް ވާނެ އެވެ. ޕެޓްރިއޮޓް މިސައިލްގެ ނިޒާމަކީ ދުނިޔޭގެ އެންމެ ހަރުދަނާ ވައިގެ ދިފާއީ ނިޒާމުތަކުގެ ތެރޭގައި ހިމެނޭ ނިޒާމެކެވެ. މި ނިޒާމަކީ ދުރު މިނުގެ ބެލިސްޓިކް މިސައިލްތަކާއި، ހަނގުރާާމަވެރި ވައިގެ އުޅަނދުތައް ވައްޓާލުމަށް ބޭނުން ކުރާ ނިޒާމެކެވެ. 

ރަޝިޔާއާ ދެކޮޅަށް ކުރަމުން އަންނަ ހަނގުރާމައިގައި ޔޫކްރެއިން އަށް ވައިގެ ދިފާއީ ނިޒާމުތައް ލިބުމަކީ ވަރަަށް މުހިންމު ކަމަށް ވަނީ ވެފައި އެވެ. ރަޝިޔާ އިން ޔޫކްރެއިންގެ އާންމު ސަރަހަައްދުތަކަށް ދެމުންދާ މިސައިލް ހަމަލާތަކަށް ރައްދު ދިނުމަށް މި ނިޒާމުތައް ބޭނުން ކުރެވޭނެ އެވެ. 

ޔޫކްރެއިން އަށް މިި މިސައިލް އުފެއްދުމުގެ ޤާބިލުކަން ލިބުމަކީ، އެ ޤައުމުގެ ދިފާއީ ސިނާއަތަށް ލިބޭ ވަރަށް ބޮޑު ކުރިއެރުމަކަށް ވާނެ އެވެ. މީގެ އިތުރުން އެމެރިކާ އިން ލިބޭ އަސްކަރީ އެހީތެރިކަމަށް ބަރޯސާވާން ޖެހުން މެދުވެ، ޔޫކްރެއިން އަށް އިތުރު މިނިވަން ކަމެއް ލިބިގެން ދާނެ ކަމަށް ތަޖުރިބާކާރުން ބުނެ އެވެ. 

އެމެރިކާގެ ދިފާއީ ކުންފުނިތަކާ އެކު މަސައްކަތް ކުރުމަށް ޔޫކްރެއިން އިން ކުރިއަށް ގެންދާ މަޝްވަރާތަކުގެ ތަފްސީލު މިހާތަނަށް ހާމަކޮށްފައި ނުވެ އެވެ. ނަމަވެސް، މި ހަމަޖެހުން ހާސިލުވުމަކީ ޔޫކްރެރިންގެ ދިފާއީ ދާއިރާ އަށް ލިބޭ ތާރީޚީ ކާމިޔާބެއް ކަމަށް ދިފާއީ ދާއިރާގެ ތަޖުރިބާކާރުން އަންނަނީ ބުނަމުންނެވެ. 

ޓްރަމްޕްގެ މި ނިންމެވުމާ ގުޅިގެން ޒެލެންސްކީ ވަނީ، ޓްރަމްޕް އަށް ވަރަށް ބޮޑަށް ޝުކުރު އަދާ ކުރައްވައިފަ އެވެ. އަދި ދެ ޤައުމުގެ ދެ މެދުގައި އޮންނަ ދިފާއީ ހަމަޖެހުންތައް އިތުރަށް ވަރުގަދަ ކުރުމަށް މަސައްކަތް ކުރައްވާނެ ކަމަށް ވެސް ޒެލެންސްކީ ވިދާޅުވެފައިވެ އެވެ.