ފީފާ ވޯލްޑް ކަޕްގެ 18 މުބާރާތް ކަވަރުކުރަމުންދާ އާޖެންޓީނާގެ އުމުރުން 91 އަހަރުގެ ނޫސްވެރިޔާ

ނޫސްވެރިކަމުގެ ދާއިރާގައި ހަތްދިހަ އަހަރާ ގާތްކުރާ މުއްދަތެއް ހޭދަކޮށްފައިވާ އުމުރުން 91 އަހަރުގެ އާޖެންޓިނާގެ ސްޕޯޓްސް ޖާނަލިސްޓް އަދި އެނަލިސްޓް އެންރީކޭ މަކާޔާ މާކޭޒް ވަނީ، މީގެ ކުރިން އެއްވެސް މީހަކު ހާސިލްކޮށްފައި ނުވާ ފަދަ ކާމިޔާބީއެއް ހޯދާފަ އެވެ. އެއީ މެދުކެނޑުމެއް ނެތި ޖެހިޖެހިގެން 18 ވޯލްޑް ކަޕް ކަވަރުކުރުމުގެ ޝަރަފެވެ.

އޭނާ އެންމެ ފުރަތަމަ ވޯލްޑް ކަޕެއް ކަވަރުކުރީ 1958 ވަނަ އަހަރު އެވެ. އެއީ އުމުރުން އެންމެ 17 އަހަރުގެ އުންމީދީ ކުޅުންތެރިޔާ ޕެލޭ ފެނިގެންދިޔަ މުބާރާތެވެ.

އެ މުބާރާތް ކަވަރުކުރުމަށް ސްވިޑަންއަށް ފޮނުވިއިރު، މަަކާޔާގެ އުމުރަކީ އެންމެ 24 އަހަރެވެ.

އޭނާއަށް އެންމެ ފުރަތަމަ ހަވާލުކުރެވުނު މަސައްކަތްތަކުގެ ތެރޭގައި ޕެލޭގެ ބްރެޒިލާއި އޮސްޓްރިއާ ބައްދަލުކުރި މެޗު ބެލުން ހިމެނެ އެވެ. ނަމަވެސް، އެ މުބާރާތުން އޭނާގެ ހަނދާނުގައި އެންމެ ބޮޑަށް ބިންވަޅު ނެގިފައިވަނީ 'ޑިޒާސްޓަރ އޮފް ސްވިޑަން' ނުވަތަ ސްވިޑަންގެ ކާރިސާގެ ގޮތުގައި މަޝްހޫރުވި މެޗެވެ. އެއީ ޗެކޮސްލޮވާކިއާ އަތުން 6-1 ގެ ބޮޑު ތަފާތަކުން އާޖެންޓީނާ ބަލިވި މެޗެވެ.

"އެ މެޗަކީ އާޖެންޓީނާގެ ގައުމީ ފުޓްބޯޅަ ޓީމަށް ލިބުނު ވަރަށް ބޮޑު ނާކާމިޔާބީއެއްގެ ގޮތުގައި އަދިވެސް އަހަރެންގެ ހަނދާނުގައި ހަރުލާފައި ހުރި މެޗެއް،" އޭނާ ބުންޏެވެ.

"އެ ދުވަސްވަރު ޗެކޮސްލޮވާކިއާއާ ބެހޭ އެއްވެސް މައުލޫމާތެއް އަހަރެމެންނަކަށް ނޭނގޭ. އެއްވެސް ތަފާސްހިސާބެއް ނެތް. އެމީހުން އަހަރެމެން ސިއްސުވާލީ."

ވޭތުވެދިޔަ ހަތްދިހަ އަހަރާ ގާތްކުރާ މުއްދަތުގެ ތެރޭގައި، ފުޓްބޯޅައަށް އައިސްފައިވާ ބޮޑެތި ބަދަލުތައް މަަކާޔާ ވަނީ ދެކެފަ އެވެ.

އޭނާ ވަނީ ޕެލޭ އާއި، ޑިއޭގޯ މަރަޑޯނާ އާއި، ލިއޮނަލް މެސީގެ އިތުރުން އެތައް ގިނަ ކުޅަދާނަ ކުޅުންތެރިންނެއްގެ ކުޅުން ރިޕޯޓްކޮށްފަ އެވެ.

ޓީވީގެ ދައުރު ޑިޖިޓަލްވެ، ތަފާސްހިސާބުތައް ވަގުތުން ވަގުތަށް ލިބޭނެ އިންތިޒާމު ހަމަޖެހި، ވޯލްޑް ކަޕަކީ މުޅި ދުނިޔެ ބަލާ ބޮޑު އީދަކަށް ވަނީ ބަދަލުވެފަ އެވެ.

މި ހުރިހާ ބަދަލެއް އައި ނަމަވެސް، މަަކާޔާގެ އެއް އުސޫލަކަށް ބަދަލެއް ނާދެ އެވެ. އެއީ ކަމެއްގެ ހަގީގަތް ނޭނގި، އަވަސް އަރުވާލައިގެން ގޮތް ނިންމުމަށް އޭނާ ދެކޮޅު ހެދުމެވެ.

އެ ފަލްސަފާގެ ސަބަބުން، 2018 ވަނަ އަހަރު އެއްވެސް މީހަކު ހީނުކޮށް ހުއްޓާ ލިއޮނަލް ސްކަލޯނީ އާޖެންޓީނާގެ ކޯޗަކަށް އައްޔަންކުރި ކުރުމާމެދު އޭނާ ދެކުނު ގޮތް ތަފާތުވި އެވެ.

"އަހަރެން މާ ބޮޑު އުންމީދެއް ނުކުރަން،" ޑީ-ސްޕޯޓްސް ރޭޑިއޯގެ ކޮމެންޓޭޓަރެއްގެ ގޮތުގައި މަސައްކަތްކުރާ މަަކާޔާ ބުންޏެވެ. "އަހަންނަށް އޭނާ އެއް ނޭނގޭ."

ސްކަލޯނީގެ އިރުޝާދުގެ ދަށުން އާޖެންޓީނާ ވަނީ ކޮޕާ އެމެރިކާ އާއި، ފައިނަލިސިމާގެ އިތުރުން ވޯލްޑް ކަޕް ކާމިޔާބުކޮށްފަ އެވެ. މިއާއެކު، ފުޓްބޯޅައިގައި އެޅި އެންމެ ބޮޑު އެއް ރިސްކު ނުވަތަ ނުރައްކާތެރި ނިންމުން، އެންމެ ކާމިޔާބު އެއް ވާހަކައަށް ވަނީ ބަދަލުވެފަ އެވެ.

މަަކާޔާ ބުނާ ގޮތުގައި މި ކާމިޔާބީތައް ފެނުމުން، އޭނާގެ މުޅި ކެރިއަރުގައި ގަބޫލުކުރަމުން އައި ކަމެއް އިތުރަށް ކަށަވަރުވި އެވެ.

"މީހަކާ މެދު ގޮތް ނިންމަންވާނީ އެ މީހަކާ ބެހޭގޮތުން ފުން އަދި ފުރިހަމަ މައުލޫމާތެއް އެނގިގެން،" އޭނާ ބުންޏެވެ.

މެސީ ނުވަތަ މަރަޑޯނާ؟

އާޖެންޓީނާ މިހާރު ވަނީ އަނެއްކާވެސް ވޯލްޑް ކަޕްގެ ސެމީ ފައިނަލަށް ދަތުރުކޮށްފަ އެވެ. އަދި ބުދަ ދުވަހުގެ ރޭ (ރާއްޖެ ގަޑިން ދަންވަރު 12:00 ގައި) އެމީހުންގެ ޒަމާންވީ ވާދަވެރި އިންގްލެންޑާ ދެކޮޅަށް ކުޅޭ މެޗަށް ދަނީ ތައްޔާރުވަމުންނެވެ. 

މަަކާޔާ ގަބޫލުކުރާ ގޮތުގައި 2022 ވަނަ އަހަރު ހޯދި ކާމިޔާބީ ތަކުރާރުކުރުމުގެ ފުރުސަތު އާޖެންޓީނާއަށް އެބައޮތެވެ.

"ޝައްކެއްވެސް ނެތް، އެމީހުންނަށް އެކަން ކުރެވޭނެ،" އޭނާ ބުންޏެވެ. "ކުރިމަގުގައި ވެދާނެ ކަމަކާ ބެހޭގޮތުން ވާހަކަދައްކާ ނަމަ، އަހަރެން ގަބޫލުކުރަނީ އާޖެންޓީނާއަށް މުބާރާތް ކާމިޔާބުކުރުމުގެ ގާބިލުކަން އެބަހުރި ކަމަށް."

އަދި އޭނާ އެންމެ ގަޔާވާ އާޖެންޓީނާގެ ކުޅުންތެރިއަކީ ކާކުތޯ އެހުމުން، ލިބުނު ޖަވާބަކީ މާ ބޮޑު ހައިރާންކަމެއް ލިބުނު ޖަވާބެއް ނޫނެވެ. "ސާފުކޮށް އެނގެން އޮތް ގޮތުގައި އެއީ މެސީ،" އޭނާ ބުންޏެވެ.

ނަމަވެސް، ދެން ކުރިމަތިވި ސުވާލަކީ ހުރިހާ ޒަމާނެއްގެ އެންމެ މޮޅު ކުޅުންތެރިއަކީ ކާކުތޯ ކުރި ސުވާލެވެ. މި ސުވާލާއެކު އޭނާގެ ޔަގީންކަން ކުޑަވިއެވެ.

"އެ ސުވާލަށް ދޭން އޮތީ ހިނިތުންވުމެއް،" އޭނާ ބުންޏެވެ. "ތާރީޚުގެ ތެރޭގައި އުޅުނު ކުޅުންތެރިން އެކަކު އަނެކަކާ އަޅާކިޔޭނެ އެއްވެސް ގޮތެއް ނެތް."

"ޒަމާން ބަދަލުވެއްޖެ. އިދިކޮޅު ކުޅުންތެރިން ބަދަލުވެއްޖެ. ކޮންމެ ކުޅުންތެރިއަކީވެސް ތަފާތު ކުޅުންތެރިއެއް. އަހަރެން އަމިއްލައަށް ގަޔާވާ ކުޅުންތެރިއެއްގެ ނަން ބުނެވިދާނެ، އެކަމަކު އޭގެ މާނައަކީ އެއީ ތާރީޚުގެ އެންމެ މޮޅު ކުޅުންތެރިޔާއޭ އެއް ނޫން."

މިއީ މަަކާޔާއަށް މިހާ ދިގު މުއްދަތަކަށް އިހުތިރާމް ލިބެމުންދާ ސަބަބު ހާމަކޮށްދޭ ޖަވާބެކެވެ. ވަކި ކުޅުންތެރިއަކީ އެންމެ މޮޅު ކުޅުންތެރިޔާ ކަމަށް ނިންމުމުގެ ބަދަލުގައި، އޭނާ އިސްކަންދެނީ ކަންކަމުގެ ހަގީގަތް ހުރި ގޮތް ބެލުމަށެވެ.

މެސީ އާއި އާޖެންޓީނާގެ އަނެއް މޮޅު ނަންބަރު 10، ޑިއޭގޯ މަރަޑޯނާއާ ބެހޭގޮތުން ވާހަކަދައްކާއިރުވެސް އޭނާ ގެންގުޅެނީ ހަމަ މި އުސޫލެވެ.

"އެ ދެމީހުން އެއްވަރުކޮށް އަޅާކިޔުމަކީ ވަރަށް އުނދަގޫ ކަމެއް،" އޭނާ ބުންޏެވެ.

"އިދިކޮޅު ޓީމުތައް ތަފާތު. އޭރުގެ ބޭނުންތައް ތަފާތު. ޓީމުގެ އެހެން ކުޅުންތެރިންގެ ފަރާތުން ލިބުނު އެހީތެރިކަން ތަފާތު. ކޮންމެ މީހެއްގެވެސް އަމިއްލަ ދިރިއުޅުމަކާއި އަމިއްލަ ތާރީޚެއް އޮވޭ."

އަދި 1970 ވަނަ އަހަރުގެ ޕެލޭގެ ބްރެޒިލް ޓީމާއި 1986 ވަނަ އަހަރުގެ މަރަޑޯނާގެ އާޖެންޓީނާ ޓީމާ ބެހޭގޮތުން ސުވާލުކުރުމުންވެސް އޭނާ ދިނީ ހަމަ އެފަދަ ޖަވާބެކެވެ.

"އެ ދެ ޓީމު އަޅާކިޔޭނެ އެއްވެސް ގޮތެއް ނެތް. ކުޅުމުގެ ވައްޓަފާޅި މުޅިން ތަފާތު،" އޭނާ ބުންޏެވެ.

'ކޮންމެވެސް ދުވަހަކުން ރިޓަޔަރ ކުރާނަން'

ކާމިޔާބީގެ އުފަލުގައި އުޅުމަކީ ފަސޭހަ ކަމެއް ނަމަވެސް، ބަލިވުމަކީވެސް އެހާމެ މުހިންމު ކަމެއް ކަމަށް މަަކާޔާ ބުނެ އެވެ.

"ހަނދާނުން ފޮހެލަން އުނދަގޫ އެތައް މެޗެއް އެބަހުރި،" އޭނާ ބުންޏެވެ. "ނާކާމިޔާބު ނަތީޖާތަކަކީވެސް އެ ހަނދާންތަކުގެ ބައެއް."

އާޖެންޓީނާ މީހަކަށް ވީތީ، ވޯލްޑް ކަޕް ކާމިޔާބުކުރުމަކީ އޭނާގެ ހިތުގައި ހާއްސަ މަގާމެއް ދެވިފައިވާ ކަމެކެވެ.

"ވޯލްޑް ކަޕް ކާމިޔާބުކުރުމަކީ އަހަރެންގެ އެންމެ ފޭވަރިޓް ހަނދާން. އަދި މަރަޑޯނާގެ ކާމިޔާބީއަށް ބަލާއިރު، އަހަރެން ގަބޫލުކުރަނީ އެ ތަށީގެ ސަބަބުން އޭނާގެ މުޅި އުމުރުގައި ހޯދަމުންދިޔަ ސުވާލުގެ ޖަވާބު ލިބުނު ކަމަށް. އެއީ ދުނިޔޭގެ ޗެމްޕިއަނަކަށް ވުން،" އޭނާ ބުންޏެވެ.

އޭނާގެ އަމިއްލަ ކުރިމަގާ ބެހޭގޮތުން ވާހަކަދައްކަމުން، ދުނިޔޭގެ އެންމެ ބޮޑު ކުޅިވަރު ހަރަކާތް ކަވަރުކުރުމުގައި 70 އަހަރާ ގާތްކުރާ މުއްދަތެއް ހޭދަކުރުމަށްފަހު، ރިޓަޔަރ ކުރުން ނުވަތަ މަސައްކަތުން ދުރުވުން މިހާރު އޮތީ ވަރަށް ގާތުގަ އެވެ.

"ކޮންމެވެސް ދުވަހަކުން އަހަރެން ރިޓަޔަރ ކުރާނަން،" ހިނިތުންވުމަކާއެކު މަަކާޔާ މާކޭޒް ބުންޏެވެ.